11-Феврал күни германийәниң мюнхен шәһиридә икки муһим паалийәт өткүзүлгән

Ихтиярий мухбиримиз әркин тарим
2022.02.11
Share on WhatsApp
Share on WhatsApp
11-Феврал күни германийәниң мюнхен шәһиридә икки муһим паалийәт өткүзүлгән “уйғур һәрикити” тәшкилатиниң нобел мукапат намзатлиқиға көрситилгәнликини тәбрикләш паалийитидин көрүнүш. 2022-Йили 11-феврал, мюнхен, германийә.
RFA/Erkin Tarim

11-Феврал күни германийәниң мюнхен шәһиридә икки муһим паалийәт өткүзүлгән. Булардин бири, мюнхендики уйғур җамаити дуня уйғур қурултийиниң рәиси долқун әйса шәрқий түркистан учур мәркизиниң мәсули абдуҗелил қарақаш әпәнди, “илһам тохтини қоллаш” гурупписи мәсули әнвәр җан әпәндиләр, уйғур һәрикити тәшкилатини нобел мукапатиға намзат көрситилгәнликини тәбрикләш паалийити өткүзгән. Паалийәткә мәзкур тәшкилатларниң мәсуллири уйғур һәрикити тәшкилати рәиси рошән аббас ханимға гүл тәқдим қилип тәбриклигән. Биз нәқ мәйданға телефон қилип, долқун әйса әпәндидин бу һәқтә мәлумат игилидуқ. У, дуня уйғур қурултийиға әза икки тәшкилат билән кишилик һоқуқ җәңчиси илһам тохтиниң 2022-йиллиқ нобел тинчлиқ мукапатиға намзат көрситилишиниң дунядики һәр қайси дөләтләрниң шәрқий түркистан дәвасиниң һәққаний бир дәва икәнликини қобул қилғанлиқиниң испати икәнликини, буниңдин қаттиқ сөйгәнликини оттуриға қойди. У, бу мәқсәт билән бүгүн буларни тәбрикләш паалийити елип барғанлиқини билдүрди.

“явропа шәрқий түркистан бирлики” билән германийә баварийә ахбарат мәркизи бирликтә өткүзгән мәтбуат йиғинидин көрүнүш.  2022-Йили 11-феврал, мюнхен, германийә.
“явропа шәрқий түркистан бирлики” билән германийә баварийә ахбарат мәркизи бирликтә өткүзгән мәтбуат йиғинидин көрүнүш. 2022-Йили 11-феврал, мюнхен, германийә.
RFA/Erkin Tarim

Рошән аббас ханим телефон зияритимизни қобул қилип, буниңдин интайин хурсән болғанлиқини тәкитләп мундақ деди: “биз бүгүн чехийәниң пайтәхти пирагадики паалийәтлиримизни ахирлаштуруп, мюнхенға кәлгәнидуқ. Бу йәрдә д у қ рәиси долқун әйса әпәнди, абдуҗелил қарақаш әпәнди вә әнвәр җан әпәндиләр өз тәшкилатлири вә мюнхен җамаитигә вакалитән бизниң уйғур һәрикити тәшкилатиниң бу йиллиқ нобел мукапатиға намзат көрситилгәнликини тәбриклиди. Буниңдин наһайити һаяҗанландуқ. Биз бу шәрәпниң пәқәт бизниң уйғур һәрикити тәшкилатиғила әмәс, бизни қоллаватқан барлиқ тәшкилатларға, уйғур җамаитигә аит икәнликини йәнә бир қетим тәкитлимәкчимиз. Нобел тинчлиқ мукапатиға намзатлиққа көрситилишимизниң нәтиҗиси немә болушидин қәтий нәзәр бу тарихий бир һадисидур. Бу бизниң техиму иптихарлинип, вәтинимизниң азадлиқи үчүн техиму көп тиришчанлиқ көрситишимизгә түрткә болиду дәп ойлаймән”.

“илһам тохтини қоллаш” гурупписи мәсули әнвәрҗан әпәнди “кишилик һоқуқ җәңчиси” илһам тохти нобел тинчлиқ мукапатиға намзатлиққа көрситилгәндин кейин, уйғур һәрикити тәшкилати билән уйғур кишилик һоқуқ қурулушиниңму намзатлиққа көрситилишиниң хитайға урулған күчлүк шапилақ икәнликини билдүрди.

Бүгүн йәни 11-феврал күни мюнхенда “явропа шәрқий түркистан бирлики” билән германийә бавәрийә ахбарат мәркизи бирликтә мәтбуат йиғини өткүзгән. Ахбарат елан қилиш йиғиниға бавәрийә парламенти муавин рәиси маркус риндәрспачәр, тонулған язғучи ралф бауәр әпәнди, уруқ-туғқанлири лагерға қамалған зулпийә қасим вә әсқәрҗан әпәндиләр тәклип бойичә қатнишип сөз қилған. Улар, бейҗиңда өткүзүлгән қишлиқ олимпик мусабиқисиниң кишилик һоқуққа зәрбә бәргәнликини, уйғур қатарлиқларға ирқий қирғинчилиқ елип бериливатқан бүгүнки күндә олимпик мусабиқисигә қатнашқанлиқниң инсанийәткә қарши җинайәткә шерик болғанлиқ икәнликини тәкитләшкән. Бу һәқтә зияритимизни қобул қилған әсқәрҗан әпәнди бу һәқтә мәлумат бәрди.

Әсқәрҗан әпәнди, мәзкур йиғинда баварийә парламенти муавин рәиси маркус риндәрспачәр әпәндиниңму һазир германийәдә һакимийәтни қолида тутуп турған сотсиял демократлар партийәсиниң уйғур сияситини тәнқид қилғанлиқини билдүрди.

Мюнхенда өткүзүлгән ахбарат йиғинида гуваһлиқ бәргән зулпийә қасим ханим йиғиндин алған тәсиратини баян қилди.

11-Феврал күни явропада уйғурлар әң көп олтурақлашқан, дуня уйғур қурултийиниң мәркизий ишханиси җайлашқан германийәниң мюнхен шәһиридики уйғурлар уйғур һәрикити тәшкилати, уйғур кишилик һоқуқ қурулушидин ибарәт икки тәшкилатниң 2022-йиллиқ нобел тинчлиқ мукапати намзатлиқиға көрситилгәнликидин шатлинип тәбрикләшкән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.