Heptilik xewerler (22-iyuldin 28-iyulghiche)

Muxbirimiz qutlan
2017-07-28
Share
erkin-asiya-radiosi-yengi.jpg Erkin asiya radi'osi Uyghur bölümi heptilik xewerliri
Photo: RFA

Xoten wilayetlik ma'arip da'iriliri bashlan'ghuch, ottura mekteplerde Uyghur tilining cheklinidighanliqini étirap qildi

Aldinqi küni ijtima'iy taratqularda xoten wilayetlik ma'arip idarisi tarqatqan bir höjjet ashkara bolghan idi.

Höjjette bu yil 9-aydin bashlap, xoten wilayitidiki bashlan'ghuch we ottura mekteplerde barliq derslerning birdek xitay tilida ötülidighanliqi, ma'arip sistémisida Uyghur tilini ishlitishning birdek cheklinidighanliqi alahide tekitlen'gen.

Xoten wilayetlik ma'arip idarisi bilen xoten wilayitige qarashliq xoten nahiyesi, lop nahiyesi, chira nahiyesi we qaraqash nahiyelirining ma'arip idariliri radiyomiz ziyaritini qobul qilip, mezkur höjjetning rastliqini delillidi.

Dunya Uyghur qurultiyining bash katipi dolqun eysa rimda italiye saqchilirining waqitliq tutqun qilishigha duch kelgen

Xitay hökümiti yillardin buyan özining soda we iqtisadiy jehettiki xelq'ara munasiwitige tayinip, muhajirettiki Uyghur pa'aliyetchilerning herikitini chekleshke urunup kelgen idi.

Dunya Uyghur qurultiyining bash katipi dolqun eysa ependi 26-iyul küni italiye yuqiri palatasida ötküzülgen Uyghurlar heqqidiki guwahliq bérish yighinigha qatnishish üchün rimgha yétip barghinida italiye saqchilirining waqitliq tutqunigha duch kelgen.

Dolqun eysaning radiyomizgha bildürüshiche, italiye saqchiliri xitayning bésimi bilen uni 3 yérim sa'et tutup turghan. Axirida gérmaniye hökümiti we xelq'ara jem'iyetning bésimi bilen uni qoyup bergen.

Misirda Uyghur oqughuchilarni tutqun qilish herikitige xitay saqchiliriningmu qatnashqanliqi melum boldi

Misirda dawamlishiwatqan Uyghur oqughuchilarni tutqun qilish opératsiyesige xitay saqchiliriningmu qatnashqanliqi melum bolmaqta.

Misirda qéchip yürgen bir Uyghur oqughuchining ötken düshenbe küni radiyomizgha bildürüshiche, 23-iyul küni 4 neper xitay amanliq xadimi uning qahirediki ijare öyige kélip, uni tutmaqchi bolghan. Emma u ehwalni sézip qélip öyidin qéchip ketken.

Uning bildürüshiche, 4 neper xitay saqchisi ikki neper misir istighbarat xadimining hemrahliqida kelgen bolup, ular binagha bésip kirmekchi bolghanda derwaziwen teripidin tosup qélin'ghan.

Uyghur diyaridiki meschitlerge "Xitay kompartiyesini söyüsh" heqqide lozunka ésilmaqtiken

Xitay hökümitining Uyghur diyaridiki meschitlerni kontrol qilish derijisi yéqindin buyan barghanséri kücheygen.

Igilinishiche, Uyghur élidiki meschit-jamelerning peshtaq we munarlirigha "Junggoni söyüsh, kompartiyeni söyüsh" dégendek lozunkilar ésilishqa bashlimaqtiken.

Radiyomizning qaghiliq nahiyesidin ehwal igilishiche, qaghiliqtiki chong-kichik jamelerning hemmisige "Qizil lozunka" ésilip, meschit jama'iti xitayning dölet bayriqini chiqirishqa we kompartiyeni medhiyelep naxsha oqushqa mejburlanmaqtiken.

Uyghur perzentlirining musulmanche isimlirini özgertish heqqidiki belgilime emeliylishishke bashlighan

Xitay kompartiyesining Uyghur élidiki organ géziti bolghan "Shinjang géziti" ning 21-iyuldiki sanida 6 neper Uyghur perzentining musulmanche isimlirini özgertish heqqidiki mexsus élani bésilghan.

Mezkur élanda arafat, muslime nur'islam, ababekri, muhemmed'imin we shehidem qatarliq 6 neper Uyghur qiz, oghulning isimliri resmiy özgertilgenliki élan qilin'ghan.

Xitay hökümitining Uyghur élidiki islamiy tüsi qoyuq bolghan bir qisim musulmanche isimlarni cheklesh heqqidiki belgilimisining resmiy ijra qilinishqa bashlighanliqi közetküchilerning küchlük diqqitini qozghimaqta.

Yopurgha nahiyeside yétim-yésirlargha pul toplighan abdukérim abdughéni we uning dostliri qamalghan

Igilinishiche 2014‏-yili yopurgha nahiyeside yétim-yésirlar üchün i'ane toplighan abdukérim abdughéni we uning 20 nechche dosti késiwetilgen iken.

Radiyomizgha kelgen uchurlardin melum bolushiche, ötken ayda da'irilerning mezkur délogha baghlap yene 7 neper kishini tutqun qilghanliqi ashkarilandi.

Yopurgha nahiyesining siyék yéziliq saqchixana xadimliri bu heqte radiyomiz ziyaritini qobul qilip, 2014-yili "Abdukérim guruhi" dep nam bérilip késiwétilgen Uyghur yashliri bilen ötken ayda yene tutqun qilin'ghan 7 neper gumandar heqqide melumat berdi.

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet