Istanbulda ötküzülüwatqan 5-nöwetlik “Hurra” longqisi putbol musabiqiside dostluq ornitish tekitlendi

Istanbulda ötküzülüwatqan 5-nöwetlik hurra longqisini talishish putbol musabiqiside meydan'gha chüshken mahirlar. 2022-Yili awghust, istanbul.

Her milletning yashliri shu milletning qimmetlik bayliqi, kelgüsining iz basarliri hésablinidu. Türkiyede yashawatqan Uyghur yashliri xéli köp sanni teshkil qilidu. Yéqindin buyan türkiyediki Uyghur teshkilatliri Uyghur yashlirini tenterbiye arqiliq yétishtürüsh, öz-ara dostluq ornitishqa ehmiyet bermekte.

Istanbulda ötküzülüwatqan 5-nöwetlik hurra longqisini talishish putbol musabiqisining échilish murasimida söz qilghan sherqiy türkistan tenterbiye we tereqqiyat jem'iyitining re'isi tahir kökbayraq Uyghur yashlirigha xitab qilip؛ “Musabiqini birinchi, dostluqni ikkinchi orunda qoyup emes, dostluqni birinchi, musabiqini ikkinchi orunda qoyup, bir-biringlargha hörmet qilghan asasta musabiqe oynishinglarni ümid qilimen”, dédi.

Istanbuldiki sherqiy türkistan tenterbiye we tereqqiyat jem'iyitining uyushturushi bilen istanbulda 5-nöwetlik hurra longqisini talishish putbol musabiqisi Uyghur yashliridin terkib tapqan 16 komanda we 160 ezaning qatnishishi bilen 6-awghust küni resmiy bashlandi.

Musabiqining échilish murasimida sherqiy türkistan tenterbiye we tereqqiyat jem'iyiti re'isi tahir kökbayraq ependi échilish sözi qildi.

RFA/Arslan

Tahir kökbayraq sözide, bu musabiqini uyushturushtiki asasiy meqsitining, sherqiy türkistan tenterbiye we tereqqiyat jem'iyitining muhajirettiki yashlarni bir yerge jem qilish, öz-ara tonushush soruni teyyarlash, öz-ara hemkarliq, birlik, inaqliq we ittipaqliqni emelge ashurushni nishan qilip qurulghanliqini, bu putbol musabiqisini uyushturush arqiliq shu nishan'gha yetkenlikini bildürdi.

Musabiqining échilish murasimida söz qilghan xelq'ara sherqiy türkistan teshkilatlar birliki re'isi hidayetullah oghuzxan, musabiqige qatnashqan Uyghur yashlirigha ilham berdi we ularni qollap-quwwetleydighanliqini ipadilep, bu putbol musabiqisining qarshi reqibler arisida emes, dostlar arisida qérindashliqni téximu kücheytish üchün oyniliwatqan musabiqe ikenlikini, bu yerde yenggen yaki yéngilgen hemmisining öz-ara qérindash ikenlikini, hemmisini tebrikleydighanliqini, bu musabiqining qérindashliq rishtisini téximu kücheytip köngüllük axirlishishini ümid qilidighanliqini bildürdi.

Murasimda yene dunya Uyghur qurultiyi wexpisi re'is wekili doktur dilshat barishchi söz qilip, bu musabiqige qatnashqan pütün putbol mahirlirini tebrikleydighanliqini, musabiqining dostluq ichide netijilinishige tilekdashliq bildürüsh bilen birge sherqiy türkistan tenterbiye we tereqqiyat jem'iyitining buningdin kéyinki élip barmaqchi bolghan pa'aliyetlirini qollap-quwwetleydighanliqini ipadilidi.

Musabiqe bir hepte dawam qilidighan bolup her küni 4 komanda aylanma shekilde musabiqe qilidiken.

RFA/Arslan

Tahir kökbayraqning bildürüshiche, axirida birinchi bolghan komandigha 5000 türk lirasi, ikkinchi bolghan komandigha 3000 türk lirasi, üchinchi bolghan komandigha 2000 türk lirasi neq pul we longqa qatarliq maddiy buyumlar mukapati birilidiken.

5-Nöwetlik “Hurra” longqisi putbol aylanma musabiqining 7-awghust küni oynalghan musabiqiside eynek komandisi udun komandisi bilen musabiqileshti. Ikki terepning ipadisi nahayiti yaxshi boldi. Lékin purset tutushta udun komandisi köp qétim pursetni qoldin bérip qoydi. Eynek komandisi bolsa qattiq tirishchanliq bilen oynidi. Axirqi waqitlirida qizil karta jazasi bilen bir adem kem oynighan shara'itta udun komandisini meghlup qildi.

Yéngi qurulghan yashlar merkizi komandisi aq'orda komandisi bilen musabiqiliship aq orda komandisining ghelibisi bilen axirlashti.

Bügünki axirqi meydan ismi-jismigha layiq küchlükler uchrishishi boldi.

Qirghizistan Uyghurliridin teshkillen'gen atilla komandisi ötken ikki nöwetlik musabiqide uda ikkinchi bolghan küchlük komanda ili meshripi komandisi bilen oynidi. Musabiqe tamashibinlarni hayajan'gha saldi. Alqish sadaliri astida ikki terep eng yuqiri maharet bilen oynidi. Netijide bu musabiqige alahide teyyarliq qilip kelgen qirghizistan Uyghurliri atilla komandisi 3-5 netije bilen ghelibe qildi.

Igilinishiche, bu musabiqe her küni kechte dawam qiliwatqan bolup 16-awghust küni axirqi hel qilghuch musabiqe oynilip 1-2-3-bolghan komandilargha “Hurra Uyghur” longqisi we neq pul mukapat bérilidiken.

Biz bu qétimqi putbol musabiqisi toghrisida bir qisim yashlarning pikir-qarashlirini alduq. Eynek komandisining kapitani serdarjan, bu qétimqi putbol musabiqisini türkiyediki Uyghurlarning eng chong ijtima'iy pa'aliyetliridin biri dep qaraydighanliqini bildürdi. U, tenterbiye türlirining, bolupmu kolléktip küch telep qilidighan putbolgha oxshash tenterbiye türlirining muhajirettiki Uyghurlarning mewjutluqini qoghdap qélishta ehmiyiti küchlük dep qaraydighanliqini bildürdi.

Uyghur putbol mahiri ebubekri, bu musabiqe toghrisida pikir bayan qilip, Uyghur yashlarning yengsimu, yéngilsimu axirghiche yuqiri keypiyatta musabiqini yaxshi oynighanliqini ipadilidi we musabiqining adil bolushi üchün küchigen répérlargha, toxtimay mahirlarni alqishlap hurra towlighan tamashibinlargha rehmet éytidighanliqini bildürdi.