Һәптилик хәвәрләр (11-майдин 17-майғичә)

Мухбиримиз әзиз
2019-05-17
Елхәт
Пикир
Share
Принт
.
.
forward.com

Лагер шаһити гүлзирә авулқанқизи лагердики бир қисим вәһшиликләрни ашкарилиди

Ғулҗа наһийәсидики аяллар лагериға икки йилдин артуқ қамалған гүлзирә авулқанқизи лагердин чиққандин кейин өзи көргән бир қисим реяллиқни ташқи дуняға ашкарилиди.

Гүлзирә өзигә әң тәсир қилған ишлар қатарида бир қисим аял тутқунларниң йерим кечидә елип чиқип кетилгәнчә ғайиб болуп кетидиғанлиқини, еғир турмуш вә аталмиш өгиниш бесимлири, мәҗбурий чошқа гөши йегүзүш, тәкшүрүш өмәклири кәлгәндики алдамчилиқ қилмишлири қатарлиқларни ашкарилиди.

Гүлзирәниң бу қетимқи гуваһлиқ баянлири хитай һөкүмитиниң лагерлар һәққидики ялғанлириниң әпти-бәширисини йәнә бир қетим ечип ташлиди.

Америка ташқи ишлар министирлиқи: « америка һөкүмити уйғурларниң йенида!»

Американиң муавин ярдәмчи ташқи ишлар министири скот бусбй йеқинда радийомиз зияритини қобул қилип, америка һөкүмити вә хәлқниң уйғурларниң йенида икәнликини билдүрди.

Скот бусбй америка ташқи ишлар министирлиқиниң демократийә, кишилик һоқуқ вә әмгәк бюросиниң мәсул рәһбири болуп, у илгири уйғур вәзийити һәққидә дөләт мәҗлисидә гуваһлиқ бәргән. У шу қетим 800 миңдин 2 милйонғичә адәмниң хитай уйғур районида қурған лагерларға қамалғанлиқини тунҗи қетим оттуриға қойған иди.

Сөһбәт җәрянида скот бусбий америка һөкүмитиниң уйғур дияридики сиясий бастуруш һәрикәтлири вә лагерлар мәсилиси бойичә немиләрни қиливатқанлиқи тоғрисида мәлуматлар бәрди.

Бу йиллиқ «анилар байрими» муһаҗирәттики уйғурлар үчүн қайғулуқ бир күн болди

Һәр йили 12-май күни дуня бойичә өткүзүлидиған «анилар байрими» муһаҗирәттики уйғурлар үчүн толиму қайғулуқ бир күн болди. Чүнки ата-анисиниң лагерларға қамалғанлиқи муһаҗирәттики көплигән уйғурларға ортақ бир қисмәт болмақта иди.

Бир қисим уйғур яшлири бу мунасивәт билән мунасивәтлик торларда өз язмилирини елан қилса, йәнә бәзиләр өз анилириниң әркинликкә чиқиши үчүн давамлиқ күрәш қилидиғанлиқини билдүрди.  

Мәлум болушичә, нөвәттә муһаҗирәттики көп қисим уйғурлар ата-анилири билән һәтта телефонда сөзлишиш имканиғиму игә әмәс болуп, бәзиләр буни «21-әсирдики чекигә йәткән миллий зулумниң бир түрлүк инкаси,» дәп қаримақта икән.  

Әрвинә турсунниң гуваһлиқи норвегийә таратқулирида диққәт қозғиди

Йеқинда норвегийәдә оқуватқан уйғур яшлиридин мәрвинә турсунниң лагерға қамалған аниси вә тағиси һәққидики гуваһлиқи норвегийә дөләтлик радийоси вә бир қисим йәрлик гезитләрдә елан қилинди.

Мәлум болушичә, мәрвинәниң аписи вә тағиси дәсләп майтағ шәһиридики лагерға елип кетилгән, кейинчә уларға қамақ җазаси берилип түрмигә йөткәлгән.  

Мәрвинә өз кәчүрмишлиригә бирләштүргән һалда муһаҗирәттики уйғурларниң хитай лагерлириға қамалған уруқ-туғқанлири мәсилисидә сүкүт қилмаслиқини, әксичә бу зулумларни ташқи дуняға ашкарилашниң зөрүр икәнликини алаһидә тәкитлиди.

Хитайниң «асия мәдәнийәтләр диялоги» йиғини чақириши тәнқидкә дуч кәлди

Мушу һәптидә хитай рәиси ши җинпиңниң тәшәббуси билән чақирилған «асия мәдәнийәтләр диялоги» йиғини бейҗиңда өткүзүлди.

Йиғинда ши җинпиң мәдәнийәтләрниң көп хиллиқи һөрмәтләшни тәкитләп, «башқа мәдәнийәтләрни өзгәртишкә яки униң орниға башқа бир мәдәнийәтни дәсситишкә урунуш идрак җәһәттин әхмиқанилик, усул җәһәттин апәт характерликтур,» дегән.

Һалбуки, хитай һөкүмити уйғур диярида иҗра қиливатқан сиясий бастурушта уйғурларни хитайлаштуруш, уйғурларниң тили вә мәдәнийитини пүтүнләй йоқитишни нишан қилиниватқанлиқи мәлум. Анализчилар бу һәқтә пикир қилип, «бу хитай һөкүмитиниң қилидиғанни қилип болуп, өзлирини алийҗанаб қилип көрситишидин башқа нәрсә әмәс,» деди.  

Йәһудий тәшкилатлири уйғурлар үчүн давамлиқ паалийәт өткүзмәктә

Өз тарихида ирқий қирғинчилиқни баштин кәчүрүп баққан йәһудийларниң һәрқайсий җайлардики тәшкилатлири уйғурлар дуч келиватқан миллий паҗиәләрни ташқи дуняға аңлитишни давам қилмақта.

Әнглийәниң лондон шәһиридики йәһудий кишилик һоқуқ тәшкилатлиридин «рәние кассен тәшкилати» мәхсус муһакимә йиғини чақирип, уйғурларниң һазирқи әһвали һәққидә доклат бәргән. Доклатқа бир қисим дөләт әрбаблири, мухбирлар вә башқа саһәләрдин кәлгәнләр қатнашқан.

Америкадики йәһудийларниң әң узун тарихқа игә «алға» тор журнили, «дуня йәһудий көзитиш тәшкилати» қатарлиқларму уйғурлар һәққидә мәхсус темидики мақалиләрни елан қилиш арқилиқ дуняни уйғурларға көңүл бөлүшкә чақириқ қилди.

Толуқ бәт