Heptilik xewerler (2-marttin 8-martqiche)

Muxbirimiz eziz
2019-03-08
Élxet
Pikir
Share
Print
Erkin asiya radi'osi Uyghur bölümi heptilik xewerliri
Erkin asiya radi'osi Uyghur bölümi heptilik xewerliri
Photo: RFA

Bir qisim Uyghur tutqunlar shendong ölkisige yötkelgen

Uyghur diyaridiki lagér mehbusliridin bir qismining shendong ölkisidiki türmilerge yötkelgenliki melum boldi. Muxbirimizning ehwal igilishi jeryanida Uyghur mehbuslarning shendongdiki birnechche türmige orunlashturulghanliqi ashkarilandi. 

Gerche türme xadimliri Uyghur mehbuslarning sani we hazirqi ehwali heqqide melumat bérishni ret qilghan bolsimu, ularning yötkelgenlikini inkar qilmidi. 

Melum bolushiche, xitay ölkilirige yötkelgen Uyghur mehbuslargha da'ir uchurlar "Qet'iy mexpiy" shekilde saqliniwatqan bolup, türme xadimliri bu ehwallarni ashkarilimasliq heqqide wedinamilerge imza qoyghan iken.

Qeshqer su ishliri idarisidiki Uyghur xizmetchilerning 15 pirsenti lagérgha élip kétilgen

Yéqinda qeshqer wilayetlik su ishliri idarisidiki alte neper Uyghur kadirning lagérgha élip kétilgenliki, ularning Uyghur ishchi-xizmetchiler sanining 15 pirsentini teshkil qilidighanliqi melum boldi. 

Su ishliri bilen shughullinidighan bu xadimlarning tutqun qilinish sewebi hazirghiche namelum. Emma muxbirimizning ehwal igilishi jeryanida bu kishilerning bir qismi yanfonliridin "Mesile" chiqqanliqi üchün tutulghanliqi melum boldi.

Ötken mezgillerde qeshqerdiki herqaysi idare orunliridin zor sandiki Uyghur kadirlar lagérlargha élip kétilgen idi. Ehwaldin xewerdar kishiler "Su ishliri idarisi siyasiy we medeniyet pa'aliyetliridin yiraq bolghanliqi üchün tutulghanlar eng az bolghan déyishke bolidu" dédi. 

Abdusalam teklimakani hindonéziyede 20 meydan doklat bérip, Uyghurlar weziyitini tonushturdi

Türkiyediki "Yéngi nesil herikiti" ning re'isi doktor abdusalam teklimakani hindonéziyediki ikki heptilik ziyariti jeryanida 20 meydan doklat bérip, Uyghurlarning hazirqi ehwalini anglatti.

Hindonéziyediki yashlar teshkilatining teklipige bina'en hindonéziyege barghan abdusalam bu jeryanda herqaysi chong sheherlerdiki bilim yurtliri, meschitler we hökümet binalirida Uyghur diyaridiki éghir siyasiy basturush heqqide doklat berdi. 

Uyghurlar duch kéliwatqan paji'elerge islam dunyasi süküt qilip turuwatqanda héndonéziyedek dunyadiki eng chong musulmanlar dölitide Uyghurlar mesilisini anglitish zor ehmiyetke ige, dep qaralmaqta iken.

Amérika awam palata ezaliri tramp hökümitini Uyghur mesiliside xitayni jawabkarliqqa tartishqa chaqirdi

Mushu hepte amérika awam palata we kéngesh palatasining bir qisim ezaliri Uyghurlar mesilisi boyiche amérika tashqi ishlar ministiri mayk pompéyogha mektup yollidi. Ular mektupta amérika hökümitini Uyghurlar duch kéliwatqan basturushlargha qarita yéterlik tedbir qollanmidi, dep eyiblidi. 

Mektupta Uyghur diyaridiki zor tutqun we lagérlar mesilisi alliqachan aydingliship bolghan ehwalda xitay hökümitini bu mesilide jawabkarliqqa tartishning zörürlüki yene bir qétim tekitlendi. 

Yene bir qisim palata ezaliri amérika dölet mejliside ötküzülgen "Xitayda ewj éliwatqan zor kölemlik diniy ziyankeshlik" témisidiki yighindimu mushuninggha oxshap kétidighan qarashlarni otturigha qoyghan idi. 

B d t da "Sherqiy türkistandiki jaza lagérliri" témisida yighin ötküzüldi

6-Mart küni xelq'ara kechürüm teshkilati, xelq'ara kishilik hoquqni közitish teshkilati qatarliq besh chong xelq'araliq teshkilat d u q bilen birlikte b d t ning jenwediki bash shtabida "Sherqiy türkistandiki jaza lagérliri" témisida ilmiy muhakime yighini ötküzdi. 

Bu yighinda lagérlarning hazirqi ehwali, tesiri we bashqa munasiwetlik mesililer nuqtiliq muhakime qilin'ghan. Shu arqiliq yighin'gha qatnashqa 30 nechche döletning diplomatiye xadimlirigha Uyghurlar diyarining heqiqiy ehwali anglitilghan. 

Melum bolushiche, yighin meydanidiki xitay diplomatliri dolqun eysani "B d t da söz qilish salahiyiti yoq térrorchi" dep eyibligen bolsimu, emma yighin ehlining küchlük reddiyesige uchrighan. 

Ilham toxti yene bir xelq'araliq mukapatqa namzatliqqa körsitildi

Uyghur diyaridiki siyasiy basturush barghanséri ewj éliwatqanda türmidiki Uyghur ziyaliy ilham toxti "Awam jasariti mukapati" gha namzatliqqa körsitildi. 

Melum bolushiche, bu mukapat 2000-yili nyuyork shehiride tesis qilin'ghan iken. U asasen zorawan hakimiyetlerning bésimi astida turup uninggha qarshiliq körsitishke jür'et qilghan shexslerni teqdirlesh üchün bérilidiken. 

Yéqindin buyan ilham toxti bir qatar xelq'araliq mukapatlarning namzatliqigha körsitiliwatqan bolup, uning mukapatlinishi Uyghur dawasining kelgüsi tereqqiyati üchün ijabiy qimmetke ige, dep qaralmaqta iken.

Toluq bet