Heptilik xewerler (1-iyundin 7-iyun'ghiche)

Muxbirimiz sada
2019-06-07
Élxet
Pikir
Share
Print
D u q re'isi dolqun eysa ependi d u q gha teqdim qilin'ghan "Démokratiye mukapati" ni tapshurup alghandin kéyin, muxbirning ziyaritini qobul qilmaqta. 2019-Yili 4-iyun, washin'gton.
D u q re'isi dolqun eysa ependi d u q gha teqdim qilin'ghan "Démokratiye mukapati" ni tapshurup alghandin kéyin, muxbirning ziyaritini qobul qilmaqta. 2019-Yili 4-iyun, washin'gton.
RFA

Démokratiyeni ilgiri sürüsh fondining 2019-yilliq "Démokratiye mukapati" d u q gha bérildi

Démokratiyeni ilgiri sürüsh fondining yillardin béri tarqitip kéliwatqan "Démokratiye mukapati" 2019-yili dunya Uyghur qurultiyi, xitaygha yardem teshkilati, tibet herikiti instituti qatarliq üch teshkilatqa bérildi.

Bu yilliq mukapat tarqitish murasimi 4-iyun küni amérika dölet mejliside ötküzüldi. Murasimgha amérika awam palatasining re'isi, amérika siyasiy sehnisidiki üchinchi nomurluq shexs nensiy pélosi, amérika dölet mejlisi ezaliridin élizabét chénéy, jaku'in kastro, mayk mekka'ul, jim mekgowérin qatarliqlar qatnashti we muhim söz qildi.

Bu yilliq "Démokratiye mukapati" ni tapshuruwalghan dunya Uyghur qurultiyining re'isi dolqun eysa ependi söz qilip, "Bu mukapatning bizge bérilishi Uyghurlarni xelq'aragha izchil 'térrorchi' dep teshwiq qiliwatqan xitay hökümitige bérilgen bir jawab," dédi.

Nensiy pélusi: "Ularning Uyghurlargha yürgüzüwatqini medeniyetlik insanlar qilidighan ish emes"

4-Iyun amérika dölet mejliside "Tiyen'enménning 30-yili: xitaydiki basturushning tedrijiy tereqqiyatini qayta bahalash" namliq bir guwahliq bérish yighini échildi.

Yighin'gha qatnashqan amérikadiki nopuzluq erbablardin yighin riyasetchisi jéymis mikgowérn, kéngesh palatasi ezasi marko robiyo we tomas so'uzi, awam palatasi ezasi kristofér simit qatarliqlar xitayning nöwette Uyghurlargha yürgüzüwatqan éghir zulum siyasitini arqa-arqidin otturigha qoydi.

Mezkur yighin'gha yene amérika awam palatasining re'isi nensiy pélusi xanimmu guwahliq bergüchi süpitide qatnashti. U bayanlirida xitayning Uyghurlargha qaratqan basturush siyasetlirini tilgha élip, "Ularning nöwette Uyghurlargha yürgüzüwatqini medeniyetlik insanlar qilidighan ish emes," dédi.

Dunyaning herqaysiy jayliridiki Uyghurlar birlikte bu yilliq roza héytni tebriklidi

Nöwette Uyghurlarning diniy erkinliki éghir ziyankeshlikke uchrawatqan bir mezgilde muhajirettiki Uyghur jama'iti bu yilliq roza héytni éghir qayghu ichide kütüwaldi.

4-Iyun amérika Uyghur birleshmisi teripidin teshkillen'gen roza héyt namizigha washin'gton shehiri, wirjiniye we mariyland shitatliridiki bir qisim Uyghurlar qatnashti. Jama'et héyt xutbisidin kéyin birlikte wetendiki lagérlargha qamalghan kishilerge erkinlik we hörlük tilep du'agha qol kötürdi.

Amérikadin bashqa yene türkiye, qazaqistan, qirghizistan, gérmaniye, shiwétsiye, gollandiye, awstiraliye, kanada qatarliq döletlerdiki Uyghur jama'itimu bir yerge yighilip, birlikte héyt namizi oqudi we öz-ara héytliship, Uyghurlarning milliy örp-aditini toluq namayan qildi.

Amérika xelq'ara diniy erkinlik alahide elchisi sam brownbek: "Xelq'ara jem'iyetning Uyghur mesilisi üchün heriketke ötidighan waqti keldi"

Amérika xelq'ara diniy erkinlik alahide elchisi sam brownbek roza héyt küni radiyomiz ziyaritini qobul qilip, xitayni Uyghur diyaridiki diniy étiqadi seweblik tutqun qiliniwatqan Uyghurlani qoyup bérishke we xelq'ara jem'iyetni Uyghur mesilisi üchün heriketke ötüshke chaqiridighanliqini bildürdi.

Sam brownbek sözide nöwette "Saqchi döliti" de yashawatqan Uyghur xelqining choqum ümidwar bolishini, amérika hökümitining da'im ularning yénida turidighanliqini tekitlep ötti. U yene Uyghurlarning weziyitige inkassiz turuwatqan musulman ellirini Uyghurlarning diniy erkinliki üchün kökrek kérip otturigha chiqishqa chaqirdi.

"Uyghur heptiliki" muhakime yighinining échilish murasimi amérika dölet mejliside ötküzüldi

Dunya Uyghur qurultiyi sahibxaniliqidiki "Xitaydiki yawuzluqlargha qarshi turayli: Uyghurlar uchrawatqan bohran'gha dunyaning inkasi" témisidiki ilmiy muhakime yighinining échilish murasimi 6-iyun küni amérika dölet mejliside ötküzüldi.

Mezkur yighin'gha amérika dölet mudapiye ministirliqning hindi-tinch okyan bixeterlik ishlirigha mes'ul yardemchi ministiri randal shraywér, amérikining xelq'ara diniy erkinlik bash elchisi sam brownbek, amérika awam palatasining ezasi kristofér simis we démokratiyeni ilgiri sürüsh fondining re'isi karl gérshman qatarliqlar alahide teklip bilen qatnashti we Uyghurlarning nöwettiki weziyiti heqqide muhim söz qildi.

Bu hepte dunya Uyghur qurultiyi amérika paytexti washin'gtonda "Uyghur heptiliki" pa'aliyitini ötküzgen bolup, bu qétimliq ilmiy muhakime yighini buning muhim mezmunlirining biri iken.

Toluq bet