Dangliq zhurnalist mehdi hesen ilham toxti we Uyghur mesilisini otturigha qoyghan

Zhurnalist mehdi hesen xitay türmisidiki Uyghur ziyaliysi ilham toxtining qizi jewher ilhamni tor arqiliq ziyaret qilmaqta. 2021-Yili 27-öktebir.

Zhornalist mehdi hesen siyasiy mesililer téma qilin'ghan “Mehdi hesen show” namidiki téléwiziye chatma programmisi bilen tonulghan. U egeshküchisi milyondin ashidighan dangliq zhornalist we programma riyasetchisi.

27-Öktebir küni bérilgen “Mehdi hesen show” téléwiziye chatma programmisida, u mexsus Uyghur weziyiti we tutqundiki Uyghur ziyaliysi ilham toxti mesilisini otturigha qoyghan.

Mehdi hesen mezkur programmida awwal amérika döletlik waskétbol birleshmisi (NBA) ning türk mahiri enes kanterning “Tibetlerge erkinlik”, “Uyghurlargha erkinlik” dégen témilardiki xitaygha qarshi pa'aliyetliri heqqide toxtalghan. U yene Uyghur mejburiy emgiki ishlitilgen nayké qatarliq tenterbiye ayaqlirini bayqut qilish herkiti we nayké shirkitining jawabi heqqide toxtalghan. U nöwette Uyghurlar mejburiy emgekke sélin'ghan herqandaq mehsulatning amérika bashchiliqidiki gherb döletliri teripidin cheklen'genlikini tekitligen.

Andin u xitay hökümitining Uyghurlargha qaratqan basturushliri heqqide kishilik hoquq teshkilatliri élan qilghan doklat we bérilgen xewerlerni analiz qilghan.

U bu heqte toxtilip, milyondin artuq Uyghurning “Qayta terbiyelesh” namida lagérlargha qamilishi, Uyghurlarning millet boyiche irqiy qirghinchiliqqa uchrawatqanliqidek weziyetning dunyaning diqqitini qozghawatqanliqi, téxi ötken heptidila 43 döletning xitay hökümitining Uyghurlargha qaratqan basturushini eyibligenliki, xitayning Uyghurlarni basturushigha qarita we tedbir élinish tekitliniwatqanliqi qatarliq ehwallarni anglatqan.

Mehdi hesen 27-öktebirdiki programmisda yene tutqundiki Uyghur ziyaliysi ilham toxtining tutqun qilinish sewebi heqqide mexsus toxtalghan.

U ilham toxtining xitay hökümiti teripidin “Bölgünchilik” bilen eyiblinip, muddetsiz qamaqqa höküm qilinishigha, ilham toxtining Uyghurlarning weziyitini dunyagha anglatqanliqi we Uyghurlarning xitaydiki barawerliki, qanuniy heqlirini telep qilghanliqi sewep bolghanliqini bildürgen. U xitay hökümitining ilham toxtigha erkinlik bérishi kéreklikini tekitligen.

Mehdi hesen 27-öktebirdiki “Mehdi hesen show” programmisida yene ilham toxtining amérikadiki qizi jewher ilhamnimu alahide ziyaret qilghan.

Mehdi hesen jewherdin uning 2012-yili béyjing ayrodromida dadisidin ayrilip, amérikagha kélish jeryani, oqush tarixi we uning nöwettiki Uyghurlar weziyitige bolghan qarshini sorighan.

Jewher uning so'aligha jawab bérip, amérikigha kelgenliki üchün özini teleylik dep hésablaydighanliqi bildürgen. U ötken 8 yérim yil jeryanida her xil müshkilatlarni yéngip, tutqundiki dadisining erkinliki üchün küresh qilghanliqini we axirida bügünkidek bir Uyghur pa'aliyetchige aylan'ghanliqini bildürgen.

27-Öktebirdiki “Mehdi hesen show” programmisi élan qilin'ghandin kéyin, Uyghurlar we Uyghur weziyitige köngül bölidighan kishilik hoquq pa'aliyetchilirining yuquri bahasigha érishken.

“Xelq'ara kishilik hoquq küzütüsh teshkilati” ning dériktori sofiy richardson xanim, mehdi hesenning bu programmisi heqqide toxtilip, bu programma “Jasaretning namayendisi” dégen.

Gollandiyediki Uyghur pa'aliyetchisi asiye Uyghur xanimmu ziyaritimizni qobul bu heqte öz qarashlirini otturigha qoydi.

U mehdi hesendek bir tonulghan zhornalistning milyonlighan egeshkuchisi bolghan “Mehdi hesen show” programmisida mexsus Uyghurlarning weziyitini we ilham toxtining ehwalini anglitishi, Uyghur mesilisining xelq'aralishida muhim ehmiyetke ige, dédi.

Zhornalist mehdi raza hesen 1979-yili tughulghan. U özining siyasiy weziyet heqqidiki analizliri bilen tonulghan. Uning “Mehdi hesen show” programmisi 2020-yili öktebirde bashlan'ghan bolup, mezkur téliwiziye programmisining egeshkuchiliri milyondin ashidiken. Zhornalist mehdi hesen ilgiri “Mehdi hesen show” programmisida, amérikadiki Uyghur pa'aliyetchiliridin amérika diniy erkinlik kométitining mu'awin re'isi nuri türkel ependini ziyaret qilip, Uyghurlarning weziyiti heqqide mexsus programma ishligen idi.