Һәптилик хәвәрләр (22-декабирдин 28-декабирғичә)

Мухбиримиз әзиз
2018-12-28
Елхәт
Пикир
Share
Принт
Йепиқ «тәрбийәләш» лагери йәни җаза лагериға айландурулған 3-башланғуч мәктәп. 2018-Йили сентәбир, лоп наһийәси.
Йепиқ «тәрбийәләш» лагери йәни җаза лагериға айландурулған 3-башланғуч мәктәп. 2018-Йили сентәбир, лоп наһийәси.
Photo: RFA

Байинғолин оттура сотиниң баш сотчиси ғалип төмүрниң тутқунда икәнлики ашкариланди

Уйғурлар дияридики сиясий бастурушта асаслиқ рол ойнаватқан қанун саһәсидә уйғур рәһбирий кадирларниң көпләп тутқун қилиниватқанлиқи диққәт қозғимақта. Йеқинда байинғолин оттура сотиниң баш сотчиси ғалип төмүрниң алтә айдин бери қамақта икәнлики ашкариланди.

Мухбиримизниң әһвал ениқлиши җәрянида алақидар хадимлар ғалип төмүрниң тутқун қилинғанлиқини дәлиллигән болсиму униң немә сәвәбтин тутқун қилинғанлиқи һәққидә мәлумат беришни рәт қилди.

Вәзийәттин хәвәрдар кишиләр ғалип төмүрдәк қанун саһәсидики уйғур кадирларниң нөвәттики тутқун һәрикитигә актип маслашмиғанлиқи дегәндәк сәвәбләр билән «икки йүзлимичи» дәп әйибләнгәнликини илгири сүрмәктә.

Алтайда бир қисим қазақ оқуғучилар тутқун қилишқа учриған

Йеқинда алтай шәһири, бурчин вә қаба наһийәлиридики бир қисим қазақ оқуғучиларниң мәктәп ашханисида чошқа гөши йейишни рәт қилғанлиқи үчүн тутқун қилинғанлиқи мәлум болди.

Радийомизға кәлгән инкасларда бир қисим мәктәпләрниң ашханилиридики тамақ җәдвилиниң еливетилгәнлики, буниң билән қайси тамақта чошқа гөши барлиқини билиш имкани болмиғанлиқтин бир қисим қазақ оқуғучиларниң буниңға наразилиқ билдүрүп намайиш қилғанлиқи ейтилған.

Сақчи хадимлири бир қисим қазақ оқуғучиларниң тутқун қилинғанлиқини дәлиллигән һәмдә оқуғучиларниң наразилиқ һәрикәтлиригә тақабил туруш үчүн бихәтәрликни күчәйтиш һәққидә юқиридин уқтуруш чүшкәнликини етирап қилған болсиму, әмма наразилиқ намайиши болғанлиқини инкар қилди.

Уйғурлар мәсилиси ғәрб таратқулирида изчил муһим хәвәрләрдин болуп кәлмәктә

Уйғурларниң пүтүн милләт бойичә «етник тазилаш» қа дуч келиши өткән һәптидә фирансийә, русийә, америка қатарлиқ дөләтләрдики телевизийә қаналлири вә гезит-журналлирида охшимиған шәкилләрдә мәхсус темилар бойичә тонуштурулди. Бир қисим тонуштурушлар вә мақалиләрдә хитайдики уйғурларға қаритилған бу хил бастурушларниң «етник тазилаш» ' характеригә игә икәнлики көрситилди.

Болупму «зимистан» журнили уйғурлар дияридики лагерларниң ички әһвалини көплигән маддий пакитлар билән паш қилип, хәлқараға уйғур дияриниң нөвәттики әһвалини ечип көрситиштә актип рол ойниди.

Буниңға мас һалда уйғур сиясий паалийәтчиләрму һәрқайси даңлиқ ахбарат қаналлирида мәхсус темидики сөһбәтләргә иштирак қилип, уйғурлар учраватқан дәһшәтлик сиясий бастурушларға тәпсилий чүшәнчә бәрди.

Дуняниң һәрқайси җайлирида уйғурларни қоллаш намайиши болмақта

Һәрқайси ахбарат васитилириниң уйғурлар дуч келиватқан бастурушлар һәққидики мәлуматлири сәвәблик дуняниң охшимиған җайлирида лагерларға қарши түрлүк намайишлар оттуриға чиқти.

Өткән һәптидә һиндонезийәдики мусулманларниң уйғурларни қоллаш намайишиға улапла қирғизистан, түркийә, германийә, татаристан қатарлиқ җайлардики һәр саһә кишилири хитай һөкүмитиниң уйғурларни бастуруш һәрикитигә қарши мәзмундики лозунка вә плакатларни көтүрүп һәр хил көләмдә намайиш өткүзди.

Түркийәдики өктичи партийәләрдин «бүйүк бирлик партийәси» пайтәхт әнқәрәдә зор йиғилиш вә намайиш тәшкилләп, түрк хәлқигә уйғурлар учраватқан зулумни йәнә бир қетим әсләтти. Һиндонезийәдики намайишниң көлимиму зор болди.

Доктор бурһан сети түркийәниң дөләт мукапатиға еришти

Түркийә пәнләр академийәсиниң 2018-йиллиқ иҗтимаий пән вә тәбиий пән саһәсидики мунәввәр яш зиялийларни баһалаш паалийитидә уйғурлардин доктор бурһан сети мукапат саһиблириниң бири болуп талланди.

Әнқәрә шәһиридики мукапат тарқитиш мурасимида түркийә җумһурийитиниң рәиси рәҗәп таййип әрдоған мукапат лоңқисини бурһан сетиға өз қоли билән тапшуруп бәрди.

Мәлум болушичә, бурһан сети бу қетим ислам иқтисади вә пул-муамилә саһәсидики издинишлири билән бу мукапатқа еришкән икән.

Америка сиясийонлири йеңи «уйғур қанун лайиһәси» тәклипини оттуриға қойди

Уйғур җәмийити дуч келиватқан түрлүк кризислар дуняниң диққитини қозғаватқанда америка дөләт мәҗлисиниң бир қисим әзалири «уйғурларға игә чиқиш вә дуняви инсанпәрвәрликниң ортақ инкаси» мавзулуқ қанун лайиһәсини түзүп чиқиш тәклипини оттуриға қойди.

Мәзкур қанун лайиһисидә юқири пән-техникиларни хитайға сетип бериватқан ширкәтләрни чәкләш асасий мәзмун қилинған болуп, буниңға җумһурийәтчиләр вә демократчилар партийәсидин болған сиясийонлар имза қойди.

Мәзкур қанун тәклип лайиһәсиниң оттуриға қоюлуши америка дөләт мәҗлисигә уйғурлар һәққидики қанун лайиһәси сунулғандин кейинки йәнә бир чоң илгириләш болуп, уйғурлар мәсилисиниң хәлқаралишишида зор әһмийәткә игә икән.

Толуқ бәт