Heptilik xewerler (31-noyabirdin 6-dékabirghiche)

Muxbirimiz eziz
2019-12-06
Élxet
Pikir
Share
Print
"Uyghur 2019 namliq" qanun layihisi amérika dölet mejliside awazgha qoyuluwatqan körünüsh. 2019-Yili 3-dékabir, washin'gton.
"Uyghur 2019 namliq" qanun layihisi amérika dölet mejliside awazgha qoyuluwatqan körünüsh. 2019-Yili 3-dékabir, washin'gton.
house.gov

Amérika awam palatasi "Uyghur kishilik hoquq qanun layihesi" ni resmiy maqullidi

Amérika awam palatasi 3-dékabir küni 1 ge qarshi 407 awaz bilen "2019-Yilliq Uyghur kishilik hoquq qanun layihesi" ni maqullidi. Bir qisim palata ezaliri xitay hökümitining Uyghurlarni basturush tedbirliri heqqide öz qarashlirini otturigha qoyup "Xitay hazir Uyghurlarni bir millet süpitide yoq qilishni qestlimekte" dep körsetti. 

Mezkur qanun layihesining kem körülidighan mutleq üstünlük bilen maqullinishi amérika dölet mejlisidiki erbablarni hemde muhajirettiki Uyghurlarni bekmu söyündürdi. 

"Uyghur kishilik hoquq qanun layihesi" ning amérika awam palatasida toluq awaz bilen maqullinishi dunyadiki heqqaniyetni qollighuchi köpligen teshkilat we döletlerge küchlük ilham berdi. Shuning bilen birge xitay hökümiti buningdin qattiq perishan bolup, keng kölemlik "Amérikani tenqid qilish" herikitini qozghidi.

Xoten pédagogika aliy téxnikomining mudiri ababekri ablet tutqun qilin'ghan

Uyghur ziyaliliri muhim nishanlardin bolghan zor basturushta xoten pédagogika aliy téxnikomining mudiri ababekri abletning buningdin birer yilche ilgiri tutqun qilin'ghanliqi melum boldi. Bu heqtiki uchurlarda uning türmide ikenliki éytilghan bolsimu, buning konkrét sewebi namelum. 

Ababekri ablet tarix penliri boyiche mutexessis bolup, köp qétim "Üch xil küchlerge qarshi turush" heqqide léksiye bergen, shundaqla "Tengritagh" torida ochuq xet élan qilip köpchilikni hushyarliqqa ündigen iken. 

Analizchilar bu heqte pikir qilip: "Ababekri ablet ma'arip saheside 'pan türkizim we pan islamizimning zehiri éghir yamrighan' dégenni teshwiq qilip kelgen bolsimu, yenila xitay hökümitining ishenchige érishelmigen" dédi. 

"Shinjang islam instituti" ning dotsénti iminjan seydin 15 yilliq qamaqqa höküm qilin'ghan

Yéqinda "Shinjang islam instituti" ning dotsénti iminjan seydin ghayip bolghili ikki yil bolghanliqi heqqide uchurlar tarqalghandi. Muxbirimizning bu heqtiki ehwal igilishi jeryanida iminjan seydinning 2017-yili 5-ayda lagérgha élip kétilgenliki melum boldi. 

Melum bolushiche, bu yil 54 yashliq iminjan "Diniy esebiylikke qutratquluq qilghan" dégen eyib bilen 2019-yili 2-ayda 15 yilliq qamaq jazasigha höküm qilin'ghan. 

Iminjan seydin tutqun bolushtin ilgiri "Töwen'ge chüshken kadirlar" qatarida guma nahiyisige ewetilgen hemde alaqidar axbarat wastilirining ziyaritini qobul qilghanda "Üch xil küchlerge qarshi teshwiqat kürishi" de aktipliq bilen xizmet qilidighanliqini bildürgen iken. 

Xitay hökümiti tumshuq shehiride Uyghurlarning DNA sini tetqiq qilmaqta

Ötken heptide xitayning tumshuq shehride tejribixana qurup, Uyghurlarning DNA si arqiliq ularning chirayini sizip chiqish téxnikisini sinaq qiliwatqanliqi ashkarilandi. Gérmaniyediki maks-plank jem'iyitining bu türge qatnishiwatqanliqi kishilerning zor diqqitini qozghidi.

Muxbirimizning ehwal éniqlishi jeryanida mezkur jem'iyet özlirining buningda jawabkarliqi barliqini ret qildi. Emma xitay hökümitining Uyghurlarni basturushi ewjige chiqiwatqanda bu xil yéngi téxnikining rawajlandurulishi köp xil endishilerni peyda qildi. 

Buningdin ilgiri xitay hökümiti "Heqsiz salametlik tekshürüsh" namida Uyghurlarning qan ewrishkisi, gén ewrishikisi we bashqa bi'ologiyelik ewrishkilirini toluq toplap bolghan idi.

Nur bekrining ömürlük qamaqqa höküm qilinishi küchlük inkas qozghidi

Xitay döletlik énérgiye idarisining sabiq bashliqi nur bekri 2-dékabir küni lyawning ölkiside sotlinip, muddetsiz qamaq jazasigha höküm qilindi. Sotta uning ötken 20 yilliq emeldarliq tarixida 79 milyon som (texminen 11 milyon amérika dolliri) qimmitide para yégenliki éytilidu. 

Ürümchi shehirining bashliqi we Uyghur aptonom rayonluq hökümetning re'isi bolup ishligen mezgillerdin tartip nur bekri xitay hökümiti üchün "Sadiq emeldar" bolup ishligenidi.

Bir qisim analizchilar bu heqte pikir qilip: "Bu hal xitay hökümitining héchqandaq Uyghurgha ishenmeydighanliqining ispati. Xitay hökümitining nur bekrini yiqitishi uning sadaqitige bolghan guman sewebidin bolushi mumkin" dédi. 

Adriyan zénz: "Xitayning Uyghurlargha qiliwatqanliri medeniyet qirghinchiliqidur!"

Uyghurlar diyaridiki lagérlar mesiliside közge körün'gen tetqiqatchilardin gérmaniyelik doktur adryan zénz ependi yéqinda radiyomiz Uyghur bölümining mexsus ziyaritini qobul qildi. 

U ziyaret jeryanida nöwette Uyghurlar diyaridiki lagérgha qamalghanlarning sani alliqachan bir milyon 800 mingdin éship ketkenlikini muqimlashturushqa bolidighanliqini bildürdi. Shundaqla xitay hökümitining Uyghurlar diyaridiki basturush herketlirini ashkara bolghan "Étnik qirghinchiliq" dep körsetti. 

Doktur adryan zénz nöwette bu xil qirghinchiliqning lagérdikilergila emes, pütkül Uyghur jemiyitige zerbe bériwatqanliqini, buning bash "Qomandani" xitay re'isi shi jinping ikenlikini alahide körsetti.

Pikirler (0)
Share
Toluq bet