Һәптилик хәвәрләр ( 18 - өктәбирдин 24 - өктәбиргичә)

Мухбиримиз үмидвар
2008-10-24
Share

Рабийә қадир ханим бир қатар паалийәт елип барди

Уйғур милли һәрикитиниң рәһбири, дуня уйғур қурултийиниң рәиси рабийә қадир ханим өткән һәптидә америкида бир қатар паалийәтләрни елип барди.

Рабийә қадир ханим 10 ‏ - айниң 19 ‏ - күни калифорнийидә хәлқара кәчүрүм тәшкилатиниң 60 йиллиқи мунасивити билән уюштурулған хатириләш мурасимиға қатнишип нутуқ сөзлигән, бу паалийәткә 12 дөләттин кәлгән 700 дин артуқ кишилик паалийәтчиси қатнашқан болуп, рабийә қадир ханимниң нутқи аңлиғучилар арисида күчлүк иҗабий инкасларни қозғиди.

10 ‏ - Айниң 21 ‏ - күни, рабийә қадир ханим, калифорнийидин қайтип, шималий каролина штатидики мәшһур дәвидсон университетидики оқутқучи вә оқуғучиларға охшашла уйғурларниң бүгүнки вәзийитини тонуштуридиған доклат бәрди. Рабийә қадирниң доклати оқутқучи вә оқуғучилар арисида яхши инкасларни қозғиған.

Явропа иттипақи ху җяға сахаров мукапати бәрди

Пәйшәнбә күни явропа иттипақи өзиниң әң юқири кишилик һоқуқ мукапати андрей сахаров мукапатини бейҗиңдики әйдиз вә кишилик һоқуқ паалийәтчиси ху җяға бәрди шуниң билән бир вақитта йәнә инсан һоқуқи тәшкилатлири ху җайни түрмидин қоюп беришни тәләп қилди.

Бу мунасивәт билән бейҗиң даирилири инкас қайтуруп, явропа иттипақиниң ху җайға мукапат бәргәнликигә наразилиқ билдүрди.

Ху җя бу йилқи нобел тинчлиқ мукапатиниң намзатлиқиға көрситилгән, әлвәттә, бу йилқи нобел тинчлиқ мукапатиниң намзатлири ичидә рабийә қадир ханимму бар иди.

Хитай иккинчи түркүмдики террорлуқ тизимлики елан қилди

Сәйшәнбә күни хитай җамаәт хәвпсизлик министирлики бейҗиңда иккинчи түркүмдики тизимликтики елан қилип, сәккиз нәпәр уйғурни шәрқий түркистан ислам һәрикити тәшкилатиниң әзаси сүпитидә террорчилиқ билән әйиблиди һәмдә һәр қайси дөләтләрдин уларни қайтуруп беришкә чақирди.

Бу мәсилә һәққидә хәлқаралиқ көзәткүчиләр вә уйғур тәшкилатлириниң қарашлири һәр хил болуп, пәрқлиқ көз қарашлар давамлашмақта.

6 - Қетимлиқ түрк тили қурултийи әнқәрәдә өткүзүлди

Түркийә җумһурийитигә тәвә ата түрк намидики мәдәнийәт, тарих, тил җәмийитиниң 6 - қетимлиқ хәлқаралиқ түрк тили муһакимә йиғини әнқәрә шәһиридә өткүзүлди. Бу йилқи йиғин б д т ниң 2008 - йилини мәһмут қәшқәри йили қилип бекитишигә мунасивәтлик мәхсус мәһмут қәшқириниң туғулғанлиқиниң 1000 йиллиқиға беғишланған.

Әнқәрәдики ихтияри мухбиримизниң ейтишичә, йиғиндики асаслиқ тема мәһмут қәшқириниң түркий тиллар диванидики мәзмунлар билән зич бағлинишлиқ болуп, 34 дөләттин кәлгән 478 мутәхәссис қатнашти.

Йиғинниң ечилиш мурасимиға түркийә баш министири рәҗәп тайип әрдоған қатнишип, сөз қилди. Бу қетимқи йиғинға йәнә бейҗиңдин вә үрүмчидин кәлгән бир қанчә нәпәр уйғур мутәхәссислириму қатнишип,өзлириниң илмий мақалилирини оқуп өтти.

Йәнә бир уйғур дарваз тәвәккүлчилик қилди

Хунән өлкисиниң җаңҗаҗйе исимлик җайидики тиәнмен теғиға тартилған узунлуқи 700 метирлиқ симдин меңип өтүш маһаритини 18 - өктәбир күни атақлиқ дарваз адил һошурниң туғқанлиридин бири абдусәмәт һәсән көрсәтти.

Бирақ, абдусәмәт һәсән мундақ хәтәрлик сим үстидә 650 метир әтрапида маңғандин кейин янтулуқ дәриҗиси юқири вә симниң лиңшиш дәриҗиси еғир болғанлиқи үчүн меңишни давамлаштурушқа қийналғанда уни көзитип турған уруғ - туғқанлириниң қәтий тәләп қилиши билән меңишни тохтатқан икән.

24 яшлиқ абдусәмәт һәсән йәнила узунлуқ вә тик - янтулуқ дәриҗиси әң юқири симда меңиш үчүн һәрикәт қилған тунҗи адәм болуп һесаблинидикән.

Д у қ вәкиллири японийидә ечилған хәлқаралиқ йиғинға қатнашти

Өткән һәптидә японийидә чақирилған `һәр қайси милләтләрниң мәвҗудийитини қоғдап қелишни илгири сүрүш` йиғиниға д у қ муавин башлиқи сейит түмтүрк әпәнди, д у қ ниң японийидики вәкили, японийә уйғур җәмийитиниң башлиқи илһам мәхмут әпәндиләр қатнашти.

Бу йиғинға уйғурлардин башқа, тибәт, моңғул, демократик хитай вә тәйвәнлик вәкилләрму қатнашқан. Йиғин хуласиси сүпитидә бир қарарнамә қобул қилинип, японийә һөкүмитиниң уйғур, тибәт вә моңғулларниң нөвәттики вәзийитигә диққәт қилишқа чақирилған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт