Или педагогика университети марксизм институтиниң секретари абдулла исмаилниң тутқунда икәнлики дәлилләнди

Мухбиримиз шөһрәт һошур
2022.05.02
Share on WhatsApp
Share on WhatsApp
Или педагогика университети  марксизм институтиниң секретари абдулла исмаилниң тутқунда икәнлики дәлилләнди
Photo: RFA

Йеқинда ғулҗа вәзийитидин хәвәрдар кишиләрдин бири радийомизға инкас  йоллап, или педагогика университетидин 20 гә йеқин оқутқучиниң тутулуп кәткәнликини  вә  булардин 8 нәпириниң исимлирини  мәлум қилди. Мухбиримизниң телефон зиярәтлири давамида,  мәлум қилинғанлардин  6  нәпириниң  тутқунда икәнлики дәлилләнди. Дәлиллинишичә,  марксизм институти партийә ячейкисиниң секретари абдулла исмаил “икки йүзлимичилик” билән әйиблинип 2018 ‏-йили тутқун қилинған. Төвәндә мухбиримиз шөһрәт һошурниң бу һәқтә тәйярлиған программиси диққитиңларда болиду. 

Радийомизға кәлгән инкаста баян қилинишичә, или педагогика университетиниң  тәҗрибилик  оқутқучиси,  иқтидарлиқ иҗтимаий тәшкилатчи, университет марксизм институтиниң партийә ячейка секретари абдулла исмаил 2018 ‏-йили тутқун қилинип  из-дерәксиз ғайиб болған. Инкаста абдулла исмаилниң делосиниң бир тәрәп қилинишида мәктәп тәрәптин маслишип хизмәт қилған икки кишиниң исим вә телефон номурлири хатириләнгән. Булардин бири, мәктәп оқутуш ишлири  башқармисиниң бир хадими болуп, бу хадим дәсләптә абдулла исмаилни тонумайдиғанлиқини баян қилди, биз соаллиримизни тәкрарлиғандин кейин, тонуйдиғанлиқини билдүргән болсиму, өзиниң мувапиқ бир җайда әмәсликини әскәртип, униң нөвәттики әһвали һәққидә мәлумат бериштин өзини қачурди.

Абдулланиң нөвәттә голландийәдә яшаватқан оттура мәктәптики савақдиши,  голландийә шәрқий түркистан уйғур бирлики тәшкилатиниң  сабиқ рәиси пәрһат қадирниң баян қилишичә, абдулла исмаил оттура мәктәптики  мәзгилидә дәрстә әлачилиқи биләнла әмәс, йәнә алаһидә путбол маһарити вә иҗтимаий мунасивәт  қабилийити биләнму даң чиқарған.  1962 ‏-Йили сүйдөңдә туғулған  абдулла исмаил, 1981 ‏-йили  или педагогика институтиниң әдәбият кафедрасиға қобул қилинған вә институтни 1985 ‏-йили пүттүрүп, шу йили мәктәптә   оқутқучи болуп қепқалған.

Инкаста дейилишичә, университет  марксизм институтиниң партийә ячейка секретари болуп вәзипә өтәватқан   абдулла исмаил 2017 ‏-йилдин башлап, мәктәптә гуманлиқ шәхсләр қатариға киргүзүлгән вә арилап  сорақ қилинишқа башлиған. Дәсләпки сорақ  мәктәп интизам тәкшүрүш комитети тәрипидин елип берилған. Инкаста йәнә шу йилдики  тәкшүрүшкә мәсул болған интизам тәкшүрүш комитети хадиминиң телефон номуриму хатириләнгән. Телефонимизни қобул қилған мәсул хадим, өзиниң абдулла исмаил билән 5 йилчә аввал көрүшкәнликини тилға алди. У йәнә өзиниң абдулла исмаил тоғрилиқ материял топлап алақидар орунға йоллиғанлиқини ашкарилиди.  Инкаста йәнә абдулла исмаилниң бирқанчә хил аталмиш җинайәт билән қариланғанлиқи қәйт қилинған, әмма конкрет қайси җинайәт икәнлики тилға елинмиған. Мәзкур интизам тәкшүрүш хадими әйни чағда абдулланиң иккийүзлимичилик гумани билән тутулғанлиқини ашкарилиди.

Мәлум болушичә, дуня уйғур қурултийиниң муавин баш тәптиши бәхтияр насир әпәндиму әйни йилларда  абдулла исмаил оқутқучилиқ  қилған мәктәптә оқуған. Дейилишичә, абдулла исмаил, бейҗиңдики бир университетта  пәлсәпә илмидә  докторлуқ унваниға еришкән.

 Или педагогика университети интизам тәкшүрүш комитетиниң мәзкур хадими, абдулланиң университетниң бирқанчә мәмури оргинида әмәл тутқанлиқини мәлум қилиш билән бирликтә, униң 2018 ‏-йили тутқун қилинғанлиқини дәлиллиди.

Мәлум болушичә, абдулла исмаил “или гезити” қатарлиқ бир түркүм гезит- журналларда, марксизм нәзәрийәсигә аит тәтқиқат мақалилириниму елан қилған.

Һөрмәтлик радийо аңлиғучилар, юқирида или педагогика университети марксизм институтиниң секретари абдулла исмаилниң тутқунда икәнлики һәққидә  аңлитиш бәрдуқ.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт