Һәптилик хәвәрләр (2-ноябирдин 8-ноябирғичә)

Мухбиримиз әзиз
2019-11-08
Елхәт
Пикир
Share
Принт
Қағилиқ наһийилик қатнаш сақчилири тарқатқан, өзлириниң йолда езип қалған 3 балини аилисигә тапшуруп бәргәнликини һәққидики видейолуқ хәвәр.
Қағилиқ наһийилик қатнаш сақчилири тарқатқан, өзлириниң йолда езип қалған 3 балини аилисигә тапшуруп бәргәнликини һәққидики видейолуқ хәвәр.
Social Media

«Қизил төгә» ширкитиниң директори абдувәли абдусәмәт тутқун қилинған

Уйғур дияридики һәммигә мәлумлуқ «қизил төгә бйо-техника ширкити» ниң баш директори абдувәли абдусәмәтниң 2018-йилидин буян тутқунда икәнлики ашкариланди. 

«Қизил төгә» ширкити асаслиқи һалал мәһсулатларни ишләпчиқириш вә сетиш билән ронақ тапқан болуп, уйғур дияриниң һәрқайси җайлирида йүз нәччә топ сетиш орни вә он миңдин көпрәк парчә сетиш нуқтиси ачқан икән. 

Мәлум болушичә, илгири абдувәлиниң нөлдин башлап игилик тикләш роһи һәмдә хәйри-сахавәт ишлириға көпләп пул сәрп қилиши һәрқайси ахбарат вастилиридә көпләп тәшвиқ қилинған икән.

Хитай һөкүмитиниң лагерлардики сахта «сәһнә оюнлири» ашкариланди

Хәлқараниң лагерлар һәққидики бесимлири сәвәбидин хитай һөкүмити өзи билән йеқин мунасивәттики бир қисим дөләтләрниң дипломатлири вә мухбирлирини лагер зияритигә уюштурған иди. Йеқинда хитайниң бу екискурсийә өмәклиригә лагерларда сахта «сәһнә» тәйярлиған қилмишлири ашкара болди. 

Әнә шу хил сахтипәзликләрни өз көзи билән көргән шаһидлардин зумрәт давут өз мәһәллисидики аһалә комитетиниң бу хил ялғанчилиқни қандақ тәшкиллигәнликини паш қилди. 

Мәлум болушичә, чәтәл екискурсийәчилири үчүн сахта «сәһнә» болған үрүмчидики «көктерәк» мәсчитиниң имами өмәр рәҗәб 2017-йили қолға елинғандин буян мәзкур мәсчит тақап қоюлған икән. 

Уйғур дияри хитайдики әң чоң чошқа бақмичилиқ райониға айландурулмақчи

Хитай ахбаратлириниң хәвәр қилишичә, йеқинда уйғур диярини хитай бойичә әң чоң чошқа бақмичилиқ райониға өзгәртиш һәққидә җиддий музакириләр болған. 

Үрүмчидә ечилған «чошқа бақмичилиқ игиликиниң типини өзгәртип, униң дәриҗисини техиму өстүрүш» темисидики мәхсус йиғинда уйғур аптоном районлуқ һөкүмәтниң рәиси шөһрәт закир буниң «зор реал әһмийәткә игә» икәнликини тәкитлигән.

Хитай һөкүмити уйғур диярида «әсәбийликкә вә терорлуққа қарши туруш» намида уйғурларниң ислам дини билән бағлинишлиқ барлиқ паалийәтлирини чәклигән һәмдә уларни чошқа гөши йейишкә мәҗбурлаватқан иди. Әмдиликтә бундақ бир йиғинниң ечилиши анализчиларниң күчлүк диққитини қозғиди.

Америка ташқий ишлар министирлиқи уйғурлар һәққидә күчлүк баянат елан қилди

Америка сиясйонлиридин марко рубию йеқинда уйғурлар учраватқан зулумға қарита дуняни орнидин дәс турушқа чақирған иди. 1-Ноябир күни америка ташқий ишлар министирлиқи терорлуқ һәққидики йиллиқ доклатни елан қилип, «хитайниң терорлуққа қарши туруш һәркити уйғур миллитини нишан қилған» дәп көрсәтти. 

Америка ташқий ишлар министири майк помпейому буниңға улапла баянат елан қилип, хитайниң уйғур паалийәтчиләр вә лагер шаһидлириниң аилисигә зиянкәшлик қилиш қилмишини қаттиқ әйиблиди.

Ташқий ишлар министири майк помпейониң баянатида зумрәт давут қатарлиқ шаһидларниң уруқ-туғқанлириниң өлүп кетишигә хитай һөкүмитиниң сәвәбчи болуватқанлиқи кәскин тәнқидләнди. Шундақла у өзиниң мәрһум давут абдурахман һаҗимниң вапатиға қайғурғанлиқини алаһидә ипадилиди. 

Езип қалған балиларниң лагер оқутқучилириниң пәрзәнтлири икәнлики ашкариланди

Өткән һәптә қағилиқ наһийәлик қатнаш сақчилири бир видейолуқ уқтуруш тарқитип, өзлириниң йолда езип қалған үч балини аилисигә тапшуруп бәргәнликини хәвәр қилған иди. 

Мухбиримизниң бу әһвални ениқлашлири давамида бу үч балиниң ата-анисиниң қағилиқтики бир лагерда оқутқучи икәнлики ашкариланди. 

Лагерлар сәвәбидин ата-аниларниң пәрзәнтлиридин һәптиләп яки айлап җуда болуши һазир даимлиқ һадисигә айлинип қалған болуп, буниң көплигән еғир иҗтимаий мәсилиләргә сәвәб болуватқанлиқи кишиләрни зор әндишигә салмақта. 

«Вашингтон почтиси» гезити уйғурларниң йәһудийлар дуч кәлгән қисмәткә әйнән учраватқанлиқини тәкитлиди

Йеқинда «вашингтон почтиси» гезитидә елан қилинған «хитайда һәр күни хрустал кечиси йүз бериватиду» намлиқ мақалида уйғур дияридики сиясий бастурушниң әһвали әйни вақиттики йәһудийлар дуч кәлгән қисмәтниң тәкрарлиниши икәнлики йәнә бир қетим әскәртилди. 

«Хрустал кечиси» ибариси әйни вақитта германийәдики йәһудийлар омумиййүзлүк һуҗумға учриған һәмдә лагерларға қамилишқа башлиған күнни ипадиләйдиған болуп, аптор уйғурларниң һазир һәр күни мушу хилдики һуҗумға учраватқанлиқини алаһидә тәкитлиди.

Аптор бу арқилиқ һазир уйғурлар дуч келиватқан иҗтимаий паҗиәләрниң қайсий дәриҗидә җиддий икәнликини көрситип, һөкүмәтләрни бу мәсилидә җиддий тәдбир елишқа чақирди.

Толуқ бәт