Heptilik xewerler (19-iyuldin 25-iyulghiche)

Erkin asiya radi'osi Uyghur bölümi heptilik xewerliri

Rabiye qadir xanim amérika hökümitini Uyghur köchmenliri mesilisini hel qilishta yétekchi rol oynashqa chaqirdi

Uyghur milliy herikiti rehbiri rabiye qadir xanim 24- iyul amérika hökümitining alaqidar xadimliri bilen uchriship, yéqinda amérika bilen xitay arisida ötküzülgen istratégiye we térrorluq témisidiki ikki qétimliq söhbetning Uyghurlargha alaqidar qismi heqqide melumat sorighan.

Rabiye xanim yene Uyghurlarning nöwettiki weziyiti heqqide melumat bergen we amérika terepni nöwette Uyghurlar üstidin échiliwatqan adaletsiz sotlarni yéqindin közitishke chaqirghan.

Rabiye xanim uchrishishta dunya miqyasidiki Uyghur köchmenliri mesilisini nuqtiliq otturigha qoyup, amérikini bu mesilide yétekchilik qilishqa dewet qilghan.

Abduweli ayup qatarliq ücheylenning yéqinda ürümchide sotlan'ghanliqi melum

Igilishimizche, “Ana til xelq'ara cheklik shirkiti” ning qurghuchiliridin abduweli ayup, muhemmet sidiq we dilyar obul qatarliq ücheylen 11-iyul ürümchi tengritagh rayonluq sot mehkimiside sotlan'ghan.

Ulargha “Qanunsiz meblegh toplash” qatarliq jinayetler artilghan bolsimu, höküm élan qilinmighan.

Melum bolushiche, sot jeryanida ulargha özini aqlash yaki könglidiki sözlirini köpchilikke déyish pursiti bérilmigen.

Halbuki, bu qétimliq sotta abduweli ayup qatarliq ücheylen'ge axirqi jaza hökümi élan qilinmighan, belki hökümning 15 kün ichide a'ilisidikilerge uqturulidighanliqi bildürülgen.

Abduweli ayup qatarliqlar ötken yili 20-awghust tutqun qilin'ghan idi. Shundin buyan ularning qeyerge qamalghanliqi, salametlik ehwali hemde mezkur déloning ishlinish jeryani jama'ettin sir tutulghan.

Kelpinde merhum abdulbasitning naheq ölümige chidimay namayish qilghan Uyghur déhqanlirigha yépiq sot échilghan

Igilishimizche, yéqinda kelpin nahiyiside 17 neper Uyghur tutqun'gha yépiq sot échilip, ulargha 6 aydin 7 yilghiche muddetlik qamaq jazasi höküm qilin'ghan.

Yépiq sot échilghan mezkur Uyghurlar bu yil aprél kelpin nahiye bazirida qizil chiraghdin ötüp ketkenliki seweblik étiwétilgen abdulbasitning naheq ölümige chidimay namayishqa chiqqan kishilerdin iken.

Merhum abdulbasitning anisi aminemning bildürüshiche, yépiq sot échilghan 17 neper tutqunning ikkisige 7 yilliq, ikkisige 6 yilliq, üchige 4 yilliq, töteylen'ge 3 yilliq, qalghanlargha 6 aydin 2 yilghiche muddetlik qamaq jazasi bérilgen.

Sotlan'ghuchilarning adwokat tutup özlirini aqlishigha purset bérilmigen.

Eyni chaghda bu naheqchilikke chidimighan abdulbasitning uruq-tughqanliri we yurt jama'iti méyitni kötürüp namayish qilghan. Da'iriler weqeni del waqtida adilliq bilen bir terep qilmay, eksiche namayishchilarni basturghan we kolléktip tutqun qilghan idi.

Terawihda adem tutqan sékrétar éghir yarilanduruldi, ayali öltürüldi

Xotenning qaraqash nahiyesidiki terawihda adem tutqan bir kent sékrétar éghir yarilandurulghan, ayali öltürülgen.

Melum bolushiche, qaraqash nahiyisi purchaqchi yéza ayaq purchaqchi kentining sékrétari rejep islam, mushu ayning 19-küni terawih namizi waqtida meschitke üsüp kirip qara tizimliktiki 6 neper gumandarni bashlap achiqip, meschitni qorshaw alghan saqchi we eskerlerge tapshurup bergen.

Shu qétimliq terawihdin 4 sa'etche waqit ötkende rejep islam a'ilisi hujumgha uchrighan.

Namelum 5 adem rejep islamning qorusigha bésip kirip awwal zeynepxan'gha, arqidin rejep islamgha pichaqliq hujum qilghan. Hujumda zeynepxan neq meydanda ölgen.

Nöwette da'iriler bu weqege chétishliq 5 gumandarni tutush herikitige ötken, rejep islam jiddiy qutquzushqa élin'ghan.

Myunxén sehniside Uyghurlarning sen'et nomurliri alqishqa érishti

20-Iyul gérmaniyening myunxén sheher merkizide ötküzülgen her millet xelqining sen'et körikide Uyghur heweskarliri orunlighan nomurlar tamashibinlarning alqishigha érishken.

Körekni myunxén sheherlik chet'ellikler mejlisi orunlashturghan.

Uyghur heweskarliri orunlan'ghan Uyghur usulliri, meshrep we Uyghur chöcheklirini asas qilghan nomurlar pa'aliyetke ishtirak qilghan her millet kishilirining zoqini keltürgen.

Uzun yillardin buyan gérmaniyede Uyghur sen'iti we medeniyiti boyiche tetqiqat we pa'aliyetler bilen shughullinip kelgen nurnisa xanim tamashibinlarning alqishidin köp memnun bolghanliqini bildürdi.

Qaramay shehiride öyi chiqiwétilgen Uyghurlar xitay saqchiliri bilen toqunushti

Qaramay shehiride öyi chéqilip kochida qalghan Uyghurlar özlirini kochidinmu qoghlashqa kelgen xitay xadimliri bilen toqunushqan we ularning teleplirige qoshulmighan.

Da'iriler 17-iyul qaramay shehirining sirtida Uyghur élining her qaysi jayliridin kélip olturaqlashqan we yurt shekillendürüp térichilik qiliwatqan 10 nechche a'ililik Uyghurning öy-makanlirini mejburiy chéqiwetkenidi. Netijide 40 tin artuq Uyghur ramzan aylirida baridighan yéri yoq kochida qalghan we kelgen yurtigha kétishke mejburlan'ghan idi.

18-Chésla etigende qaramay sheherlik hökümet saqchi we munasiwetlik xadimlarni bashlap, öyi chéqilip kochida qalghan Uyghurlarni tarqilip kétishke mejburlighan.

Emma Uyghurlardin ayallar, balilar sepning aldigha chiqip xitay saqchiliri bilen qarshilashqan. Birlikte qarshiliq körsitish netijiside xitay saqchiliri keynige chékin'gen we neq meydanda tutqin qilishqa amalsiz qalghan.