Һәптилик хәвәрләр (21-ноябирдин 27-ноябирғичә)

Мухбиримиз қутлан
2015-11-27
Share
erkin-asiya-radiosi.jpg Әркин асия радиоси уйғур бөлүми һәптилик хәвәрлири
Photo: RFA

Уйғур көзәткүчиләр хитай қораллиқ күчлириниң байдики көмүркан һуҗумчилириға отчачар ишләткәнликигә қарши инкас билдүрди

Хитайда чиқидиған "азадлиқ армийә гезити" хитай қораллиқ күчлириниң байдики көмүркан һуҗумчилириға отчачар ишләткәнлики һәққидики хәвәрни ашкара қилғандин кейин хәлқарада күчлүк тәсир пәйда қилди.

Хәвәрдә дейилишичә, хитай қораллиқ күчлири гумандарлар йошурунған өңкүргә алди билән яш аққузуш бомбиси вә силкитип һошсизландуруш бомбиси атқан. Буму үнүм бәрмигәндә улар өңкүргә қаритип отчачар ишләткәнлики мәлум.

Америкидики уйғур көзәткүчиләрдин сиясий анализчи илшат һәсән билән адвокат нури түркәл бу һәқтә радиомиз зияритини қобул қилип, күчлүк инкас қайтурди.

Улар, хитай қораллиқ күчлириниң аяллар билән балиларни өз ичигә алған уйғур гумандарларға қарита отчачар қорал ишләткәнлики бүгүнки хәлқара қанун вә инсанийәтниң әхлақий мизанлирини аяқ-асти қилғанлиқ, дәп көрсәтти.

Гумидики реаллиқ даириләрниң "шинҗаңда мәҗбурий маарип пүтүнләй һәқсиз дәвригә қәдәм қойди" дегән баянатини рәт қилмақта

Уйғур аптоном районлуқ маарип назарити өткән һәптә хитай һөкүмәт таратқулирида баянат берип, "шинҗаңда мәҗбурий маарип пүтүнләй һәқсиз дәвргә қәдәм қойди" дегән.

Баянатта йезилардики мәҗбурий маарип капаләт түзүлмиси билән шәһәрләрдики оқуш парчә хираҗәт пулини кәчүрүм қилиш сияситиниң пүтүн аптоном районни қаплаш нишаниға йәткәнлики хәвәр қилинған.

Һалбуки, гума наһийәсиниң муҗи базириға қарашлиқ йеңибағ башланғуч мәктипидин игилигән учурлар юқири һөкүмәт тәшвиқатини рәт қилмақта.

Игилинишичә, мәзкур кәнттики мутләқ көп қисим ата-анилар бир йилниң 8 ейида яқа юртларда мәдикарчилиқ қилидикән. Ата-ана меһридин мәһрум қалған балилар тоюнуш вә кийим-кечики пүтүн болуштәк әң әқәллий һаләттин мустәсна һалда яшимақтикән.

Японийәниң хосо университетида уйғур мәдәнийити вә әдәбияти бойичә илмий муһакимә йиғини өткүзүлгән

Йеқинда японийәниң хосо университетида уйғур мәдәнийити вә әдәбияти бойичә илмий муһакимә йиғини өткүзүлгән.

Мәзкур илмий муһакимә йиғини уйғур һазирқи заман гуңга шеирийитиниң асасчиси, шаир әхмәтҗан османниң япон тилиға тәрҗимә қилинған 2‏-шеирлар топлиминиң нәшр қилинғанлиқи мунасивити билән уюштурулған.

Йиғинда уйғур һазирқи заман йеңи шеирийити, тарим археологийәси, уйғур киночилиқи, уйғур елидә ядро синақлириниң тәсири қатарлиқ темиларда доклатлар берилгән.

Японийәдики уйғур тәтқиқатчилири шаир әхмәтҗан османниң япончә нәшр қилинған 2-шеирлар топлими һәққидә тохтилип, японийәлик оқурмәнләрни әң җәлп қилған амил дәл әхмәтҗан шеирлиридики "инсанийәткә ортақ әркинлик чақириқи" дур, дәп көрсәтти.

Уйғур елидә тор сақчилириниң агаһландурушини тапшурувалған янфон ишләткүчиләр дәккә-дүккидә қалған

Өткән һәптә парижда йүз бәргән террорлуқ һуҗумидин кейин хитай тор сақчилириниң уйғур районидики әқлий иқтидарлиқ янфон вә интернет ишләткүчиләргә болған контроллуқиниң һәссиләп күчәйгәнлики мәлум.

Уйғур районидин игилигән нәқ мәйдан учурлиридин мәлум болушичә, хитай һөкүмити өткән һәптидин буян уйғур елиниң һәрқайси җайлирида торға улинидиған янфонларни бирму-бир тинтишқа башлиған.

Тор сақчилири интернет сүзгүчидин пайдилинип гуманлиқ дәп қариған янфон номурлирини тақиған һәмдә телефон игилирини сақчихана яки көчмә телефон баш ширкитигә берип кимлик учурлирини қайта тизимға алдурушқа мәҗбур қилған.

"2-нөвәтлик хәлқаралиқ уйғуршунаслиқ йиғини" да уйғур тәтқиқати бойичә муһим темилар муһакимә қилинған

Америкидики җорҗ вашингтон университети билән бирюссел вә париждики бир қанчә университетниң һәмкарлиқида уюштурулған "2-нөвәтлик хәлқаралиқ уйғуршунаслиқ йиғини" 17-ноябирдин 20-ноябирғичә бирюссел һәм парижда өткүзүлгән.

Мәзкур муһакимә йиғинида америка, австралийә, русийә, түркийә, қазақистан вә явропа әллиридин кәлгән мутәхәссисләр уйғур тарихи, мәдәнийити, тил-әдәбияти вә сиясий-иҗтимаий мәсилилири бойичә мақалиләр оқуған.

Йиғинға қатнашқан тәтқиқатчилар радиомиз зияритини қобул қилип, бу қетимлиқ илмий муһакимә йиғининиң уйғуршунаслиқ бойичә йеңи вә көп тәрәплимилик темиларни оттуриға чиқарғанлиқини илгири сүрди.

Уйғур деһқанлар "давалиниш картиси" ниң дохтурханиларда ишлимәйватқанлиқидин шикайәт қилди

Уйғур елиниң деһқанчилиқ вә чарвичилиқ районлирида йолға қоюлуватқан давалиниш суғуртиси, йәни "һәмкарлишип давалиниш картиси" ниң әмили давалиниш җәрянида деһқан-чарвичиларға һәқиқий мәнидики суғурта ярдими елип келәлмигәнлики аян болмақта.

Мәлум болушичә, даириләр 2003-йилидин башлап деһқан-чарвичилар үчүн "һәмкарлишип давалиниш картиси" түзүмини йолға қойған.

Һалбуки, мәзкур сиясәт йолға қоюлуп он нәччә йилдин ашқан болсиму, лекин уйғур елиниң һәрқайси җайлиридин кәлгән инкаслардин қариғанда "давалиниш картиси" ниң деһқан-чарвичиларға һечқанчә әмәлий ярдәм елип келәлмигәнлики мәлум болмақта.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт