Heptilik xewerler (16-apréldin 22-aprélghiche)

Muxbirimiz ümidwar
2011.04.22

Xitay ürümchini xelq'araliq hawa qatnash tügüni qilmaqchi

Ürümchini nopusi besh milyon'gha yetken ottura asiyadiki eng chong sheher qilip qurup chiqish pilani élan qilinish bilen bir waqitta yene xitay hawa qatnash sahesi ürümchi shehirining yawro-asiya quruqluqining merkizige jaylishishtek ewzel jughrapiyilik shara'itigha asasen uni xitayning muhim xelq'araliq we rayon xaraktérlik hawa qatnash tügüni qilish nishanini belgilep, ish bashlighan.

Shinxu'aning xewer qilishiche, hazir, ürümchi bilen xitayning köpligen sheherliri we bir qanche yawro-asiya memliketliri arisida hawa qatnishini yolgha qoyulghan bolup, 2015-yilighiche yene yéngi yollarni échish we kücheytish békitilgen.

Ürümchide bir soda bazirigha ot ketti

18-Aprél küni ürümchi jenubiy poyiz istansisigha yéqin jaydiki tyenbaw xelq'ara soda bazirigha ot ketken bolup, 170 tin artuq ot öchürüsh xadimi ishqa sélinip, axirida ot öchürüwélin'ghan.

Minpaw gézitining yézishiche, bu binagha zibuzinnet buyumliri dukanliri, turalghu öy we her xil shirketlerning ishxaniliri hem iskilatliri jaylashqan iken. Buningdin üch yil ilgirimu,mushu kochidiki déxuy soda bazirigha ot ketken bolup, zor ziyan körülgen idi.

Qeshqerde bir kishi 6 kishini pichaq tiqip yarilandurup, arqidin özini öltürüwalghan

Muxbirimizning igilishiche, 19-aprél küni qeshqer shehiride 20 nechche yashlardiki bir Uyghur yash 6 neper xitayni pichaq tiqip yarilandurup, saqchilar qorshawgha alghan chaghda özini öltürüwaldi.

Bu heqte aldi bilen shinxu'a agéntliqi uchur tarqatqan, emma xitay axbarat wasitisi pichaq bilen hujum qilish weqesini sadir qilghuchi we yarilan'ghuchilarning millet terkibi hem weqening sewebliri heqqide tepsiliy uchur bermigen idi.

Bu weqening sewebliri heqqide xelq'araliq axbarat agéntliqlirining xewerliride hemde Uyghur pa'aliyetchilirining inkaslirida rayondiki milliy ziddiyetler mesilisi qeyt qilindi.

Uyghur élide her yili 3000 din artuq sergerdan bala yighiwélinidu

Xitay axbarat wasitilirining xewer qilishiche, hazir Uyghur élide her yili 3000 din artuq sergerdan bala yighiwélinidiken.

Uyghur aptonom rayon partkom sékrétari jang chünshen, 21-aprél küni ürümchi ötküzülgen bir mexsus yighinda xitay ölkiliridiki Uyghur élidin ketken sergerdan balilarni qayturup kélishni chaqiriq qilghan.

Buning üchün 50 milyon yüen meblegh sélip, yéngidin bir quramigha yetmigen sergerdan balilarni orunlashturush we terbiyilesh merkizi qurush qarar qilin'ghan.

Da'iriler yene xitay ölkiliri bilen hemkarliship, qeyerde sergerdan balilar körülse derhal ularni yighiwélishni békitken. Xitay ölkilirige aldap élip kétilgen sergerdan balilarning mutleq köp qismining Uyghur ikenliki melum.

Sherqiy türkistan Uyghur aliy kéngishining yighin programmisi élan qilindi

2011-Yili, 2-maydin -8-mayghiche amérika paytexti washin'gtonda chaqirilidighan sherqiy türkistan Uyghur aliy kéngishi yighinining teyyarliq komitéti özining xizmetlirini yekünlep, yighin kün tertipi we programmisini élan qildi.

Dunya Uyghur qurultiyining tor bétide élan qilin'ghan bu qétimqi yighinning programmisidin melum bolushiche, dunyaning her qaysi döletliridin kélidighan Uyghur wekilliri yighinning amérika dölet mejlisidiki échilish murasimigha qatnishidu.

Bu murasimda Uyghur milliy herikitining rehbiri rabiye qadir xanim échilish nutqi sözleydu, amérika dölet mejlisi ezaliridin frank wolf, amérika démokratiyini ilgiri sürüsh fondining re'isi karil grishmen qatarliq bir qisim dölet mejlis ezaliri we démokratiye hem kishilik hoquq pa'aliyetchiliri söz qilidu.

Bir hepte dawamlishidighan mezkur yighin jeryanida Uyghurlarning siyasiy weziyiti we teqdirige munasiwetlik türlük mesililer keng da'ire boyiche muhakime qilinidu.

Nato döletliri liwiye öktichilirige yardem bérishni dawamlashturmaqchi

Amérika awazining xewer qilishiche, shimaliy atlantik okyan ehdi teshkilatigha eza döletlerdin italiye, fransiye we en'gliye özlirining liwiyidiki qozghilangchilargha herbiy meslihetchilerni ewetip, yardem béridighanliqini bildürgen.

Buning ichide italiye on neper meslihetchi ewetidighanliqini élan qilghan.

Amérika qoshma shtatliri bolsa öktichi küchlerge 25 milyon dollar qimmitidiki herbiy yardemlerni béridighanliqini bildürgen.

22-Aprél küni amérika mudapi'e ministirliqi amérikining yardem üchün liwiyige rakéta orunlashturulghan ikki dane uchquchisiz ayropilan ewetilidighanliqini bildürgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.