Кучада йиғивелишқа башланған игисиз өйләрниң көпинчисиниң саһиблири лагер вә түрмидә икәнлики ашкариланмақта
2024.04.05
Куча шәһиридә йеқинда мәхсус игисиз өйләрни йиғивелиш хизмәт гурупписи қурулған. Бу гуруппа наһийәниң бир йезисидин 95, йәнә бир йезисидин 149 игисиз өйни байқиған. Нөвәттә даириләр бу өйләрниң асаслиқ вә қошумчә игилирини сүрүштә қилмақта. Ениқлашлиримизда, бу өйләрдин бириниң бәш йилдин буян җаза өтәватқан бир мәһбусқа аит икәнлики дәлилләнди.
Илгири бир чәт әл мухбири қәшқәр шәһирини зиярәт қилған вақтида көпинчә қоруларға қулуп селинғанлиқи, ишикләрниң узундин бери ечилмиғанлиқини байқиған. Турпанни зиярәт қилған бир хоңкоңлуқ саяһәтчиму илгири қайнам-ташқинлиқта көргән кочиларниң адәмсиз чөлдәрәп қалғанлиқини хәвәр қилип тарқатқан. Йеқинда чәт әлгә туғқан йоқлап кәлгән бирәйләнму үрүмчидә уйғур ишчи-хизмәтчиләрниң иштин чүшкәндин кейин дөңкөврүккә берип айлинип келиши буйрулған. Дейилишичә даириләр бу арқилиқ чоң тутқундин кейин дөңкөврүктә шәкилләнгән чөлдәрәшни чәт әллик зиярәтчиләрниң көзидин йошурушқа урунған. Бу әһваллар чоң тутқунниң көлиминиң кәңликидин шәпиләр бәргән болса, нөвәттә ашкарилиниватқан бәзи пакитлар шу тутқундикиләрниң хәтәрлик ақивитидин бешарәтләр бәрмәктә.
Йеқинда кучалиқ муһаҗирлардин бириниң радийомизға инкас қилишичә, куча шәһиридә даириләр лагер вә түрмиләрдә түгәп кәткән вә яки узун муддәт кесиветилгән мәһбусларниң ойлирини йиғивелишқа башлиған вә бир қисмини сетиш үчүн базарға чиқарған. Дейилишичә 2017-йили чоң тутқун башланғандин кейин бир қисим кишиләр аилә бойичә тутқун қилинған, бир қисим өйләрниң саһиби ялғуз болғанлиқи үчүн мәһәллиләрдә түркүм-түркүмләп өйләр игисиз ташлинип қалған. Инкаста әскәртилишичә, бунчә көп ташландуқ өйләр, бир тәрәптин, илгирики қаршилиқ һәрикәтлири сәвәблик даириләрдә әндишә пәйда қилса, йәнә бир тәрәптин, иқтисадий нәп яритиш һәвиси қозғиған. Шуңа даириләр мәхсус игисиз өйләрни йиғивелиш хизмәт гурупписи қурған. Хизмәт гуруппилири бу өйләрни йиғивелишниң алдида уқтуруш тарқитип игилирини сүрүштә қилған. Бирақ өй игилириниң йирақ йеқиндики уруқ-туғқанлири шу өйләрдин тутулған кишиләргә четилип қалмаслиқ үчүн у өйләргә игә чиқиштин өзлирини қачурған. Шундақтиму бу гуруппа нөвәттә бир қисим игисиз өйләрниң қулуплирини йәңгүшләп бир қисмини сетиш үчүн базарға чиқарған.
Телефонимизни қобул қилған куча кона базардики бир аһалиләр комитети мудири, һазирғичә өз тәвәликидә 95 игисиз өйниң байқалғанлиқини ашкарилиди. Униң дейишичә, өй йиғивелиш хизмәт гурупписи қурулғиниға 2 йерим айчә болған болуп, бу җәрянда игисиз өйләрниң мәйли асаслиқ, мәйли қошумчә игилири болсун, өзлирини мәлум қилмиған. Нәтиҗидә улар бу өйләрни сетиш һәққидә елан чиқириш арқилиқ, өйниң бир қисим игилирини тапқан яки өйниң пүтүнләй игисиз икәнликини муқимлаштурған.
Мәзкур хизмәт гурупписи 4 кишидин тәшкилләнгән болуп, булардин бири куча шәһәрлик җ х идарисиниң хадими икән. Бу хадимму игисиз өйләрни йиғивелиш һәққидә мәхсус һәрикәт башланғанлиқини ашкарилиди. Униң дейишичә, өйи йиғивелинғанлардин бири 5 йилдин буян җаза муддитини өтәватқан бир мәһбус икән. Бу хадим гәрчә, бу кишиниң ениқ кимлики, җазалиниш сәвәблири һәққидә мәлумат берәлмигән болсиму, әмма у кишиниң узун муддәт кесилип кәткән бири икәнлики, шуниң үчүн өйиниң йиғивелинғанлиқини дәлиллиди. У йәнә игисиз өйләрниң көпинчисиниң лагер вә түрмидикиләрниң икәнликиниму чәткә қақмиди.
Юқирида, кучада бир қисим игисиз өйләрниң йиғивелинғанлиқи вә йиғивелинған өйләрниң көпинчисиниң лагер вә түрмидикиләр икәнлики һәққидә мәлумат бәрдуқ.