Һәптилик хәвәрләр (24-ноябирдин 30-ноябирғичә)

Мухбиримиз җүмә
2012-11-30
Елхәт
Пикир
Share
Принт

Уйғурлар қиз-аяллириниң ғурурини қоғдаш үчүн йәрлик хитайлар билән тоқунушқан

28-Ноябир хитайниң хенән өлкиси җенпиң наһийисидә сода қиливатқан уйғурлар қиз-аяллириниң ғурурини қоғдаш үчүн йәрлик хитайлар билән соқушқан.

Вәқә кейин намайишқа өзгәргән. Намайишни бесиқтурушқа миңдин артуқ хитай сақчиси әвәтилгән.

Вәқәниң тәпсилати мундақ болған: 28-ноябир бир хитай кочида кетиватқан бир уйғур аялниң йүзидики ромилини ечивәткән. Нәтиҗидә нәқ мәйдандики уйғурлар билән шу әтраптики хитайлар арисида маҗира келип чиққан.

Чүштин кейин болғанда мәзкур наһийидә тиҗарәт қиливатқан миңға йеқин уйғур вәқәгә наразилиқ билдүрүш үчүн наһийилик һөкүмәт бинасиға қарап йүрүш қилған. Нәтиҗидә хитай сақчилири билән уйғур намайишчилар арисида тоқунуш йүз берип, 50 дин артуқ уйғур яриланған, 3 сақчи аптомобили пачақлап ташланған.

Патигүл ғулам «пәләстин билән сүрийидики анилар мәндин бәхтлик икән»

«5-Июл вәқәси» дин буян йоқап кәткән оғлиниң дерикини алалмайватқан патигүл ғулам уйғур анилар пәләстинлик анилардинму бәхтсиз, деди.

У уйғур анилирини пәләстинлик аниларға селиштуруп мундақ деди: пәләстин вә сүрийидики анилар, уйғур анилиридин бәхтлик. Чүнки, улар балилириниң җәситигә игә болалайду, улар дуняға өзиниң йиғисини аңлиталайду....»

Патигүл ғуламниң оғли имаммәмәт 5-июлдин кейин тутуп кетилгиничә һазиғичә өйигә қайтмиған. Хитай сақчилири имаммәмәт һәққидә учур беришниң орниға патигүл ғуламға тәһдит салған иди.

Саламәт ханим: хитайларниң мәҗбурий маарипи балиларни талишиш көрүши

Бир сабиқ муәллим хитай һөкүмити уйғурларға қаратқан маарип сиясити вә буниң уйғур миллий мәвҗудийитигә көрситиватқан тәсири һәққидә тохтилип, хитайниң әмәлийәттә уйғур баллирини талишиш көрүши қиливатқанлиқини билдүрди.

Бу сөзләрни зияритимизни қобул қилған сабиқ оқутқучи саламәт ханим оттуриға қойди. Саламәт ханим йәнә, уйғур маарипчиларниңму өз миллитиниң кәлгүси болған өсмүрләрни талишишта җан пидалиқ көрситиш керәкликини билдүрди.

Саламәт ханим һазир голландийидә яшимақта.

Сәргәрдан уйғур өсмүрлири японийә мәтбуатлирида диққәт тартти

Хитай өлкилиридә зиянкәшликкә учриған уйғур сәргәрдан өсмүрләр һәққидики хәвәр японийә мәтбуатлирида диққәтни тартти.

Мәзкур мақалини оқуп, хитайдики сәргәрдан балилар җүмлидин уйғур өсмүрләр һәққидә пикир йүргүзгән мутәхәссисләр уйғур балилириниң әһвалидин толиму ечинғанлиқини билдүрди.

Японийә кагошима университетидики германийилик профессор балму әпәнди мәйли қандақла болсиму, балиларниң кәлгүсини вәйран қилишқа қарап турғили болмайдиғанлиқини билдүрди.

Бу хәвәрни оқуғандин кейинки һессиятини ипадилигән японийидики уйғур тәтқиқатчиси каори ханим бу хәвәрни көрүп қаттиқ азабланғанлиқни билдүрди.

Татар тарихчи мунир йерзин: уйғурлар дуня хәлқи алдида пәхирлинишкә һәқлиқ

Атақлиқ татар тарихчиси мунир йерзин бу йил нәшрдин чиққан китаби вә уйғурлар һәққидә язған мақалилири һәққидә тохтилип, уйғурлар дуня хәлқи алдида пәхирлинишкә һәқлиқ хәлқ, деди.

Алим мунир йерзин бу сөзләрни йәнә идиқут уйғур мәтбәәчилики һәққидә язған мақалисидиму оттуриға қойған иди.

Алимниң «әсирләр сири» намлиқ китабиға татарларниң тарихидин башқа, уйғурларниң мәдәнийәт тарихиға аит мәлуматларниму киргүзгән.

Мәлтәм арикан ханим: уйғурларға нисбәтән әң чоң хәтәр өз тили вә динидин йирақлишиш

Түркийидики даңлиқ телевизийә риясәтчиси мәлтәм ханим агаһландуруп, уйғурлар үчүн әң хәтәрлик болғини өз тили вә динидин йирақлишиш, дәп көрсәтти.

У бу сөзләрни радиомиз зияритини қобул қилғанда оттуриға қойди.

Мәлтәм арикан ханим түркийидики «9а телевизийә қанили» ниң риясәтчиси. У йәнә, уйғурларниң диний етиқадта чиң туруш, аилә тәрбийисини күчәйтиш қатарлиқ васитиләр билән хитай һөкүмити уйғур тили вә мәдәнийитини йоқитиш үчүн йүргүзүватқан сиясәтләргә қарши туруши керәкликини билдүрди.

Толуқ бәт