Һәптилик хәвәрләр (26-майдин 01-июнғичә)

Мухбиримиз җүмә
2012.06.01
Share on WhatsApp
Share on WhatsApp

Рабийә қадир ханим: вәтән бәдәлсиз қолға кәлмәйду

Хитай даирилири уйғур миллий һәрикити рәһбири рабийә қадир ханимниң түрмидики оғуллириға бесим ишлитип, “рабийә қадир сода сарийи” вә “әқидә сода сарийи” ниң икки һәптә ичидә чеқилидиғанлиқини билдүргән вә уларни бу биналарниң игидарлиқ һоқуқини өткүзүп беришкә мәҗбурлиған.

Бу рабийә қадир ханимниң қаттиқ әйиблишигә учриди.

Рабийә қадир ханим зияритимизни қобул қилип, бу қетим өзиниң дуня уйғур қурултийиға қайта рәис болуп сайлиниши билән тәң хитайниң йәнә өч елиш һәрикити башлиғанлиқини көрсәтти.

“җандин кәчмигүчә җананға йәткили болмайдиған” лиқини тәкитлигән рабийә қадир ханим ахирида: вәтән бәдәлсиз қолға кәлмәйду, деди вә вәтән дәваси үчүн шәхсән өзи әмәс бәлки пүткүл уйғур хәлқниң бәдәл төләватқанлиқини билдүрди.

Рабийә қадир ханим 2006-йили дуня уйғур қурултийиға рәис болуп сайлинип узун өтмәй, хитай даирилири униң икки оғлини түрмигә ташлиған иди.

“5-июл” дин кейин из-дерәксиз ғайиб болғанлар

“5-июл” дин кейин из-дерәксиз ғайиб болғанлардин бири әйсаҗан әмәт. У, 2009-йили 5-июл аяли тохтигүл билән бирликтә намайиш мәйданида тутқун қилинған, тохтигүл еғир бой болғачқа шу күни қоюветилгән.

Әйсаҗан түрмигә кирип кәткәндин кейин туғулған балисиниң дидарини көрүшкиму муйәссәр болалмиған болуп, нөвәттә униң балиси икки йерим яшқа киргән.

Әйсаҗан әмәт 1984-йили қәшқәрдә туғулған вә қәшқәрниң өрүк базири мәһәллисидә чоң болған. У 2008-йили той қилип, үрүмчигә көчүп кәлгән икән.

Бир уйғур деһқанниң шикайити: “учтурпанда йәр дөләтниң, су биңтуәнниң”

Мәлум болушичә, учтурпанлиқ абдуреһим рози бай болуш арзусида 190 мо боз йәрни 50 йиллиқ тохтам билән һөддә алған.

Һалбуки зираәтлири әмди майса болушқа башлиғанда суни игиливалған биңтуән даирилири су һәққини 30 йүәндин бирдинла 300 йүәнгә өстүрүвалған.

У су һәққини вақтида һазирлашқа имкансиз қалғачқа, зираитиниң 2-қетимлиқ сүйи кечиккән, үчинчи қетимлиқи берилмигән. Нәтиҗидә униң зираәтлири тунҗи йилила қурғақчилиқ апитигә учриған.

Нөвәттә абдуреһим рози, нәччә әвлад бовилири терип башқуруп кәлгән бу йәрләрни хитай дөлитидин иҗаригә елип теримақта, тәбиәтниң немити болған суни биңтуәндин сетивалмақта.

Канададики сайламда қеюм мәсимуф канада уйғур җәмийитиниң рәисликигә сайланди

27-Май канададики уйғурлар сайлам өткүзүп, қеюм мәсимуфни канада уйғур җәмийитиниң рәисликигә сайлиди.

Сайлам канаданиң демократик принсиплириға уйғун һалда, уйғурлар топлишип яшаватқан шәһәрләрниң һәммисидә биләт ташлаш сандуқи тәсис қилиш шәкли билән елип берилди.

Бу қетимқи сайламда һашимҗан турақ билән қеюм мәсимуф канада уйғур җәмийитиниң рәисликини талишиш риқабитигә қатнашқан .Ахирида қеюм мәсимуф утуп чиқти. Канада уйғур җәмийитиниң сабиқ рәиси руқийә турдуш қеюм мәсимуфни қутлуқлиди.

Оғлиниң хун дәваси үчүн мураҗиәтнамә тарқатқан ата шихәнзә җамаити тәрипидин қоғдалди

Ғази ака оғлиниң хун дәваси үчүн 27-май бейҗиңға йәнә кәлгән. Ғази акиниң билдүрүшичә, у бейҗиңға келиштин илгири 2001-йили хитай гезитигә бесилған оғлиниң өлүми һәққидики хәвәрни 200 нусха көпәйтип тарқатқан.

Гәрчә у хитай сақчилириниң паракәндичиликигә учриған болсиму, әтраптики уйғур вә хитай җамаити уни сақчиларниң тутқун қилишидин қоғдап қалған.

Ғази акиниң оғли 2001-йили хитайлар тәрипидин өлтүрүлгән. Шихәнзә қанун органлири делони адил бир тәрәп қилмиған болғачқа ғази ака 11 йилдин буян әрз қилип кәлмәктә.

Финландийә шәрқий түркистан җәмийити дуня күлтүр фестивалиға қатнашти

Финландийә шәрқий түркистан җәмийити финландийиниң пайтәхти хелсинкида өткүзүлгән дуня күлтүр күрикигә қатнишип, уйғур қул-һүнәр сәнәт буюмлирини көргәзмә қилди вә күрәккә кәлгән меһманларға хитайниң уйғурларға қаратқан бесим сияситини аңлатқан.

Мәзкур көрәккә, финландийә дипломатийә министирлиқи, явропа бирлики тәшвиқат бөлүми қатарлиқ 450 сиясий вә иҗтимаий тәшкилатлар қатнашқан.

Көрәккә қатнашқан сәйди обулқасим һаҗимниң ейтишичә, улар көрәк җәрянида уйғурларни пәқәт билмәйдиған нурғун кишиләргә, шәрқий түркистанниң хитай өлкиси әмәс, бәлки мустәмликиси икәнликини билдүргән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.