Xelq'ara saqchi teshkilati idris hesen heqqidiki tutush buyruqini waqtinche tonglatqan

Idris hesen 19-iyul küni marakeshte qolgha ilin'ghan bolup, marakesh da'iriliri xitayning telipi bilen xelq'ara saqchi teshkilatining qizil tutush buyruqi boyiche idris hesenni qolgha alghanliqini bildürgenidi.

Igilishimizche, xelq'ara saqchi teshkilati idris hesen heqqide yéngi melumatlarni tapshurup alghanliqini, heqiqiy ehwal aydinglashqan'gha qeder, idirsning üstidiki qizil tutush buyruqini tonglitip qoyidighanliqini élan qilghan.

“Jenubiy xitay seher pochtisi” gézitining xewer qilishiche, mezkur qarar xelq'ara saqchi teshkilati teripidin marakesh we xitay da'irilirige bildürülgen.

Norwégiyede turushluq kishilik hoquq pa'aliyetchisi abduweli ayup ependining éytishiche, xelq'ara saqchi teshkilatining uqturushi her qaysi döletlerning xewpsizlik organlirigha yetküzülidighan bolup, mezkur tutush buyruqini ijra qilish yaki qilmasliq shu döletning özige baghliq iken.

Abduweli ayup ependi ziyaritimiz dawamida yene, xelq'ara saqchi teshkilati alghan mezkur qararning marakesh da'iriliri üchün bir purset ikenlikini éytti.

Idris hesenning ayali buzaynur xanim ziyaritimizni qobul qilip, her qaysi kishilik hoquq teshkilatlirining tirishchanliqidin söyün'genlikini we xelq'ara saqchi teshkilatining mezkur qararidin xursen bolghanliqini éytti.

Marakesh jama'et xewpsizlik tarmaqliri téxi idris hesen heqqide délo turghuzmighan bolup, nöwette idris hesen koruna wirusi tedbirliri seweblik karantin astida tutup turulmaqtiken. Idris hesen heqqidiki qanuniy tertip marakesh da'iriliri resmiy délo turghuzghandin kiyin bashlinidiken. Idris hesenning adwokati abduweli ayup ependige idris hesen délosining uzun'gha sozulup kétishining mumkinlikini, bu ehwalning idris hesen üchün paydiliq ikenlikini, axbarat wasitiliri arqiliq marakesh da'irilirige bisim chüshürüsh üchün waqit utqini bolidighanliqini éytqan.

Nöwette idris hesenni qutquzush üchün dunyaning herqaysi jayliridiki kishilik hoquq pa'aliyetchiliri we xelq'araliq kishilik hoquq organliri pa'al tirishchanliq körsitiwatqan bolup, kishiler xitayning Uyghurlar üstide yürgüzüwatqan qirghinchiliq siyasetlirige chétilip qalmasliqi üchün marakesh da'irilerni agahlandurmaqta.