Һәптилик хәвәрләр (25-майдин 31-майғичә)

Мухбиримиз әзиз
2019-05-31
Елхәт
Пикир
Share
Принт
Дуня ислам иттипақиниң саһибханилиқида өткүзүлгән «қуран вә сүнәттә оттураһаллиқ» намлиқ хәлқара муһакимә йиғиндин көрүнүш. 2019-Йили 29‏-май, мәккә.
Дуня ислам иттипақиниң саһибханилиқида өткүзүлгән «қуран вә сүнәттә оттураһаллиқ» намлиқ хәлқара муһакимә йиғиндин көрүнүш. 2019-Йили 29‏-май, мәккә.
Reuters

Үрүмчи сай мәһәллидики тиҗарәтчи әнвәр яқупниң лагерға қамалғанлиқи ашкариланди

Йеқиндин буян уйғурлар дияридики зор тутқунда диний етиқад вә тиҗарәт ишлириға четишлиқ уйғурларниң баш нишан болуватқанлиқи мәлум. Үрүмчи шәһириниң сай мәһәллисидики тиҗарәтчи әнвәр яқупниң буниңдин бирәр айчә илгири тутқун қилиниши әнә шуниң мисали.

Әнвәр яқуп сай мәһәллидики уйғурлар арисида өзиниң тәқвадарлиқи, һәқ сөзлүки вә тәшкилләш қабилийити билән шу җайдики уйғур җамаити арисида бәлгилик һөрмәткә игә болған икән.

Әнвәр яқупқа қандақ җинайәтниң артилғанлиқи һәмдә қәйәрдә икәнлики һазирчә намәлум. Анализчилар бу һәқтә пикир қилип: «уйғурлар дияридики зор тутқунниң алдинқи басқучлиридин қелип қалғанларниң давамлиқ лагерларға йоллиниватқанлиқини васитилик һалда көрситип бериду» деди.

Истанбулдин чақиртилип кәткән уйғурлар қамаққа елинған


Өткән йили хитай даирилири истанбулдики бир қисим уйғурларға телефон қилиш арқилиқ уларни қайтип келишкә дәвәт қилған иди. Йеқинда буниңға ишинип қайтип барғанларниң қамаққа елинғанлиқи мәлум болди.

Шуларниң бири хотәнниң лоп наһийәсидин кәлгән абликим мәмтимин болуп, истанбулда давалиниватқанда хитай сақчилири телефон қилип қайтип келишни ейтқан.

Мәлум болушичә, хитай даирилири һазирғичә чәтәлләрдики бир қисим уйғурларға телефон қилип, уларни қайтип келишкә һәмдә чәтәлләрдики «зәһәрлик идийәләр билән булғанмаслиққа» дәвәт қилмақтикән.

«Ийи партийәси» түркийәни уйғурларға игә чиқишқа чақирди

Рамизан ейи мәзгилидә түркийә парламентидики чоң партийәләрдин болған «ийи партийәси» ниң рәиси мәрал ақшәнәр ханим парламент йиғинида сөз қилип, түркийә һөкүмитини дадиллиқ билән уйғурларға игә чиқишқа чақирди.

Болупму униң уйғурлар билән түркләр оттурисидики тарихий қандашлиқни тәкитләштин башқа хитайниң хасийәтлик рамизан ейи мәзгилидә уйғурларға селиватқан зулумлириға сүкүт қилишни «зулумға шерик болғанлиққа баравәр» дәп көрситиши зор тәсир қозғиған.

Мәлум болушичә, «ийи партийәси» йеқинқи мәзгилләрдә әрдоған һөкүмитини уйғурларға игә чиқишта вә җаза лагерлири мәсилисидә йетәрлик җасарәт көрсәтмиди, дәп көп қетим әйиблигән иди.

Уйғур паалийәтчилири явропа әллиригә уйғурлар мәсилисини җанлиқ тонуштурмақта


Уйғурлар дуч келиватқан еғир сиясий бөһранлар һәққидә явропадики һәр саһә кишилирини техиму яхши хәвәрдар қилиш үчүн америкадики уйғур зиялийлиридин нурий түркәл вә рошән аббас мушу бир һәптә ичидә бир қатар мунбәрләрдә лексийә бәрди.

Америкадики уйғур адвокат нурий түркәл норвегийәдики «осло әркинлик мунбири» дә мәхсус сөз қилип, нөвәттики уйғурлар мәсилисиниң арқа көрүнүши, һазирқи тәрәққияти һәққидә мәлумат берип һәр саһә кишилирини бу мәсилиләр бойичә өз һөкүмәтлиригә бесим қилишқа чақирди.

«Уйғур һәрикити» ниң директори рошән аббас американиң австрийәдики баш әлчиханисини орунлаштуруши билән өткүзүлгән икки саәтлик сөһбәт йиғинида уйғурлар учраватқан зиянкәшликләр һәққидә тәпсилий чүшәнчә бәрди.

Уйғур вәкиллири мәккидә өткүзүлгән «қуран вә сүнәттә оттураһаллиқ» намлиқ хәлқара йиғинға қатнашти


27-Май күни мәккә шәһиридә башланған дуня ислам иттипақи вә сәуди әрәбистанниң саһибханлиқидики «қуран вә сүнәттә оттураһаллиқ» намлиқ хәлқара муһакимә йиғиниға түркийә, австралийә қатарлиқ җайлардин кәлгән алтә нәпәр уйғур вәкил қатнашти.

Уйғур вәкилләр бу қетимқи муһакимә йиғини җәрянида йиғинға кәлгән көплигән дөләт вәкиллиригә, җүмлидин пакистан диний ишлар министириға уйғурларниң әһвалини тәпсилий йәткүзүш пурситигә еришкән.

Һалбуки 30-май мәккидә ечилған 14-қетимлиқ ислам алаһидә йиғинида бирләшмә баянат елан қилинған болсиму буниңда уйғурлар дуч келиватқан диний зулумларға һечқандақ орун берилмигән.

Толуқ бәт