Kuchada yighiwélishqa bashlan'ghan igisiz öylerning köpinchisining sahibliri lagér we türmide ikenliki ashkarilanmaqta
2024.04.05
Kucha shehiride yéqinda mexsus igisiz öylerni yighiwélish xizmet guruppisi qurulghan. Bu guruppa nahiyening bir yézisidin 95, yene bir yézisidin 149 igisiz öyni bayqighan. Nöwette da'iriler bu öylerning asasliq we qoshumche igilirini sürüshte qilmaqta. Éniqlashlirimizda, bu öylerdin birining besh yildin buyan jaza ötewatqan bir mehbusqa a'it ikenliki delillendi.
Ilgiri bir chet el muxbiri qeshqer shehirini ziyaret qilghan waqtida köpinche qorulargha qulup sélin'ghanliqi, ishiklerning uzundin béri échilmighanliqini bayqighan. Turpanni ziyaret qilghan bir xongkongluq sayahetchimu ilgiri qaynam-tashqinliqta körgen kochilarning ademsiz chölderep qalghanliqini xewer qilip tarqatqan. Yéqinda chet elge tughqan yoqlap kelgen bireylenmu ürümchide Uyghur ishchi-xizmetchilerning ishtin chüshkendin kéyin döngköwrükke bérip aylinip kélishi buyrulghan. Déyilishiche da'iriler bu arqiliq chong tutqundin kéyin döngköwrükte shekillen'gen chöldereshni chet ellik ziyaretchilerning közidin yoshurushqa urun'ghan. Bu ehwallar chong tutqunning kölimining kenglikidin shepiler bergen bolsa, nöwette ashkariliniwatqan bezi pakitlar shu tutqundikilerning xeterlik aqiwitidin bésharetler bermekte.
Yéqinda kuchaliq muhajirlardin birining radiyomizgha inkas qilishiche, kucha shehiride da'iriler lagér we türmilerde tügep ketken we yaki uzun muddet késiwétilgen mehbuslarning oylirini yighiwélishqa bashlighan we bir qismini sétish üchün bazargha chiqarghan. Déyilishiche 2017-yili chong tutqun bashlan'ghandin kéyin bir qisim kishiler a'ile boyiche tutqun qilin'ghan, bir qisim öylerning sahibi yalghuz bolghanliqi üchün mehellilerde türküm-türkümlep öyler igisiz tashlinip qalghan. Inkasta eskertilishiche, bunche köp tashlanduq öyler, bir tereptin, ilgiriki qarshiliq heriketliri seweblik da'irilerde endishe peyda qilsa, yene bir tereptin, iqtisadiy nep yaritish hewisi qozghighan. Shunga da'iriler mexsus igisiz öylerni yighiwélish xizmet guruppisi qurghan. Xizmet guruppiliri bu öylerni yighiwélishning aldida uqturush tarqitip igilirini sürüshte qilghan. Biraq öy igilirining yiraq yéqindiki uruq-tughqanliri shu öylerdin tutulghan kishilerge chétilip qalmasliq üchün u öylerge ige chiqishtin özlirini qachurghan. Shundaqtimu bu guruppa nöwette bir qisim igisiz öylerning quluplirini yenggüshlep bir qismini sétish üchün bazargha chiqarghan.
Téléfonimizni qobul qilghan kucha kona bazardiki bir ahaliler komitéti mudiri, hazirghiche öz tewelikide 95 igisiz öyning bayqalghanliqini ashkarilidi. Uning déyishiche, öy yighiwélish xizmet guruppisi qurulghinigha 2 yérim ayche bolghan bolup, bu jeryanda igisiz öylerning meyli asasliq, meyli qoshumche igiliri bolsun, özlirini melum qilmighan. Netijide ular bu öylerni sétish heqqide élan chiqirish arqiliq, öyning bir qisim igilirini tapqan yaki öyning pütünley igisiz ikenlikini muqimlashturghan.
Mezkur xizmet guruppisi 4 kishidin teshkillen'gen bolup, bulardin biri kucha sheherlik j x idarisining xadimi iken. Bu xadimmu igisiz öylerni yighiwélish heqqide mexsus heriket bashlan'ghanliqini ashkarilidi. Uning déyishiche, öyi yighiwélin'ghanlardin biri 5 yildin buyan jaza mudditini ötewatqan bir mehbus iken. Bu xadim gerche, bu kishining éniq kimliki, jazalinish sewebliri heqqide melumat bérelmigen bolsimu, emma u kishining uzun muddet késilip ketken biri ikenliki, shuning üchün öyining yighiwélin'ghanliqini delillidi. U yene igisiz öylerning köpinchisining lagér we türmidikilerning ikenlikinimu chetke qaqmidi.
Yuqirida, kuchada bir qisim igisiz öylerning yighiwélin'ghanliqi we yighiwélin'ghan öylerning köpinchisining lagér we türmidikiler ikenliki heqqide melumat berduq.