Aqsu wilayetlik teshwiqat bölüm bashliqi ilham rozining türmidin chiqip 5 kündin kéyin wapat bolghanliqi delillendi

Norwégiyediki Uyghuryar fondining radiyomizgha inkas qilishiche, , aqsu wilayetlik partkom teshwiqat bölümining sabiq bashliqi ilham rozi ötken hepte türmidin chiqip 5 kündin kéyin, mushu 7-mart, yeni seyshebe küni jan üzgen. Muxbirimizning téléfonini qobul qilghan aqsu wilayetlik partikomdiki alaqidar xadimlar, uning ölüm xewirini inkar qilmasliq bilen birlikte, u wapat bolushtin awwal türmide ikenlikini delillidi. Töwende muxbirimiz shöhret hoshurning bu heqte teyyarlighan programmisi diqqitinglarda bolidu.

Uyghuryar fodining yétekchisi abduweli ayup ependining alaqidar qanalliri arqiliq igilishiche, aqsu wilayetlik partkom teshwiqat bölümining sabiq mu'awin bashliqi ilham rozi türmidin qoyup bérilip besh kündin kéyin jan üzgen. Déyilishiche, aqsu sheherlik igerchi saqchixana xadimliri jaza mudditini ötewatqan ilham rozini bingtüendiki bir türmidin élip chiqip aqsu shehiridiki yashan'ghanlar sanatoriyesige orunlashturghan؛ türmidin éghir késel halette élip chiqilghan ilham rozi sanatoriyede 5 kün qalghandin kéyin hayatidin ayrilghan.

Melum bolushiche, aqsu wilayetlik partkom erziyet bölümi bashliqi eyni waqitta wilayetlik siyasiy qanun komitétiningmu bir ezasi bolup, u ilham rozining tutulush we késilish jeryanidin xewerdar iken. Mezkur idare bashliqi deslepte ilham rozining ehwalidin xewersizlikini éytti, emma ilgirilep sorighan so'allirimizdin kéyin, ilham rozining wapatidin xewiri barliqini étirap qildi. Emma, xizmet mexpiyetlikini seweb körsitip, ilham rozining tutulush, késilish we türmidin qoyup bérilish sewebliri heqqide melumat bérishni ret qildi.

Abduweli ayupning tonushturushiche, 1965-yili shayarda tughulghan ilham rozi 1988-yili qeshqer pédagogika oniwérsitétining edebiyat fakultétini püttürgen. U xizmetke chiqqandin kéyin ijtima'iy pa'aliyetchanliqi we natiqliqi bilen jem'iyette tézla tonulghan. Bir mezgil shayar nahiyelik ottura mektep, shayar nahiyelik ma'arip idariside mudir we aqsu wilayetlik ma'arip bashqarmisida bashqarma bashliqi bolup xizmet qilghan ilham rozi 2010-yillardin kéyin aptonom rayon boyiche alqishqa sazawer natiq bolup bahalan'ghan we wilayetlik teshwiqat bölümige mu'awin bashliq bolup östürülgen. U xizmet jeryandiki nutuqlirida, yalghuz xitay terepning teshwiqatini qilipla qalmastin, anglighuchilirigha yene milliy ang we milliy roh terbiyesinimu élip barghan. Bolupmu uning yazghuchi yalqun rozi bilen sha'ir abduqadir jalalidinni bir qanche qétim léksiye sözleshke dewet qilishi, uning tutqun qilinishi we uzun késilishige seweb bolghan.

Melum bolushiche, uning perzentliri dadisining kompartiye teshwiqatini qilghanliqi we u uyushturghan léksiyelerdiki mesililerde dadisining mes'uliyiti yoqluqini bildürüp, sot hökümige naraziliq erzi sun'ghan.

Yuqiriqi erziyet idarisi bashliqi, ilham rozining perzentlirining naraziliq erzining aptonom rayonluq sot teripidin ret qilin'ghanliqini ashkarilash arqiliq, merhumning wapatidin awwal türmide ikenlikini delillidi.

Uyghuryar fondining ilgiriki éniqlashliridin melum bolushiche, ilham rozi2019‏-yili oghli bextiyar ilham bilen birlikte tutqun qilin'ghan. Bextiyar ikki yilche “Terbiye” len'gendin kéyin qoyup bérilgen. U özi bolsa, bölgünchilik bilen eyiblinip 15 yilliq késiwétilgen.

Ilham rozining tutqun qilinishtin awwal saq-salamet ikenliki melum, emma türmide néme sewebtin we qandaq késelge giriptar bolghanliqi melum emes.

Téléfonimizni qobul qilghan bir saqchi xadimi, ilham rozining igechi saqchixanisi teripidin türmidin achiqilip chonglar sanatoriyesige orunlashturghanliqini we sanatoriyege kélip 5 kündin kéyin wapat bolghanliqini delillidi.

Emma xadimlar, ilham rozining néme üchün doxturxanigha yaki öyige apirilmastin sanatoriyege aprilghanliqi heqqide melumat bermidi. Abduweli ayupning ilgiri sürüshiche, buning sewebi, uning késilining axirqi basquchqa kélip qalghanliqi we Uyghur élida sanatoriyelerning 2017-yilidin kéyin lagér ornida ishlitiliwatqanliqidur.