Heptilik xewerler (6-apréldin 12-aprélghiche)

Muxbirimiz eziz
2019-04-12
Élxet
Pikir
Share
Print
Amérika orégon saghlamliq we ilim-pen uniwérsitétining Uyghur proféssori, bi'ologiye alimi shöhret mutellip, xanimi gülinur nasirowa, oghli pa'ul we qizi nargiz bilen. 2013-Yili 22-may, amérika.
Amérika orégon saghlamliq we ilim-pen uniwérsitétining Uyghur proféssori, bi'ologiye alimi shöhret mutellip, xanimi gülinur nasirowa, oghli pa'ul we qizi nargiz bilen. 2013-Yili 22-may, amérika.
oregonianmediagroup.com

Tijaretchi yaqup rozi lagérda jan üzgen

Yéqinda atushning shoruq yézisidiki tijaretchi yaqup rozining bu yil mart éyining axirida lagérda jan üzgenliki ashkarilandi.

Melum bolushiche, yaqup rozi qirghizistanning bishkek shehiride soda qiliwatqan bolup, 2017-yilining béshida xitay hökümitining chaqiriqigha awaz qoshup yurtigha qaytip kelgen iken. Deslep uning pasporti musadire qilin'ghan, arqidinla shu yilining otturiliri tutqun qilin'ghan.

Lagér mehbuslirining lagérlarda jan üzüwatqanliqi hazir da'imliq hadisige aylinip qéliwatqan bolsimu, xitay hökümitining uchurgha bolghan kontrolluqi sewebidin bundaq ölüm weqelirining köpi namelum halda qalmaqta iken.

Öy-mülük sodigiri élyas memetning tutqunda ikenliki ashkarilandi

2000-Yillardin buyan Uyghur diyarida köpchilikke tonulushqa bashlighan öy-mülük sodigiri élyas memetning tutqun qilin'ghanliqi heqqidiki xewerning rastliqi delillendi.

Ilyas memet we uning qérindashliri 2001-yilidin bashlap ürümchi, ghulja, korla qatarliq sheherlerde "Wisal méhmanxanisi", "Sübhi soda sariyi" qatarliq köpligen soda binaliri we olturaq öy binalirini salghan iken.

Nöwette bir qisim analizchilar ilyas memet jemetining barliq mal-mülkining musadire qilin'ghan bolushi mumkinlikini texmin qilmaqta.

Gensuning wuwéy türmiside birer mingche Uyghur mehbusning barliqi delillendi

Uyghur diyaridiki lagérlar mesilisi xelq'araning jiddiy diqqitini qozghighandin kéyin xitay hökümiti Uyghur mehbuslarni xitay ölkilirige yötkeshke bashlighan idi. Yéqinda ashu xildiki birer mingche Uyghur tutqunning gensuning wuwéy türmiside ikenliki delillendi.

Muxbirimizning bu heqtiki ehwal éniqlishi jeryanida shu jaydiki saqchi xadimliridin biri bu mehbuslarning wuwéy türmisidiki töt rayon'gha tarqaq orunlashturulghanliqini éytqan.

"Zimistan" torining bu heqtiki xewerliride éytilishiche, bu mehbuslar héchkim bilen körüshtürülmeydiken. Ulargha 24 sa'et koyza we kishen sélinidiken. Shundaqla türme saqchilirigha bu mehbuslar qarshiliq körsitip qalsa shu jaydila étiwétish buyruqi bérilgen iken.

Muhajirettiki Uyghurlar "Barin weqesi" ni xatirilidi

Bu yil 5-aprél künide dunyaning herqaysi jayliridiki Uyghur jama'iti "Barin weqesi" ning 29 yilliqini xatirilidi.

Muhajirettiki Uyghur teshkilatliridin gérmaniyediki "Yawropa sherqiy türkistan birliki" myunxénda namayish qildi. Bu xildiki namayishlar norwégiye, gollandiye, shiwétsiye qatarliq jaylardiki teshkillendi.

Qazaqistandiki Uyghur jama'iti mexsus yighilish ötküzüp barin shéhitlirining rohigha atap xetme qur'an qildi. Shundaqla "Barin weqesi we sherqiy türkistanning hazirqi zaman tarixi" témisida nutuqlar sözlendi.

Türkiyediki Uyghur teshkilatliri bu munasiwet bilen süretler körgezmisi uyushturup, Uyghurlar diyarining ehwalini tonushturdi.

Shöhret mutellipowning xitay da'iriliri bilen bi'ologiyelik tejribide hemkarlishishi ghulghula qozghidi

Xelq'aragha tonulghan bi'ologiye alimi shöhret mutellipowning yéqindin buyan xitay alimliri bilen birlikte xitaydiki melum bir tejribixanida hemkarliship ishlewatqanliqi heqqidiki uchurlar ijtima'iy taratqularda tarqalghandin kéyin muhajirettiki Uyghurlar arisida bu heqte ghulghula qozghaldi.

Shöhret mutellipow bu heqte radiyomizgha ewetken bayanatida özining ilim-pen tetqiqati üchün xitay alimliri bilen hemkarlishiwatqanliqini tekitlidi.

Uning singlisi, xelq'aragha tonulghan alime maysem mutellipowa radiyomiz ziyaritini qobul qilip, özining oylighanlirini biz bilen ortaqlashti. Shundaqla "Xitay hökümiti Uyghurlargha mushunche zulum séliwatqanda akamning bu qilghini peqet toghra emes" dep eyiblidi.

Amérikadiki "Uyghur erkinlik marshi" tentenilik ötküzüldi

Dunya Uyghur qurultiyi qatarliq bir qatar teshkilatlar uzundin buyan teyyarliq qilghan "Uyghur erkinlik marshi" pa'aliyiti 6-aprél küni amérika paytexti washin'gton shehiride ötküzüldi.

Amérikaning herqaysi jayliridin kelgen Uyghurlar, shuningdek herqaysi meschitlerdin kelgen musulmanlar jama'itidin birer mingche kishi bir yerge jem bolup, bu pa'aliyet arqiliq amérika hökümitini Uyghurlar mesiliside téximu emeliy herikette bolushqa dewet qildi.

Amérikining kaliforniye shtatidiki Uyghurlarmu washin'gtondiki namayishqa awaz qoshup, los-anzhélis shehiride "Uyghurlargha erkinlik" témisida namayish qildi. Bu xildiki namayish yene awstraliyening mélborn shehiridimu ötküzüldi.

Toluq bet