Бейҗиңдин тутуп кетилгән режиссор икрам нурмәмәт үстидин үрүмчидә сот ечилғанлиқи дәлилләнди

Вашингтондин мухбиримиз шөһрәт һошур тәйярлиди
2023.11.15
ikram-nurmehmet Яш уйғур режиссор икрам нурмәмәт
Open Domain

Хәлқарадики даңлиқ ахбаратлардин “муһапизәтчи” журнилиниң өткән айда бейҗиңда яшаватқан яш уйғур режиссор икрам нурмәмәтниң үрүмчи сақчилири тәрипидин тутуп кетилгәнлики вә сотлиниш алдида икәнликини хәвәр қилғаниди. Мухбиримизниң үрүмчигә қарита елип барған телефон зиярәтлири давамида икрам нурмәмәт үстидин 27‏-өктәбир күни сот ечилғанлиқи вә тәңритағ районлуқ дөләт аманлиқ әтритиниң қолида тутуп турулуватқанлиқи дәлилләнди. Төвәндә мухбиримиз шөһрәт һошурниң бу һәқтә тәйярлиған пирограммиси диққитиңларда болиду.

 “муһапизәтчи” журнилиниң бу йил 24‏-өктәбирдики хәвиридә баян қилинишичә, икрам нурмәмәт бу йил 5-айниң 29‏-күни бейҗиңдики өзи олтурушлуқ тәвәликниң сақчилири тәрипидин чақиртилған вә үрүмчидин кәлгән 3 нәпәр сақчиға өткүзүп берилгән. У бейҗиңдин елип меңилишниң алдида аяли арқилиқ униң кийим-кечәклири әкәлдүрүлгән. Бу чағда аяли сақчилардин йолдишиниң немә үчүн әкетиливатқанлиқини сориғинида үрүмчи сақчилири “тәкшүрүлидиған бир иши бар” дәп җаваб бәргән; бейҗиң сақчилири болса икрамниң “террорлуққа алақидар бир делоға четилип қалған” лиқи, шуниң үчүн әкетиливатқанлиқини ейтқан. “муһапизәтчи” журнилиниң кимликини ашкарилашқа болмайдиған бир мәнбәгә асасән йәнә баян қилишичә, икрам нурмәмәтниң үрүмчидики аниси икрам үрүмчигә елип келингән күни айродурумға чиқип оғлини көрүвелишқа тиришқан. Әмма сақчилар икрамни анисиға йеқинлаштурмастин йирақтин елип маңған. Аниси оғлиниң 3 сақчи тәрипидин ялап елип меңиливатқан көрүнүшини видийоға еливалған.

 Әнә шу күндин етибарән, икрамниң бейҗиңдики аяли вә үрүмчи 2‏-дохтурханида ишләйдиған аниси, икрам нурмәмәт һәққидә һечқандақ учур алалмиған.

 Биз икрам нурмәмәтниң нөвәттики әһвали һәққидә мәлумат елиш үчүн үрүмчидики алақидар сақчи органлириға телефон қилдуқ. Сайбағ районлуқ сақчи идарисиниң бир хадими өзиниң бундақ бир делодин хәвири йоқлуқини тилға елиш билән бирликтә, билгән тәқдирдиму бу соалға җаваб берәлмәйдиғанлиқиниң бишаритини бәрди.

 Икрам нурмәмәт әслидә түркийәдики мармара университетиниң сәнәт вә сенарийә кәспини 2016-йили пүттүрүп бейҗиңға қайтқан вә бейҗиңда туғулуп өскән бир уйғур қиз билән той қилған. У тйәнҗиндә мустәқил еланчилиқ вә кино-филим режиссорлуқи билән шуғулланған.

 Телефонимизни қобул қилған үрүмчи шәһәрлик сақчи идарисиниң бир әмәлдари, дәсләптә икрам нурмәмәтниң делосидин “түзүк хәвири йоқ” лиқини тилға елиш арқилиқ, әң аз мәлум дәриҗидә билидиғанлиқини ашкарилиди. Арқидин болса, икрам нурмәмәтниң тәңритағ районлуқ сақчи идариси тәрипидин тутуп тәкшүрүлүватқанлиқини тилға алди.

“муһапизәтчи” журнилиниң хәвиридә йәнә икрам нурмәмәтниң үстидин сот ечилиш алдида икәнлики, сот күниниң 25-өктәбир икәнлики қәйт қилинған. Телефонимизни қобул қилған, әмма өзини ашкарилашни халимиған үрүмчидики бир сот хадими икрам нурмәмәтниң сотиниң 27-өктәбир күни ечилғанлиқи, сотта икрамниң барлиқ әйиблимиләрни рәт қилғанлиқи, нәтиҗидә сот һөкүминиң келәр йили 1-айға қалдурулғанлиқини мәлум қилди. Телефонимизни қобул қилған тәңритағ районлуқ дөләт аманлиқ әтритиниң бир хадими, икрам нурмәмәтниң 27-өктәбир күни сотланғанлиқидин хәвири барлиқи, әмма, сотниң конкрет җәряни, җүмлидин икрам нурмәмәтниң әйибнамини немә дәп рәт қилғанлиқи һәққидә юқири органлардин рухсәт алмай туруп җаваб берәлмәйдиғанлиқини ейтти.

Мәлум болушичә, икрам нурмәмәт мустәқил филим вә елан ишләп өз алдиға игилик тикләш үчүн тиришчанлиқ көрситиватқан яшлардин болуп, униң һазирға қәдәр ишлигән филимлири гәрчә һөкүмәткә қарши бир мәйданда болмисиму, әмма һөкүмәтниң тәшвиқатиға яндишидиған шоарлардин халий икән. Йәнә мәзкур хадимниң дейишичә, сотта икрам нурмәмәт түркийәдә оқуған мәзгилидики турмуш вә иҗтимаий мунасивәтлиридин “мәсилә” чиққанлиқи үчүн әйибләнгән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.