Xitay hökümiti idris hesen üstidiki eyibnamilerni téxiche tapshurmighan

Ixtiyariy muxbirimiz azigh
2021-08-20
Share
Xitay hökümiti idris hesen üstidiki eyibnamilerni téxiche tapshurmighan Idris hesen marakeshke méngishtin bir qanche kün burun perzenti bilen baghchida. 2021-Yili iyul, türkiye.
RFA/Azigh

Xitay hökümitining telipi bilen marakeshte qolgha ilin'ghan kompyutér inzhénéri idris hesenni qutquzush herikiti dawamlashmaqta.

Idris hesenning soti kishilik hoquq teshkilatliri we chet ellik diplomatlarning qatnishishi bilen 12-awghust küni rabatta échilghan idi.

Xitay hökümiti idris hesen üstidiki eyibnamilerni waqtida ewetip bermigenliki seweplik sot mehkimisi idris hesenning sotini 26-awghust künige kéchiktürgen idi.

Idris hesenning adwukatining "Uyghur yar fondi" ning mes'ullirigha bildürüshiche, xitay hökümiti idris hesen heqqidiki eyibnamilerni téxiche marakesh da'irilirige yetküzüp bermigen.

Idris hesen marakeshke méngishtin bir qanche kün burun perzentliri bilen oynawatqan körünüsh. 2021-Yili iyul, türkiye.
Idris hesen marakeshke méngishtin bir qanche kün burun perzentliri bilen oynawatqan körünüsh. 2021-Yili iyul, türkiye.

Marakesh teptish da'iriliri idris hesen üstidiki eyibnamilerni choqum 26-awghust künigiche idris hesenning adwokatlirigha tapshurushi kérek iken. Tapshurmighan ehwal astida sot mehkimisi eyibleshlerni ret qilip, idris hesenni qoyup béridiken. Eger 26-awghust künigiche xitay da'iriliri idris hesen üstidiki eyibnamilerni tapshursa, sot mehkimisi idris hesenning adwokatlirining eyibnamini körüp chiqishi üchün waqit béridiken. Bu ehwal astida sotning qayta kéchiktürülüsh éhtimalliqi bar iken.

Xitay hökümiti idris hesen üstidiki eyibnamilerni marakesh teptish organlirigha téxiche yetküzüp bérilmigen bolup, xitay hökümitige bérilgen muddet toshqan ehwal astida sot mehkimisi mewjut höjjetler bilen qoyup bérilishi üchün höküm chiqiridiken.

Biz idris hesenning nöwettiki ehwali we marakash da'irilirining idris hesen délosigha bolghan pozitsiyesi igilesh üchün marakeshning istanbuldiki bash konsulxanisigha qayta qayta-qayta téléfun qilghan bolsaqmu, téléfunimiz élinmidi.

Idris hesenning ayali buzeynur xanimning éytishiche, idris hesen nöwette yalghuz kishilik kamérgha solan'ghan bolup, psixik jehettin éghir bésimgha duch kelmekte iken.

Buzeynur xanim yene yoldishining héchqandaq gunah ötküzmigenlikini, 26-awghust küni échilidighan sottin kiyin yoldishining erkinlikke chiqishini ümid qilidighanliqini éytti.

Idris hesenning délosi nöwette kishilik hoquq teshkilatliri we gherb démokratik döletliri siyasetchilirining qattiq diqqitini tartiwatqan bolup, yéqinda "Xitaygha qarshi xelq'araliq parlamént ezaliri birleshmisi bayanat élan qilip, marakesh da'irilirini idris hesenni qoyup bérishke chaqiriq qilghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet