Heptilik xewerler (24-noyabirdin 30-noyabirghiche)

Muxbirimiz jüme
2012-11-30
Élxet
Pikir
Share
Print

Uyghurlar qiz-ayallirining ghururini qoghdash üchün yerlik xitaylar bilen toqunushqan

28-Noyabir xitayning xénen ölkisi jénping nahiyiside soda qiliwatqan Uyghurlar qiz-ayallirining ghururini qoghdash üchün yerlik xitaylar bilen soqushqan.

Weqe kéyin namayishqa özgergen. Namayishni bésiqturushqa mingdin artuq xitay saqchisi ewetilgen.

Weqening tepsilati mundaq bolghan: 28-noyabir bir xitay kochida kétiwatqan bir Uyghur ayalning yüzidiki romilini échiwetken. Netijide neq meydandiki Uyghurlar bilen shu etraptiki xitaylar arisida majira kélip chiqqan.

Chüshtin kéyin bolghanda mezkur nahiyide tijaret qiliwatqan minggha yéqin Uyghur weqege naraziliq bildürüsh üchün nahiyilik hökümet binasigha qarap yürüsh qilghan. Netijide xitay saqchiliri bilen Uyghur namayishchilar arisida toqunush yüz bérip, 50 din artuq Uyghur yarilan'ghan, 3 saqchi aptomobili pachaqlap tashlan'ghan.

Patigül ghulam "Pelestin bilen süriyidiki anilar mendin bextlik iken"

"5-Iyul weqesi" din buyan yoqap ketken oghlining dérikini alalmaywatqan patigül ghulam Uyghur anilar pelestinlik anilardinmu bextsiz, dédi.

U Uyghur anilirini pelestinlik anilargha sélishturup mundaq dédi: pelestin we süriyidiki anilar, Uyghur aniliridin bextlik. Chünki, ular balilirining jesitige ige bolalaydu, ular dunyagha özining yighisini anglitalaydu...."

Patigül ghulamning oghli imammemet 5-iyuldin kéyin tutup kétilginiche hazighiche öyige qaytmighan. Xitay saqchiliri imammemet heqqide uchur bérishning ornigha patigül ghulamgha tehdit salghan idi.

Salamet xanim: xitaylarning mejburiy ma'aripi balilarni talishish körüshi

Bir sabiq mu'ellim xitay hökümiti Uyghurlargha qaratqan ma'arip siyasiti we buning Uyghur milliy mewjudiyitige körsitiwatqan tesiri heqqide toxtilip, xitayning emeliyette Uyghur ballirini talishish körüshi qiliwatqanliqini bildürdi.

Bu sözlerni ziyaritimizni qobul qilghan sabiq oqutquchi salamet xanim otturigha qoydi. Salamet xanim yene, Uyghur ma'aripchilarningmu öz millitining kelgüsi bolghan ösmürlerni talishishta jan pidaliq körsitish kéreklikini bildürdi.

Salamet xanim hazir gollandiyide yashimaqta.

Sergerdan Uyghur ösmürliri yaponiye metbu'atlirida diqqet tartti

Xitay ölkiliride ziyankeshlikke uchrighan Uyghur sergerdan ösmürler heqqidiki xewer yaponiye metbu'atlirida diqqetni tartti.

Mezkur maqalini oqup, xitaydiki sergerdan balilar jümlidin Uyghur ösmürler heqqide pikir yürgüzgen mutexessisler Uyghur balilirining ehwalidin tolimu échin'ghanliqini bildürdi.

Yaponiye kagoshima uniwérsitétidiki gérmaniyilik proféssor balmu ependi meyli qandaqla bolsimu, balilarning kelgüsini weyran qilishqa qarap turghili bolmaydighanliqini bildürdi.

Bu xewerni oqughandin kéyinki héssiyatini ipadiligen yaponiyidiki Uyghur tetqiqatchisi ka'ori xanim bu xewerni körüp qattiq azablan'ghanliqni bildürdi.

Tatar tarixchi munir yérzin: Uyghurlar dunya xelqi aldida pexirlinishke heqliq

Ataqliq tatar tarixchisi munir yérzin bu yil neshrdin chiqqan kitabi we Uyghurlar heqqide yazghan maqaliliri heqqide toxtilip, Uyghurlar dunya xelqi aldida pexirlinishke heqliq xelq, dédi.

Alim munir yérzin bu sözlerni yene idiqut Uyghur metbe'echiliki heqqide yazghan maqalisidimu otturigha qoyghan idi.

Alimning "Esirler siri" namliq kitabigha tatarlarning tarixidin bashqa, Uyghurlarning medeniyet tarixigha a'it melumatlarnimu kirgüzgen.

Meltem arikan xanim: Uyghurlargha nisbeten eng chong xeter öz tili we dinidin yiraqlishish

Türkiyidiki dangliq téléwiziye riyasetchisi meltem xanim agahlandurup, Uyghurlar üchün eng xeterlik bolghini öz tili we dinidin yiraqlishish, dep körsetti.

U bu sözlerni radi'omiz ziyaritini qobul qilghanda otturigha qoydi.

Meltem arikan xanim türkiyidiki "9A téléwiziye qanili" ning riyasetchisi. U yene, Uyghurlarning diniy étiqadta ching turush, a'ile terbiyisini kücheytish qatarliq wasitiler bilen xitay hökümiti Uyghur tili we medeniyitini yoqitish üchün yürgüzüwatqan siyasetlerge qarshi turushi kéreklikini bildürdi.

Toluq bet