Һәптилик хәвәрләр (18-авғусттин 24-авғустқичә)

Мухбиримиз әзиз
2018-08-24
Елхәт
Пикир
Share
Принт
Әркин асия радиоси уйғур бөлүми һәптилик хәвәрлири
Әркин асия радиоси уйғур бөлүми һәптилик хәвәрлири
Photo: RFA

Уйғур дияридики лагерлар үзлүксиз кеңәймәктә

Йеқиндин буян мәлум болуватқан рәсимлик учурлар вә сүний һәмраһтин тартилған тәкшилик хәритиси уйғурлар дияридики лагерларниң сан вә көләм җәһәттә тездин ешип бериватқанлиқини ашкара қилмақта.

Финландийәдики муһаҗир халмурат уйғурниң билдүрүшичә, турпанниң өзидә бирнәччә йеңи лагер пәйда болған. Бу лагерлар шәһәрдин йирақ болған пинһан җайларға селинған болуп, бу районға сирттикиләрниң кириши мәни қилинған.

Мухбиримизниң бу тоғрилиқ әһвал игилиши җәрянида онсу наһийәсидә төт орунда лагер қурулғанлиқи, бу лагерларда 30 миңчә кишиниң «тәрбийәләш» тә икәнлики мәлум болди.

Тоқсу наһийәсидә лагерға қамалғанлар аһалиниң он пирсәнтидин ешип кәткән

Йеқинда мәлум болушқа башлиған «йәрликтики он пирсәнт нопусниң лагерларға қамилиши» һәққидики мәлуматларниң растлиқи йәнә бир қетим дәлилләнди.

Мухбиримизниң тоқсу наһийәси тәвәсидин әһвал игилиши җәрянида мәзкур наһийә тәвәсидә үч лагерниң барлиқи, бу җайларда 22 миң уйғурниң «тәрбийә» еливатқанлиқи мәлум болди.

Мәлум болушичә, бу наһийәниң йеза игилик-банкиси саһәсидә хизмәт қилидиған җәмий 154 нәпәр банка хадимниң барлиқи, булардин 17 нәпириниң йиғивелиш лагериға қамалғанлиқи ашкариланди.

Уйғур сақчи әмәлдари «террорчилар билән һәмкарлашқан» дәп әйибләнди

Хитай һөкүмити иҗра қиливатқан сиясий бастуруш җәрянида уйғур сәрхиллириниң көпләп қолға елиниши мәлум болған иди. Йеқинда хитай һөкүмитиниң қанун системисидики уйғур әмәлдарларниму қаттиқ тәқибгә еливатқанлиқи ашкара болди.

Хитай ахбаратлиридин мәлум болушичә, чәрчән наһийәлик җамаәт хәвпсизлики идарисиниң сабиқ сиясий комиссари ғалип турсунға «террорчилар вә үч хил күчләргә янтаяқ болған шуниңдәк миллий өчмәнликни тәрғиб қилған» дегәндәк җинайәтләр артилған.

Игилишимизчә, ғалип турсун уйғур дияридики «икки йүзлимичиләргә зәрбә бериш» һәрикити башланғандин буян җамаәт хәвпсизлик саһәсидә «икки йүзлимичилик» билән әйибләнгән әң юқири дәриҗилик кадир икән.

Лагердики уйғурларниң уруқ-туғқанлири еғир соруқчилиқ тартмақта

Лагерларға қамалған уйғурларниң көпийишигә әгишип, бу уйғурларниң уруқ-туғқанлири аилә бойичә бир-биридин җуда болушқа охшаш еғир паҗиәләргә гириптар болуватқанлиқи мәлум болди.

Бу һәқтики гуваһчилар алақидар әһваллардин мәлумат берип, лагерларға қамалған пәрзәнтлири яки ата-анисидин һечқандақ хәвәр елиш имканийитиниң болмайватқанлиқини билдүрди.

Мәлум болушичә, бу хилдики аилиләрниң гуваһлиқ материяллири хәлқарада хитай һөкүмитигә бесим пәйда қилишта муһим әһмийәткә игә болуп, д у қ изчил һәрқайси җайлардики уйғур җамаитидин мушу һәқтики дәлил-испатлар билән тәмин етишни тәләп қилип кәлмәктә икән.

Уйғур җәмийити дуч келиватқан бастуруш ғәрб дунясида күчлүк диққәт қозғимақта

Хитай һөкүмити өзлириниң уйғурлар дияридики бастуруш һәрикәтлирини изчил ақлап кәлгән болсиму, ғәрб дунясидики ахбарат васитилири вә һөкүмәтлири бу әһвалниң йеқинқи тәрәққиятиға зор дәриҗидә диққәт қилип кәлмәктә.

Өткән һәптидин башлап ғәрб дунясидики әң нопузлуқ гезит-журналларда вә телевизийә қаналлирида уйғурлар һазир дуч келиватқан реаллиқ тәпсилий хәвәр қилинип «уйғурлар 2-дуня уруши мәзгилидики йәһудийларниң тәқдиригә дуч келиш алдида турмақта,» дегәндәк йәкүнләр оттуриға чиқмақта.

Бир қисим анализчилар хитай һөкүмитиниң уйғурларға қиливатқан зулумлириға ислам дөләтлириниң сүкүт қилишиға нисбәтән бу йүзлинишни зор иҗабийлиқ, дәп баһалимақта.

Муһаҗирәттики уйғурлар қурбан һейт намизида вәтәндики зулум қурбанлириға дуалар қилди

Пүткүл уйғур җәмийити еғир сиясий кризисқа гириптар болуватқан бир пәйттә йетип кәлгән бу йилқи қурбан һейт намизида муһаҗирәттә яшаватқан уйғур җамаити вәтәндики барлиқ уйғурларға өзлириниң сәмимий тиләклирини билдүрүп дуалар қилди.

Америка, түркийә вә оттура асия дөләтлиридики уйғур җамаити қурбан һейтлиқ намаз үчүн җәм болғанда вәтәндики зулумниң ахирлишиши үчүн бирликтә дуа қилди.

Һәрқайси җайлардики диний затлар өз тәблиғлиридә уйғур җамаитини һечқачан азадлиқ вә һөрлүккә еришиштин үмидини үзмәсликкә чақирди шундақла зулумниң һаман ахирлишидиғанлиқини тәкитлиди.

Толуқ бәт