Уйғурлар маракәшниң истанбулдики баш консолханиси алдида намайиш қилип идрис һәсәнни қоюп беришни тәләп қилди

Ихтиярий мухбиримиз арслан
2021-08-11
Share
Уйғурлар маракәшниң истанбулдики баш консолханиси алдида намайиш қилип идрис һәсәнни қоюп беришни тәләп қилди Маракәштә қолға елинған идрис һәсәнниң аяли вә пәрзәнтлири уни қоюп беришни тәләп қилип, маракәшниң истанбулдики консулханиси алдида өткүзгән намайишидин көрүнүш. 2021-Йили 11-авғуст, түркийә.
RFA/Arslan

11‏-Авғуст чаршәнбә күни истанбулдики уйғурлардин бир гуруппа киши маракәш дөлитиниң истанбулдики консулханиси алдида намайиш қилип маракәштә қолға елинған идрис һәсәнни қоюп беришни тәләп қилди. Намайишчилар бирдәк, "идрис һәсәнгә әркинлик!", "идрис һәсән хитайға қайтурулмисун!" дегәндәк шоарлар товлиди. Намайиш җәрянида уйғур паалийәтчи доктор бурһан улуғйол инглиз тилида маракәш баш консулханисиға хитаб қилип, идрис һәсәнни хитайға қайтуруп бәрмәсликни вә уни әркин қоюп беришни тәләп қилди. Кейин йәнә идрис һәсәнниң аяли бузәйнур обул сөз қилип, маракәш һөкүмитиниң идрис һәсәнни қоюп беришини тәләп қилди. Бузәйнур обул мундақ деди: "бизниң истанбулдики маракәш консолханисиниң алдиға җәм болушимизниң сәвәби болса, йолдишим уйғур компютер мутәхәссиси, шәрқий түркистанлиқ идрис һәсән һазир маракәшниң касабланка айродромида хитайға қайтурулуш хәвпигә дуч келип тутуп турулишидур. Әгәр йолдишим хитайға қайтурулса у наһәқ өлүмгә вә яки муддәтсиз қамақ җазасиға учрайду. Маракәш һөкүмитини йолдишимни дәрһал қоюп беришкә, хитайниң инсанийәткә қарши җинайәт садир қилишиға пурсәт яритип бәрмәсликкә вә зулумға ортақ болмаслиққа чақириқ қилимән".

Истанбулдики уйғурлардин бир гуруппа киши маракәшниң истанбулдики консулханиси алдида маракәштә қолға елинған идрис һәсәнни қоюп беришни тәләп қилип өткүзгән намайишидин көрүнүш. 2021-Йили 11-авғуст, түркийә.
Истанбулдики уйғурлардин бир гуруппа киши маракәшниң истанбулдики консулханиси алдида маракәштә қолға елинған идрис һәсәнни қоюп беришни тәләп қилип өткүзгән намайишидин көрүнүш. 2021-Йили 11-авғуст, түркийә.

Бузәйнур обул сөзидә йәнә ғәрб әллирини идрис һәсәнгә игә чиқип уни қутулдурушқа вә бихәтәр дөләткә йөткилиши үчүн ярдәм қилишқа чақириқ қилип мундақ деди: "охшаш вақитта башта түркийә қатарлиқ пүткүл ғәрб дөләтлириниң инсанийәткә игә чиқип, хитайниң рәһимсиз чаңгилиға чүшүп қелиш алдида туруватқан йолдишим идрис һәсәнни дәрһал қутулдурушқа вә һаят бихәтәрлики капаләткә игә болидиған бир дөләткә йөткилишини қолға кәлтүрүши үчүн конкрет қәдәм бесишини җиддий тәләп қилимән".

Биз идрис һәсәнниң нөвәттики әһвали һәққидә техиму тәпсилий мәлумат елиш үчүн маракәшниң истанбулдики баш консулханисиға телефон қилған болсақму, телефон елинмиди.

Биз бу паалийәтни уюштурған паалийәтчиләрдин доктор бурһан улуғйол билән сөһбәт елип бардуқ.

Доктор бурһан улуғйолниң билдүрүшичә, 12‏-авғуст күни маракәштә идрис һәсән үстидин сот ечилидиған болуп, бу намайишниң йәнә бир сәвәбиниң маракәш һөкүмитигә азрақ болсиму бесим қилиш арқилиқ идрис һәсәнни қоюп беришкә йол ечиштур.

Доктор борһанниң билдүрүшичә, консулхана бихәтәрлик хадимлири намайишчиларға қизғин муамилә қилған вә баш консолханиниң дәрвазиси алдиғичә берип намайиш қилишиға рухсәт қилған.

Бузәйнур ханимниң билдүрүшичә маракәшниң истанбулдики баш консулхана хадими униң йолдишини қоюп бериш тоғрисидики илтимас материял вә рәсимини қобул қилған һәм мунасивәтлик органларға йәткүзидиғанлиқини билдүргән.

Бу һәқтә доктор бурһан әпәндиниң билдүрүшичә, намайиш ахирида баш консулхана хадими бурһан әпәндини ишханисида қобул қилған вә бурһан әпәнди у кишигә идрис һәсән тоғрисида мәлумат бәргән һәм уни қоюп бериш тоғрисидики илтимасни сунған. Консулхана хадими маракәшниң әнқәрәдики баш әлчилики биләнму алақә қилип, әһвални билдүрүшни тәвсийә қилип елхәт адресини бурһан әпәндигә бәргән.

Бир қанчә йилдин буян түркийәдә яшаватқан, бу йил 33 яшқа киргән идрис һәсән бихәтәр бир дөләткә берип орунлишиш үчүн истанбулдин маракәшниң касабланка шәһиригә учуп барған. Әмма маракәш даирилири 20-июл күни кечидә идрис һәсәнни касабланка хәлқаралиқ айродромда тутқун қилғаниди.

Игилинишчә уйғур тәшкилат рәһбәрлири вә хәлқаралиқ кишилик һоқуқ тәшкилатлири идрис һәсәнни қутулдуруш үчүн җиддий йол маңмақтикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт