Һәптилик хәвәрләр (22-декабирдин 28-декабирғичә)

Мухбиримиз җүмә
2012-12-28
Share

Уйғур мәсилисини қоллиғучи алтә нәпәр сиясийон японийә ички кабинетиға кирди

Уйғур миллий һәрикити рәһбири рабийә қадир ханим зияритимизни қобул қилип, уйғур мәсилисини қоллиғучи алтә нәпәр сиясийонниң японийә ички кабинетиға киргәнликини тәбриклиди вә буниңдин мәмнун болғанлиқини билдүрди.

Чаршәнбә күни японийә парламентида өткүзүлгән сайламда сабиқ баш вәзир шинзо абе қайтидин баш вәзирликкә сайланған иди. Шинзо абе сайламдин кейин өз кабинетини тәшкиллигән. Мәлум болушичә ички кабинеттики министирларниң көпинчиси уйғурларни қоллайдиған кишиләр икән.

Алим сейитоф: 2012-йили уйғурларниң сиясий паалийәтлири үчүн яхши бир йил болди

Чәтәлләрдики уйғур тәшкилатлири уйғур миллий һәрикити рәһбири рабийә қадир ханимниң йетәкчиликидә уйғурларниң сиясий һоқуқлирини қолға кәлтүрүш дәвасини изчил давамлаштурмақта.

Алим сейитофниң билдүрүшичә, 2012-йили уйғурларниң сиясий паалийәтлири үчүн яхши бир йил болған.

Алим сейитоф тәминлигән учурларға қариғанда, рабийә қадир ханим бу йилму охшашла нурғун дөләтләрни зиярәт қилип, шу дөләтләрдики парламент әзалири, кишилик һоқуқ органлири шу дөләтләрдики уйғур җамаәтчилики билән муһим учришишларда болған.

Алим сейитофниң билдүрүшичә йәнә, 2012-йили явропа, америка, австралийә қатарлиқ дөләтләрдә уйғурларниң вәзийити һәққидә гуваһлиқ бериш йиғинлири өткүзүлгән.

Бу йил явропа парламентида “хитайниң шәрқий түркистандики ядро синиқи вә униң тәсири” намлиқ муһакимә йиғини өткүзүлгән иди.

Үрүмчидики бир сақчи ғайиблар аилисини балисини издәштин тосуватқанлиқини етирап қилди

Үрүмчидики бир сақчи ғайиблар аилисини 5-июлдин кейин йоқап кәткән тавабиатлириниң дәвасини қилиштин тосуватқанлиқини етирап қилди.

Биз өткән һәптидики программимизда 5-июл ғайиблиридин мәмәт баратниң аниси судиханниң үрүмчи алтунбулақтики өйидин сақчиларниң бесими билән һәйдәлгәнлики вә судихан аилисиниң алтунбулақтики бир меһманханида күн өткүзүватқанлиқи һәққидә мәлумат бәргән идуқ.

Мухбиримиз судиханни өйидин көчүрүш вәзиписини иҗра қилған сақчи хадимини зиярәт қилди. Сақчи хадими судиханни өйидин көчүшкә мәҗбурлиғанлиқини инкар қилған болсиму, әмма, уни балисини издәштин тосуватқанлиқини йошурмиди.

Сақчи хадимниң ейтқанлиридин мәлум болушичә, сақчилар судиханни әрз қилиштин тосуш үчүн униң барлиқ паалийәтлирини нәзәр бәнд астиға алған.

Иккинчи нөвәтлик хәлқара “мәһмуд кашиғәри һекайә мусабиқиси” аяғлашти

Иккинчи нөвәтлик хәлқара “мәһмуд кашиғәри һекайә мусабиқиси” 21-декабир түркийә пайтәхти әнқәрәдә ахирлашти.

Бу һекайә мусабиқисини уйғурларниң бүйүк алими мәһмуд кашиғәрини әсләш вә барлиқ түркий хәлқләрни бир йәргә җәм қилиш мәқситидә түркийә җумһурийити мәдәнийәт министирлиқи вә явро-асия язғучилар җәмийити бирликтә өткүзгән.

Тунҗи қетимлиқ хәлқаралиқ “мәһмуд кашиғәри һекайә мусабиқиси” 2008-йили “дуня мәһмуд кашиғәри йили” мунасивити билән өткүзүлгән иди.

Иккинчи нөвәтлик мусабиқидә биринчи дәриҗилик мукапатқа еришкән әзәрбәйҗанлиқ язғучи әҗдәр өл зияритимизни қобул қилип: түркләрниң роһи азад, шуңа улар һаман азадлиққа еришиду. Әгәр мәһмуд роһи азадла болидиған болса шуниңға ишинимәнки униң әҗдадлириму һаман бир күни азадлиққа еришиду, деди.

Уйғур академийиси “достимиз илим-мәрипәт, дүшминимиз наданлиқ вә җаһаләт”

“үчинчи қетимлиқ уйғур магистир вә доктор оқуғучилири илмий муһакимә йиғини” 23-декабир истанбулда ечилди. Йиғинни мәркизи истанбулға җайлашқан уйғур академийиси уюштурған.

Муһакимә йиғини башлиништин бурун уйғур академийиси рәиси абләт туран әпәнди ечилиш сөзи қилип, уйғур академийисиниң пүтүн уйғурларниң академийиси икәнликини, қәйәрдә болушидин қәтийнәзәр уйғурларда һаяҗан вә үмидниң йоқалмаслиқини тәкитлиди.

Уйғур тилиниң ишлитиш даириси күндин-күнгә тарийиватқан бүгүнки дәвримиздә сап уйғур тилида ечилған бу илмий муһакимә йиғинида, истанбул вә әнқәрәдин кәлгән уйғур доктор-магистирлар һәрхил темилардики мақалилирини оқуди.

Австралийидә өткүзүлгән путбол мусабиқиси мувәппәқийәтлик аяғлашти

Австралийиниң сидней шәһиридә өткүзүлгән 8-нөвәтлик “австралийә уйғур лоңқиси айланма мусабиқиси” 12-айниң 23-күни башлинип, 26-күни аяғлашти.

Бу қетимлиқ мусабиқигә адилайд, сидней вә мелбурн командилири шундақла һәрбир шәһәрдин кәлгән уйғур вәкилләр қатнашти.

Уйғур қурултийиниң муавин рәиси, австралийә уйғур җәмийитиниң рәиси мәмтимин әла әпәнди зияритимизни қобул қилип: бу пәқәт бир путбол мусабиқиси болупла қалмай, австралийидики яшларниң һәр йили бир йәргә җәм болуп, өз-ара тонушуш, өз-ара чүшинишни илгири сүрүштики яхши бир пурсәт, дәп көрсәтти.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт