Или педагогика университетиниң оқутқучиси абдурешит хәмит қәсәмнамигә қол қоймиғанлиқи сәвәблик тутқун қилинған

Мухбиримиз шөһрәт һошур
2022.05.16
Share on WhatsApp
Share on WhatsApp
Или педагогика университетиниң оқутқучиси абдурешит хәмит қәсәмнамигә қол қоймиғанлиқи сәвәблик тутқун қилинған Или педагогика университетиниң компйотер оқутқучиси абдуришит хәмит әпәнди.
Oqurmen teminligen

Инкас қилинишичә, или педагогика университетиниң компйотер оқутқучиси абдуришит хәмит 2016‏-йили уйғур районида “үч хил күч” кә қарши баянат елан қилиш вә хитай компартийәсигә садақәт билдүрүш долқуни қозғалғанда, қәсәмнамигә қол қоймиғанлиқи үчүн үстидин тәкшүрүш елип берилған вә бир қатар аталмиш “җинайәт” ләр артилип тутқун қилинған. Мухбиримизниң ениқлашлири давамида, абдуришит хәмитниң тутқунда икәнлики дәлилләнди.

Мәлум болушичә, абдуришит хәмит, или педагогика университетиниң сабиқ мудири хәмит қадирғуҗа дегән кишиниң оғли болуп, у мәзкур университет қоросида чоң болған. Дейилишичә, 1995‏-йили шинҗаң университетиға қобул қилиған абдуришит хәмит 2000‏-йили мәзкур университетиниң компйотер кәспини пүттүргән. У ингилиз тилини һәм кәспий саһәсидә һәм иҗтимаий һаятта қолланғудәк дәриҗидә пухта өгәнгән. У 2000‏-йили или педагогика университетиниң учур-техиника инститотиға оқутқучи болуп ишқа чүшкәндә, кәспкә пухтилиқи биләнла әмәс, бәлки һәққанийәтчи миҗәзи биләнму тезла көзгә көрүнгән. Мәктәпкә қобул қилинидиған оқуғучиларниң милләтләр нисбитидики тәңсизликтин тартип, мәктәп оқутқучилириниң тәминат тәқсиматидики егиз-пәсликләргә қәдәр, һәммә мәсилидә у һәр вақит пәрқлиқ вә наразилиқ пикрини билдүрүп кәлгән; нөвити кәлгәндә мәктәп рәһбәрлири билән муназирилишиштинму өзини тартмиған. Нәтиҗидә у мәктәптики уйғур вә қазақ оқутқучиларниң ғәйрий рәсмий бир вәкилигә айлинип қалған. Униң бу характери мәктәпниң хитай рәһбәрлири тәрипидин әйни чағда “җидәлхорлуқ” дәп аддийла атилип кәлгән болса, 2017‏-йилиға кәлгәндә “миллий бөлгүнчилик” вә “икки йүзлимичилик” дәп әйиблнип, тутқун қилинишқа асас болған.

Биз абдуришит хәмитниң әһвалини ениқлаш үчүн ғулҗадики маарип тармақлириға телефон қилдуқ. Или педагогика ониверситети оқутуш башқармисиниң хадими нөвәттә мәктәптики оқутқучилар тизимликидә абдуришит хәмит исимлик бир оқутқучиниң йоқ икәнликини баян қилиш арқилиқ, униң тутқунда икәнлик еһтималлиқини оттуриға чиқарди.

Абдуришит хәмитниң чәт әлдики бир савақдишиниң елхәт арқилиқ радийомизға йәткүзүшичә, абдурушит хәмит 2016‏-йили уйғур елида “үч хил күчкә қарши туруш” вә “хитай компартийисигә садақәт билдүрүш” долқуни қозғалғанда, мәктәп сиясий бөлүми тәйярлиған қәсәмят баянатиға қол қоймиған вә бу сәвәплик шу йилниң ахрида униң үстидин тәкшүрүш елип берилған. Мәктәп интизам тәкшүрүш кометити тәрипидин елип берилған бу тәкшүрүштә униң мәктәп рәһбәрлири билән илгирики талаш-тартишлириму қайтидин оттуриға чиқирилип, униңға “миллий өчмәнлик туйғуси пәйда қилиш” вә “мәктәптә миллий қутратқулуқ қилиш” қатарлиқ сиясий қалпақлар кәйдүрүлгән. Нәтиҗидә униң делосини қанун тармақлириға өткүзүп бәргән. Қанун тармақлири тәкшүрүшни йәнә бир қәдәм кеңәйтип, униң компйотерини тәкшүргән. Тәкшүрүш җәрянида униң “там атлап чәкләнгән учурларни көргәнлики” вә “чәт әлликләр билән торда алақилашқанлиқи” байқалған. Буниң билән униң “җинайити”, “миллий бөлгүнчилик ғәризидә болуш” дәп бекитилгән.

Или педагогика университетиниң интизам тәкшүрүш хадими, абдуришит хәмитниң буниңдин бәш йил бурун, йәни 2017‏-йили тутқун қилинғанлиқини ашкарилиди. Әмма у абдуришит хәмитниң кесилгән яки кесилмигәнлики вә нәдә тутуп туруливатқанлиқи һәққидә мәлумат берәлмиди.

Мәлум болишичә, абдуришит хәмитиниң ата-анисидин бир тәрәп қазақ болуп, у 2010‏-йиллири уруқ-туғқанлирини йоқлаш үчүн қазақситанға чиққан. У иккинчи қетимлиқ қазақситан сәпиридә түркийәниму зиярәт қилип компйотер саһәсидики кәсипдашлири билән көрүшкән. Дейилишичә, униң нормал уруқ-туғқан вә достлар зиярити “бөлгүнчи тәшкилатлар вә шәхсләр билән тәшкилий алақә орнитиш” дәп қарилип, униңға “дөләтни парчилашқа урунуш” дегән җинайәт артилған.

Инкаста йәнә әскәртилишичә, абдуришит хәмит чәт әлликләр билән қилған алақиси вә халисанә тәрҗиманлиқ хизмити үчүн әң көп сорақ қилинған.

Университетниң йәнә бир хадимиму абдурушит хәмитниң тутқунда икәнликини дәлиллиди, әмма униң кесилгән яки кесилмигәнлики һәққидә мәлумат бәрмиди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.