Heptilik xewerler (22-dékabirdin 28-dékabirghiche)

Muxbirimiz jüme
2012.12.28

Uyghur mesilisini qollighuchi alte neper siyasiyon yaponiye ichki kabinétigha kirdi

Uyghur milliy herikiti rehbiri rabiye qadir xanim ziyaritimizni qobul qilip, Uyghur mesilisini qollighuchi alte neper siyasiyonning yaponiye ichki kabinétigha kirgenlikini tebriklidi we buningdin memnun bolghanliqini bildürdi.

Charshenbe küni yaponiye parlaméntida ötküzülgen saylamda sabiq bash wezir shinzo abé qaytidin bash wezirlikke saylan'ghan idi. Shinzo abé saylamdin kéyin öz kabinétini teshkilligen. Melum bolushiche ichki kabinéttiki ministirlarning köpinchisi Uyghurlarni qollaydighan kishiler iken.

Alim séyitof: 2012-yili Uyghurlarning siyasiy pa'aliyetliri üchün yaxshi bir yil boldi

Chet'ellerdiki Uyghur teshkilatliri Uyghur milliy herikiti rehbiri rabiye qadir xanimning yétekchilikide Uyghurlarning siyasiy hoquqlirini qolgha keltürüsh dewasini izchil dawamlashturmaqta.

Alim séyitofning bildürüshiche, 2012-yili Uyghurlarning siyasiy pa'aliyetliri üchün yaxshi bir yil bolghan.

Alim séyitof teminligen uchurlargha qarighanda, rabiye qadir xanim bu yilmu oxshashla nurghun döletlerni ziyaret qilip, shu döletlerdiki parlamént ezaliri, kishilik hoquq organliri shu döletlerdiki Uyghur jama'etchiliki bilen muhim uchrishishlarda bolghan.

Alim séyitofning bildürüshiche yene, 2012-yili yawropa, amérika, awstraliye qatarliq döletlerde Uyghurlarning weziyiti heqqide guwahliq bérish yighinliri ötküzülgen.

Bu yil yawropa parlaméntida “Xitayning sherqiy türkistandiki yadro siniqi we uning tesiri” namliq muhakime yighini ötküzülgen idi.

Ürümchidiki bir saqchi ghayiblar a'ilisini balisini izdeshtin tosuwatqanliqini étirap qildi

Ürümchidiki bir saqchi ghayiblar a'ilisini 5-iyuldin kéyin yoqap ketken tawabi'atlirining dewasini qilishtin tosuwatqanliqini étirap qildi.

Biz ötken heptidiki programmimizda 5-iyul ghayibliridin memet baratning anisi sudixanning ürümchi altunbulaqtiki öyidin saqchilarning bésimi bilen heydelgenliki we sudixan a'ilisining altunbulaqtiki bir méhmanxanida kün ötküzüwatqanliqi heqqide melumat bergen iduq.

Muxbirimiz sudixanni öyidin köchürüsh wezipisini ijra qilghan saqchi xadimini ziyaret qildi. Saqchi xadimi sudixanni öyidin köchüshke mejburlighanliqini inkar qilghan bolsimu, emma, uni balisini izdeshtin tosuwatqanliqini yoshurmidi.

Saqchi xadimning éytqanliridin melum bolushiche, saqchilar sudixanni erz qilishtin tosush üchün uning barliq pa'aliyetlirini nezer bend astigha alghan.

Ikkinchi nöwetlik xelq'ara “Mehmud kashigheri hékaye musabiqisi” ayaghlashti

Ikkinchi nöwetlik xelq'ara “Mehmud kashigheri hékaye musabiqisi” 21-dékabir türkiye paytexti enqerede axirlashti.

Bu hékaye musabiqisini Uyghurlarning büyük alimi mehmud kashigherini eslesh we barliq türkiy xelqlerni bir yerge jem qilish meqsitide türkiye jumhuriyiti medeniyet ministirliqi we yawro-asiya yazghuchilar jem'iyiti birlikte ötküzgen.

Tunji qétimliq xelq'araliq “Mehmud kashigheri hékaye musabiqisi” 2008-yili “Dunya mehmud kashigheri yili” munasiwiti bilen ötküzülgen idi.

Ikkinchi nöwetlik musabiqide birinchi derijilik mukapatqa érishken ezerbeyjanliq yazghuchi ejder öl ziyaritimizni qobul qilip: türklerning rohi azad, shunga ular haman azadliqqa érishidu. Eger mehmud rohi azadla bolidighan bolsa shuninggha ishinimenki uning ejdadlirimu haman bir küni azadliqqa érishidu, dédi.

Uyghur akadémiyisi “Dostimiz ilim-meripet, düshminimiz nadanliq we jahalet”

“Üchinchi qétimliq Uyghur magistir we doktor oqughuchiliri ilmiy muhakime yighini” 23-dékabir istanbulda échildi. Yighinni merkizi istanbulgha jaylashqan Uyghur akadémiyisi uyushturghan.

Muhakime yighini bashlinishtin burun Uyghur akadémiyisi re'isi ablet turan ependi échilish sözi qilip, Uyghur akadémiyisining pütün Uyghurlarning akadémiyisi ikenlikini, qeyerde bolushidin qet'iynezer Uyghurlarda hayajan we ümidning yoqalmasliqini tekitlidi.

Uyghur tilining ishlitish da'irisi kündin-kün'ge tariyiwatqan bügünki dewrimizde sap Uyghur tilida échilghan bu ilmiy muhakime yighinida, istanbul we enqeredin kelgen Uyghur doktor-magistirlar herxil témilardiki maqalilirini oqudi.

Awstraliyide ötküzülgen putbol musabiqisi muweppeqiyetlik ayaghlashti

Awstraliyining sidnéy shehiride ötküzülgen 8-nöwetlik “Awstraliye Uyghur longqisi aylanma musabiqisi” 12-ayning 23-küni bashlinip, 26-küni ayaghlashti.

Bu qétimliq musabiqige adilayd, sidnéy we mélburn komandiliri shundaqla herbir sheherdin kelgen Uyghur wekiller qatnashti.

Uyghur qurultiyining mu'awin re'isi, awstraliye Uyghur jem'iyitining re'isi memtimin ela ependi ziyaritimizni qobul qilip: bu peqet bir putbol musabiqisi bolupla qalmay, awstraliyidiki yashlarning her yili bir yerge jem bolup, öz-ara tonushush, öz-ara chüshinishni ilgiri sürüshtiki yaxshi bir purset, dep körsetti.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.