Heptilik xewerler (25-maydin 31-mayghiche)

Muxbirimiz eziz
2019-05-31
Élxet
Pikir
Share
Print
Dunya islam ittipaqining sahibxaniliqida ötküzülgen "Qur'an we sünette otturahalliq" namliq xelq'ara muhakime yighindin körünüsh. 2019-Yili 29‏-may, mekke.
Dunya islam ittipaqining sahibxaniliqida ötküzülgen "Qur'an we sünette otturahalliq" namliq xelq'ara muhakime yighindin körünüsh. 2019-Yili 29‏-may, mekke.
Reuters

Ürümchi say mehellidiki tijaretchi enwer yaqupning lagérgha qamalghanliqi ashkarilandi

Yéqindin buyan Uyghurlar diyaridiki zor tutqunda diniy étiqad we tijaret ishlirigha chétishliq Uyghurlarning bash nishan boluwatqanliqi melum. Ürümchi shehirining say mehellisidiki tijaretchi enwer yaqupning buningdin birer ayche ilgiri tutqun qilinishi ene shuning misali.

Enwer yaqup say mehellidiki Uyghurlar arisida özining teqwadarliqi, heq sözlüki we teshkillesh qabiliyiti bilen shu jaydiki Uyghur jama'iti arisida belgilik hörmetke ige bolghan iken.

Enwer yaqupqa qandaq jinayetning artilghanliqi hemde qeyerde ikenliki hazirche namelum. Analizchilar bu heqte pikir qilip: "Uyghurlar diyaridiki zor tutqunning aldinqi basquchliridin qélip qalghanlarning dawamliq lagérlargha yolliniwatqanliqini wasitilik halda körsitip béridu" dédi.

Istanbuldin chaqirtilip ketken Uyghurlar qamaqqa élin'ghan


Ötken yili xitay da'iriliri istanbuldiki bir qisim Uyghurlargha téléfon qilish arqiliq ularni qaytip kélishke dewet qilghan idi. Yéqinda buninggha ishinip qaytip barghanlarning qamaqqa élin'ghanliqi melum boldi.

Shularning biri xotenning lop nahiyesidin kelgen ablikim memtimin bolup, istanbulda dawaliniwatqanda xitay saqchiliri téléfon qilip qaytip kélishni éytqan.

Melum bolushiche, xitay da'iriliri hazirghiche chet'ellerdiki bir qisim Uyghurlargha téléfon qilip, ularni qaytip kélishke hemde chet'ellerdiki "Zeherlik idiyeler bilen bulghanmasliqqa" dewet qilmaqtiken.

"Iyi partiyesi" türkiyeni Uyghurlargha ige chiqishqa chaqirdi

Ramizan éyi mezgilide türkiye parlaméntidiki chong partiyelerdin bolghan "Iyi partiyesi" ning re'isi meral aqshener xanim parlamént yighinida söz qilip, türkiye hökümitini dadilliq bilen Uyghurlargha ige chiqishqa chaqirdi.

Bolupmu uning Uyghurlar bilen türkler otturisidiki tarixiy qandashliqni tekitleshtin bashqa xitayning xasiyetlik ramizan éyi mezgilide Uyghurlargha séliwatqan zulumlirigha süküt qilishni "Zulumgha shérik bolghanliqqa barawer" dep körsitishi zor tesir qozghighan.

Melum bolushiche, "Iyi partiyesi" yéqinqi mezgillerde erdoghan hökümitini Uyghurlargha ige chiqishta we jaza lagérliri mesiliside yéterlik jasaret körsetmidi, dep köp qétim eyibligen idi.

Uyghur pa'aliyetchiliri yawropa ellirige Uyghurlar mesilisini janliq tonushturmaqta


Uyghurlar duch kéliwatqan éghir siyasiy böhranlar heqqide yawropadiki her sahe kishilirini téximu yaxshi xewerdar qilish üchün amérikadiki Uyghur ziyaliyliridin nuriy türkel we roshen abbas mushu bir hepte ichide bir qatar munberlerde léksiye berdi.

Amérikadiki Uyghur adwokat nuriy türkel norwégiyediki "Oslo erkinlik munbiri" de mexsus söz qilip, nöwettiki Uyghurlar mesilisining arqa körünüshi, hazirqi tereqqiyati heqqide melumat bérip her sahe kishilirini bu mesililer boyiche öz hökümetlirige bésim qilishqa chaqirdi.

"Uyghur herikiti" ning diréktori roshen abbas amérikaning awstriyediki bash elchixanisini orunlashturushi bilen ötküzülgen ikki sa'etlik söhbet yighinida Uyghurlar uchrawatqan ziyankeshlikler heqqide tepsiliy chüshenche berdi.

Uyghur wekilliri mekkide ötküzülgen "Qur'an we sünette otturahalliq" namliq xelq'ara yighin'gha qatnashti


27-May küni mekke shehiride bashlan'ghan dunya islam ittipaqi we se'udi erebistanning sahibxanliqidiki "Qur'an we sünette otturahalliq" namliq xelq'ara muhakime yighinigha türkiye, awstraliye qatarliq jaylardin kelgen alte neper Uyghur wekil qatnashti.

Uyghur wekiller bu qétimqi muhakime yighini jeryanida yighin'gha kelgen köpligen dölet wekillirige, jümlidin pakistan diniy ishlar ministirigha Uyghurlarning ehwalini tepsiliy yetküzüsh pursitige érishken.

Halbuki 30-may mekkide échilghan 14-qétimliq islam alahide yighinida birleshme bayanat élan qilin'ghan bolsimu buningda Uyghurlar duch kéliwatqan diniy zulumlargha héchqandaq orun bérilmigen.

Toluq bet