Һәптилик хәвәрләр (16-апрелдин 22-апрелғичә)

Хитай үрүмчини хәлқаралиқ һава қатнаш түгүни қилмақчи

Үрүмчини нопуси бәш милйонға йәткән оттура асиядики әң чоң шәһәр қилип қуруп чиқиш пилани елан қилиниш билән бир вақитта йәнә хитай һава қатнаш саһәси үрүмчи шәһириниң явро-асия қуруқлуқиниң мәркизигә җайлишиштәк әвзәл җуғрапийилик шараитиға асасән уни хитайниң муһим хәлқаралиқ вә район характерлик һава қатнаш түгүни қилиш нишанини бәлгиләп, иш башлиған.

Шинхуаниң хәвәр қилишичә, һазир, үрүмчи билән хитайниң көплигән шәһәрлири вә бир қанчә явро-асия мәмликәтлири арисида һава қатнишини йолға қоюлған болуп, 2015-йилиғичә йәнә йеңи йолларни ечиш вә күчәйтиш бекитилгән.

Үрүмчидә бир сода базириға от кәтти

18-Апрел күни үрүмчи җәнубий пойиз истансисиға йеқин җайдики тйәнбав хәлқара сода базириға от кәткән болуп, 170 тин артуқ от өчүрүш хадими ишқа селинип, ахирида от өчүрүвелинған.

Минпав гезитиниң йезишичә, бу бинаға зибузиннәт буюмлири дуканлири, туралғу өй вә һәр хил ширкәтләрниң ишханилири һәм искилатлири җайлашқан икән. Буниңдин үч йил илгириму,мушу кочидики дехуй сода базириға от кәткән болуп, зор зиян көрүлгән иди.

Қәшқәрдә бир киши 6 кишини пичақ тиқип яриландуруп, арқидин өзини өлтүрүвалған

Мухбиримизниң игилишичә, 19-апрел күни қәшқәр шәһиридә 20 нәччә яшлардики бир уйғур яш 6 нәпәр хитайни пичақ тиқип яриландуруп, сақчилар қоршавға алған чағда өзини өлтүрүвалди.

Бу һәқтә алди билән шинхуа агентлиқи учур тарқатқан, әмма хитай ахбарат васитиси пичақ билән һуҗум қилиш вәқәсини садир қилғучи вә яриланғучиларниң милләт тәркиби һәм вәқәниң сәвәблири һәққидә тәпсилий учур бәрмигән иди.

Бу вәқәниң сәвәблири һәққидә хәлқаралиқ ахбарат агентлиқлириниң хәвәрлиридә һәмдә уйғур паалийәтчилириниң инкаслирида райондики миллий зиддийәтләр мәсилиси қәйт қилинди.

Уйғур елидә һәр йили 3000 дин артуқ сәргәрдан бала йиғивелиниду

Хитай ахбарат васитилириниң хәвәр қилишичә, һазир уйғур елидә һәр йили 3000 дин артуқ сәргәрдан бала йиғивелинидикән.

Уйғур аптоном район партком секретари җаң чүншән, 21-апрел күни үрүмчи өткүзүлгән бир мәхсус йиғинда хитай өлкилиридики уйғур елидин кәткән сәргәрдан балиларни қайтуруп келишни чақириқ қилған.

Буниң үчүн 50 милйон йүән мәбләғ селип, йеңидин бир қурамиға йәтмигән сәргәрдан балиларни орунлаштуруш вә тәрбийиләш мәркизи қуруш қарар қилинған.

Даириләр йәнә хитай өлкилири билән һәмкарлишип, қәйәрдә сәргәрдан балилар көрүлсә дәрһал уларни йиғивелишни бекиткән. Хитай өлкилиригә алдап елип кетилгән сәргәрдан балиларниң мутләқ көп қисминиң уйғур икәнлики мәлум.

Шәрқий түркистан уйғур алий кеңишиниң йиғин программиси елан қилинди

2011-Йили, 2-майдин -8-майғичә америка пайтәхти вашингтонда чақирилидиған шәрқий түркистан уйғур алий кеңиши йиғининиң тәйярлиқ комитети өзиниң хизмәтлирини йәкүнләп, йиғин күн тәртипи вә программисини елан қилди.

Дуня уйғур қурултийиниң тор бетидә елан қилинған бу қетимқи йиғинниң программисидин мәлум болушичә, дуняниң һәр қайси дөләтлиридин келидиған уйғур вәкиллири йиғинниң америка дөләт мәҗлисидики ечилиш мурасимиға қатнишиду.

Бу мурасимда уйғур миллий һәрикитиниң рәһбири рабийә қадир ханим ечилиш нутқи сөзләйду, америка дөләт мәҗлиси әзалиридин франк волф, америка демократийини илгири сүрүш фондиниң рәиси карил гришмән қатарлиқ бир қисим дөләт мәҗлис әзалири вә демократийә һәм кишилик һоқуқ паалийәтчилири сөз қилиду.

Бир һәптә давамлишидиған мәзкур йиғин җәрянида уйғурларниң сиясий вәзийити вә тәқдиригә мунасивәтлик түрлүк мәсилиләр кәң даирә бойичә муһакимә қилиниду.

Нато дөләтлири ливийә өктичилиригә ярдәм беришни давамлаштурмақчи

Америка авазиниң хәвәр қилишичә, шималий атлантик окян әһди тәшкилатиға әза дөләтләрдин италийә, франсийә вә әнглийә өзлириниң ливийидики қозғилаңчиларға һәрбий мәслиһәтчиләрни әвәтип, ярдәм беридиғанлиқини билдүргән.

Буниң ичидә италийә он нәпәр мәслиһәтчи әвәтидиғанлиқини елан қилған.

Америка қошма штатлири болса өктичи күчләргә 25 милйон доллар қиммитидики һәрбий ярдәмләрни беридиғанлиқини билдүргән.

22-Апрел күни америка мудапиә министирлиқи америкиниң ярдәм үчүн ливийигә ракета орунлаштурулған икки данә учқучисиз айропилан әвәтилидиғанлиқини билдүргән.