Һәптилик хәвәрләр (22-апрелдин 28-апрелғичә)

Мухбиримиз қутлан
2017-04-28
Share
erkin-asiya-radiosi-yengi.jpg Әркин асия радиоси уйғур бөлүми һәптилик хәвәрлири
Photo: RFA

Йәкән томөстәңдики 140 аилилик бир мәһәллидә 53 кишиниң қамақта икәнлики ашкариланди

Радиомизниң йәкән йезилиридин әһвал игилиши давамида томөстәң йезисиниң 2-кәнт 4-мәһәллисидики 140 аилилик аһалә ичидә 53 нәпәр кишиниң қамақта икәнлики ашкариланди.

Кәнт секретариниң билдүрүшичә, мәзкур мәһәллидә илгирики йилларда қамалғанлардин 13 киши, йеқинда "қанунсиз тәблиғ аңлиған" дегән баһанә билән қамалған 35 киши вә тутуп турулуватқан вәзиписиз диний затлардин 4 нәпири бар икән.

Игилинишичә, йәкәнниң томөстәң йезиси ақсуниң айкөл, гума наһийәсиниң пиялма йезилириға охшашла көп санда адәм тутулған "нуқтилиқ җай" ларниң биригә айланған.

Чира наһийәлик даириләрниң өз тәвәликидики йезиларда юқири бесимлиқ тәқиб йүргүзүватқанлиқи мәлум болмақта

Улуғсай йезиси хотән вилайитиниң чира наһийәсигә қарашлиқ адәттики бир йеза. Әмма йәрлик даириләрниң нөвәттә мәзкур йезида йүргүзүватқан адәттин ташқири бихәтәрлик тәдбирлири хотән вилайитидики сиясий бесимниң қанчилик дәриҗигә йәткәнликини көрситип бәрмәктә.

Улуғсай йезилиқ сақчиханидики нөвәтчи хадимниң билдүрүшичә, җүмә намизини кәнт тәвәсидики ярдәмчи сақчилардин 3 киши, хәлқ әскиридин 6 киши вә аз дегәндә 2 нәпәр кәнт кадири болуп җәмий 10 дин артуқ адәм назарәт қилидикән.

Мәзкур ярдәмчи сақчи буниң сәвәбини изаһлап, "бу йил киргәндин буян аталмиш ‹террорчи унсурлар' ниң паракәндичилики түпәйлидин хотәндә вәзийәт җиддийлишип, қаттиқ бихәтәрлик тәдбирлири елинидиған болди," деди.

Мисир қатарлиқ көплигән әлләрдә оқуватқан уйғур оқуғучиларниң хитайниң тәқибигә дуч келиши диққәт қозғимақта

Йеқиндин буян мисир, түркийә вә дуняниң башқа әллиридә оқуватқан бир қисим уйғур оқуғучиларниң хитай һөкүмити тәрипидин чақиртилип кетиши, һәтта бәзиләрниң юртиға қайтқандин кейин из-дерикиниң болмаслиқи муһаҗирәттики уйғурлар арисида күчлүк ғулғула пәйда қилмақта.

Радийомизниң мисирдин әһвал игилиши давамида, даириләрниң бу йәрдики уйғур оқуғучиларға 5-айниң 20-күнидин илгири юртиға қайтиши һәққидә уқтуруш қилғанлиқи, һәтта уларниң юртта қалған ата-ана вә қериндашлирини тәқиб астиға алғанлиқи мәлум болди.

Һалбуки, хитай һөкүмитиниң мунасивәтлик органлири вә чәтәлләрдә турушлуқ әлчиханилириниң маарип башқармилири бу һәқтә учур беришни рәт қилди.

Вашингтондики худсон институти "хитайниң зулуми вә явро-асия өтүшмисидики уйғур қураллиқлири" намлиқ йиғин өткүзди

25-Апрел күни баш штаби вашингтондики худсон институти "хитайниң зулуми вә явро-асия өтүшмисидики уйғур қораллиқлири" темисида муһакимә йиғини өткүзди.

Мәзкур йиғинда җорҗи вашингтон университетиниң профессори шан робертс, пенсилванийә университетиниң ярдәмчи профессори қилич қанат вә "пуқралар күчи" тәшкилатиниң рәиси яң җйәнли қатарлиқлар айрим-айрим сөз қилди.

Улар, хитай һөкүмитиниң уйғур диярида йүргүзүватқан юқири бесимлиқ сиясити вә буниң муқәррәр ақивәтлири һәққидә өз қарашлирини шәрһлиди.

Мәрһум язғучи зордун сабирниң 1987-йилидики германийә зиярити вә бу һәқтики "ейтилмиған һекайиләр" әсләп өтүлди

Мәрһум язғучи зордун сабир 1987-йилиниң ахиридин 1988-йилиниң башлириғичә болған мәзгилдә сабиқ ғәрбий германийәдә илмий зиярәттә болған иди.

Бу, "берлин теми" техи өрүлмигән, икки германийә бирликкә кәлмигән, явропа "соғуқ уруш" ниң әң ахирқи басқучида давалғуп туруватқан бир пәвқуладдә тарихий дәвр иди.

Язғучи зордун сабир аләмдин өтүп аридин 19 йил өткән бүгүнки күндә шаһитлар мәрһумниң ашу қетимлиқ явропа сәпиридики "ейтилмиған һекайиләр" ни йоруқлуққа чиқарди.

Уйғур диярида пәрзәнтләргә мусулманчә исим қоюшниң чәклиниши хәлқара таратқуларда күчлүк инкас пәйда қилди

Хитай һөкүмитиниң уйғур диярида бир қисим мусулманчә исимларни чәклигәнлики буниңдин икки йил бурунла радийомиз тәрипидин хәвәр қилинған иди.

Бу қетим уйғур аптоном райони "диний әсәбийликни түгитиш низами" ни рәсмий қанунлаштурғандин кейин, даириләрниң уқтуруш чиқирип йеңи туғулған бовақларға "муһәммәд", "муҗаһид", "түркизат" қатарлиқ исимларни қоюшни чәклигәнлики хәлқарада күчлүк инкас пәйда қилди.

Америка уйғур бирләшмисиниң рәиси илшат һәсән әпәнди бу һәқтә инкас қайтуруп, хитай һөкүмитиниң районда йүргүзүватқан миллий ассимилятсийә сияситини қаттиқ тәнқид қилди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт