Heptilik xewerler (22-öktebirdin 28-öktebirgiche)

Muxbirimiz qutlan
2016-10-28
Élxet
Pikir
Share
Print
Erkin asiya radi'osi Uyghur bölümi heptilik xewerliri
Erkin asiya radi'osi Uyghur bölümi heptilik xewerliri
Photo: RFA

Dunya Uyghur qurultiyi xitay hökümitining Uyghur élidiki pasport yighish herikitige qarita bayanat élan qildi

Dunya Uyghur qurultiyi ötken jüme küni bayanat élan qilip, xitayning Uyghur élida bashlighan pasport yighiwélish herikitini eyiblidi we buningdin endishe qiliwatqanliqini bildürdi.

Igilinishiche, yéqinda Uyghur élining herqaysi jayliridiki saqchixanilar ahalilerning pasportlirini yighiwélish heqqide uqturush tarqatqan. Halbuki, da'iriler hazirgha qeder pasport yighiwélishning sewebi heqqide qayil qilarliq chüshenche bermigen.

Dunya Uyghur qurultiyining bu heqtiki bayanatida pasport yighiwélish herikiti qarimaqqa barliq ahalilerge qaritilghandek qilsimu, emma da'irilerning buni nuqtiliq halda Uyghurlarning sayahet erkinlikige cheklime qoyushtiki bir usul qiliwélishidin endishe qiliwatqanliqi bildürülgen.

Ürümchide "Halal choshqa yéghi" mehsulatini torda ashkarilighan ikki Uyghur yash qolgha élin'ghan

Yéqinda ürümchide 18 we 19 yashlardiki ikki Uyghur yashning da'iriler teripidin qolgha élin'ghanliqi melum bolmaqta.

Uyghur teshkilatlirining ashkarilishiche, bu ikki neper Uyghur yash "Halal choshqa yéghi" mehsulatini torgha chiqirip ashkarilighanliqi üchün qolgha élin'ghan iken.

Igilinishiche, ürümchi shehiri saybagh rayonluq da'iriler ularni "Milletler ittipaqliqigha ziyanliq uchurlar"ni tarqatqan, dep qolgha alghanliqi melum. Amérika Uyghur birleshmisining re'isi ilshat hesen ependi bu heqte inkas qayturup, da'irilerning Uyghur élida yürgüzüwatqan uchur erkinlikini cheklesh siyasitini eyiblidi.

Moskwada xelq'araliq Uyghur tetqiqati ilmiy muhakime yighini ötküzüldi

10-Ayning 23-künidin 26-künigiche rusiye paytexti moskwada xelq'araliq Uyghur tetqiqati ilmiy muhakime yighini ötküzülgen.

Mezkur yighinda amérika, rusiye, gérmaniye, hindistan we türkiye qatarliq döletlerdin kelgen 53 neper tetqiqatchi özlirining Uyghurshunasliq boyiche teyyarlighan ilmiy maqalilirini oqup ötken. Yighin jeryanida qirghizistanliq Uyghur ressam sabiqjan babajanof bilen qazaqistanliq Uyghur ressam güzel abbas qizining resimliri körgezme qilin'ghan. Yighin jeryanida qazaqistan Uyghur sen'et ömiki mexsus oyun körsetken.

Yighin qatnashchiliridin doktor alimjan hemrahyéf bilen doktor memtimin ela bu qétimliq Uyghur tetqiqati ilmiy muhakime yighini heqqide toxtilip, uning Uyghurshunasliq boyiche xelq'aradiki muhim bir köznek bolghanliqini ilgiri sürdi.

Qirghizistandiki xitay elchixanisini partlitishqa ishletken oq-dorini qirghiz herbiy we saqchilirining satqanliqi melum bolmaqta

Bu yil 30-awghust küni xitayning qirghizistanda turushluq elchixanisi aptomobilliq bomba hujumigha uchrap, weqede hujumchining ölgenliki, az dégende 3 ademning yarilan'ghanliqi ilgiri sürülgen idi.

Qirghizistan taratquliri mezkur hujumni tajikistan pasportluq bir Uyghurning ijra qilghanliqini, hujum herikitini süriyediki sherqiy türkistan qoralliq ghazatchi guruhining pilanlighanliqini bildürgen idi.

Halbuki, yéqinda qirghizistan axbaratining ashkarilishiche, bishkektiki xitay elchixanisini partlitishqa ishletken oq-dorini qirghiz herbiy, saqchilirining teminligenliki melum bolmaqta. Qirghizistandiki Uyghur jama'iti bu heqte radiyomizgha inkas qayturup, bu heqtiki bezi tepsilatlarni ashkara qildi.

Merhum küresh kösen wapatining 10-yilida zamandashlirining xatiriside yad étildi

Küresh kösen Uyghur xelqining munewwer perzenti. Uning waqitsiz ölümi muhajirettiki Uyghur jama'itige zor yoqitishni hés qildurghan bolsimu, emma xuddi uning "Küresh ölmeydu" namliq naxshisida qeyt qilin'ghinidek uning küresh rohi ölmidi.

Küresh kösen buningdin 10 yil ilgiri, yeni 2006-yili 10-ayning 29-küni shiwétsiyede 47 yéshida alemdin ötti. U özining qisqighine hayatida bir tereptin yangraq awazi we jushqun naxsha-muzikiliri bilen Uyghur xelqining yürek tarini chekken bolsa, yene bir tereptin weten dewasi yolidiki harmas küreshliri bilen Uyghur xelqining iradisini eks ettürdi.

Merhumning wapatigha 10 yil tolghan bügünki künde muhajirettiki Uyghur jama'iti uni chongqur séghinish bilen yad etti.

Tokyoda "Xitaydiki atom tehditi" namliq muhakime yighini ötküzülgen

16-Öktebir küni yaponiye paytexti tokyoda sherqiy türkistan sürgün hökümitining pilanlishi bilen "Xitaydiki atom tehditi" namliq muhakime yighini ötküzülgen.

Yighin'gha yaponiye Uyghur jem'iyiti, yaponiye Uyghur birliki, asiya erkinlik we démokratiye hemkarliq kéngishi we yapon qurultiyi qatarliq teshkilatlarning wekilliri we atom mesililirige qiziqidighan her sahediki yaponiyelikler qatnashqan.

Yighinda sherqiy türkistan sürgün hökümitining prézidénti exmetjan osman sürgün hökümiti namidin xitayning 1964-yili 16-öktebir küni tarim oymanliqida tunji atom bombisini partlatqan künini "Sherqiy türkistan xelqining musibet künliridin biri " dep bilish qatarliq üch türlük qarar élan qilghan. Yighinda yene enwer toxti, mijit hüseyinof qatarliq mutexessisler mexsus témilar boyiche doklat bergen.

Toluq bet