Heptilik xewerler (25-iyuldin 31-iyulghiche)

Muxbirimiz jüme
2015.07.31
Share on WhatsApp
Share on WhatsApp
erkin-asiya-radiosi.jpg Erkin asiya radi'osi Uyghur bölümi heptilik xewerliri
Photo: RFA

Xotendiki mektep balilirining bu yilliq ramizan bilen yazliq tetilde duch kelgen qismetliri

Neq meydandin igiligen melumatlargha qarighanda, xotendiki mektep baliliri bu yilliq ramizan bilen yazliq tetilni réjim ichide ötküzgen.

Nam-sheripini ashkarilashni xalimaydighan lop nahiyelik ma'arip sahesidiki melum kadirning éytishiche, bu yilliq ramizan mezgilide xotendiki barliq ottura-bashlan'ghuch mektep oqutquchi-oqughuchilirigha bir tutash tamaq bérilgen. Mezkur kadirning bayanlirigha qarighanda, oqughuchilar hazir yazliq tetilge qoyup bérilgen bolsimu, lékin her heptining jüme küni mejburiy halda mektepke yighiwélinidiken we ulargha wetenperwerlik terbiyesi élip bérilidiken.

Xitay da'iriliri bu xil charilerni Uyghur élining bashqa jayliridimu dawamlashturup kelgen idi.

Erdoghan, shi uchrishishida sherqiy türkistan mesilisimu otturigha qoyulghan

Türkiye prézidénti rejep tayyip erdoghan bilen xitay dölet re'isi shi jinpingning uchrishishida sherqiy türkistan mesilisiningmu otturigha qoyulghanliqi melum.
Bu sözlerni 30-iyul béyjingda muxbirlarni kütüwalghan türkiye prézidénti ishxanisi bayanatchisi ibrahim qalin ependi ashkarilidi.

U mundaq dédi: “Üchinchi bolup, sherqiy türkistan mesilisi toghrisida muzakire boldi. Bu heqte dölet re'isimiz türkiyede bergen bayanatini qayta tekitlidi.”
Türkiye prézidénti rejep tayyp erdughan türkiyede xitayning Uyghur siyasitige qarishi ghezep-nepret ewjide chiqqan mezgilde bu nöwetlik xitay ziyaritini bashlighan idi.

Wiskansin uniwérsitétida tesis qilin'ghan yazliq Uyghur tili kursida oqughuchi köpeygen

Uyghur mesilisining dunyawilishishi shundaqla amérika metbu'atlirida Uyghurlar heqqidiki xewer we melumatlarning köpiyishige egiship, Uyghur tili öginidighan amérikiliqlarmu köpiyishke bashlighan.

Melum bolushiche, amérikining wiskansin uniwérsitétida tesis qilin'ghan ottura asiya türkiy tilliri programmisining Uyghur tili kursigha tizimlatqan amérikiliq oqughuchilar bashqa türkiy tillirigha qarighanda köp sanni teshkil qilghan.

Mezkur programmida özige “Arslan” dégen Uyghurche isim qoyup Uyghur tili öginiwatqan amérikiliq aliy mektep oqughuchisi özining orégon uniwérsitétidin kelgenlikini, Uyghur tilini dawamliq öginish arzusi barliqini bildürdi.

Bu nöwetlik kursqa hetta téksas shtatidinmu oqughuchilar kélip qatnashqan.

Yeken qirghinchiliqining bir yilliqi munasiwiti bilen xitaygha qarshi namayishlar ötküzüldi

28-Iyul yeken qirghinchiliqining bir yilliqi munasiwiti bilen washin'gton, myunxén we enqerediki xitay elchixaniliri aldida xitaygha qarishi namayishlar ötküzüldi we ötken yili xitay amanliq küchlirining qolda öltürülgen Uyghurlarning rohigha atal du'a tilawetler qilindi.

Bu qétimqi namayishlar dunya Uyghur qurultiyining chaqiriqigha asasen teshkillen'gen bolup, amérika paytexti washin'gtonda ötküzülgen namayishqa dunya Uyghur qurultiyi re'isi rabiye qadir xanim özi yétekchilik qildi.

Rabiye xanim namayishchilarni mezkur qirghinchiliqta öltürülgen Uyghurlarni untup qalmasliqqa we xitayni Uyghurlarni zorawanliqqa mejburlimasliqqa chaqirdi.
2014-Yili 28-iyul xitay qoralliq küchliri yekenning élishqu yézisida namayishchi ammini oqqa tutup nurghun ademni öltürgen idi.

Xitay da'iriliri mezkur weqede 60 qa yéqin atalmish térrorchining étip öltürülgenlikini bildürgen bolsimu, yerlik Uyghurlar bu küni öltürülgenler sanining xitay éytqandin nechche hesse köp ikenlikini bildürüshken idi.

Türkiyede bashlan'ghan imza toplash herikitige 30 ming adem awaz qoshti

Bu yil 6-ayning 22-küni türkiyede bashlan'ghan “Anglang bizning peryadimizni” mawzuluq imza toplash herikitige awaz qoshquchilar sanining 30 minggha yetkenliki melum.

Dunya türkistanliqlar jem'iyiti re'isi abdullah aqyol ependining éytishiche, bu qétimqi imza toplash pa'aliyitige türk xelqining qiziqishi bek yuqiri bolghan, hazirghiche herqaysi siyasiy partiyelerning rehberliri, parlamént ezaliri, ammiwi teshkilatlarning mes'ullirimu awaz qoshqan.

Abdullah aqyol ependi, bu imza yighish pa'aliyetni xitayning Uyghurlargha élip bériwatqan bésim siyasitini toxtitish meqsitide teshkilligenlikini bildürdi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.