"Élishqu weqesi" de yarilan'ghan kent sékrétari xizmitidin istépa bergenliki üchün lagérgha ekétilgen

Muxbirimiz shöhret hoshur
2019-07-30
Élxet
Pikir
Share
Print
2014-Yilidiki yeken "Élishqu weqesi" de xitay eskerliri teripidin ahalilerge qétip étiwétilgen döngbagh yéza bashliqi ghulam toxti we yéziliq intizam tekshürüsh komitétining sékrétari abdughéni turdi.
2014-Yilidiki yeken "Élishqu weqesi" de xitay eskerliri teripidin ahalilerge qétip étiwétilgen döngbagh yéza bashliqi ghulam toxti we yéziliq intizam tekshürüsh komitétining sékrétari abdughéni turdi.
oqurmen teminligen

Melum bolushiche, 5 yil awwal yeken "Élishqu weqesi" de yéza bashliqi ghulam toxti bilen birlikte weqe yüz bergen neq meydan'gha bérip hökümet terepte turup xizmet qiliwatqan kent sékrétari ablimit ömer xitay eskerliri özlirige qaritip perqlendürmey oq chiqarghandin kéyin neq meydandin qachqan we qéchish jeryanida étizliqtiki bir yardin yiqilip puti sunup ketken. U shuningdin kéyin salametlikining nacharliqi seweblik xizmettin istépa bergen. Aridin 3 yil ötkende, yeni 2017-yili uning ene shu qétim xizmettin istépa bérishi "Diniy esebiylikning alamiti" dep qarilip, yighiwélish lagérigha ekétilgen.

Türkiyede yashawatqan, emma bixeterliki seweblik ismini ashkarilashni xalimaydighan muhajirlardin biri 2014-yilidiki yeken "Élishqu weqesi" de yarilan'ghan 26‏-kent sékrétari ablimit ömerning shu chaghda salametlik ehwali seweblik xizmitidin istépa bergenliki we eyni chaghda bu istépani toghra chüshen'gen da'irilerning aridin 3 yil ötkende, ehwalgha qaytidin qarap chiqip "Diniy esebiylikning we hökümetke qarshiliqning alamiti" dep békitkenliki we uni yighiwélish lagérigha soliwalghanliqini ashkarilidi.

Biz bu uchurning toghra yaki xataliqini delillesh üchün yerkendiki alaqidar organlargha téléfon qilduq. Yerkendiki melum saqchixanining xadimlardin biri ablimit ömer dep birini tonumaydighanliqini bildürse, yene bir saqchixanidiki bir xadim "Élishqu weqesi" ge alaqidar herqandaq bir uchurni ashkarilashqa bolmaydighanliqini bayan qildi. Axirida téléfonimizni qobul qilghan yekendiki yene bir saqchi xadimi 17 yilliq kent sékrétari ablimit ömerning lagérda ikenlikini delillidi. Déyilishiche, ablimit ömer weqe yüz bergen küni yéza bashliqi ghulam toxtining téléfonidiki buyruqigha bina'en weqe yüz bergen neq meydan'gha yétip kelgen we yéza bashliqi bilen birlikte atalmish weqe chiqarghuchilarni saqchilargha teslim bolushqa dewet qilghan. Emma del mushu mezgilde xitay eskerliri atalmish weqe chiqarghuchilargha qarita qara-qoyuq oq chiqarghan. Yéza bashliqi ghulam toxtigha oq tégip yerge yiqilghanliqini körgen ablimit ömer neq meydandin qéchip ming teslikte jénini qutquzghan. Bu jeryanda étizliqtiki bir yardin yiqilip bir puti sunup ketken. Yekendiki saqchi xadimliridin biri ablimit ömerning "28-Iyul weqesi" yüz bergen küni xizmet munasiwiti bilen neq meydanda barliqi we yarilan'ghanliqini delillidi.

Türkiyediki yene bir yekenlik muhajir (shexsiy bixeterlik tüpeyli ismini ashkarilashni xalimaydighan) ning yene déyishiche, shu chaghda Uyghurlarning ichidin yarilan'ghan we yaridarlarning yarisini tangghan barliq kishiler, weqege arilashqan bolsun yaki bolmisun, omumyüzlük tutqun qilinip késilgen yaki az dégende 6 ay qamaqta yatqan. Emma ablimit ömerning neq meydan'gha xizmet munasiwiti bilen barghanliqi weqede ölgen yéza bashliqi ghulam toxtining téléfon xatirisidin melum bolghachqa bir ayla qamaqta yatqandin kéyin gunahsiz dep qoyuwétilgen. Yekendiki melum saqchixanining bir saqchisi ablimit ömerning tutulush sewebi heqqide éniq melumat bérelmidi.

Türkiyediki yuqiriqi yekenlik kishining bayan qilishiche, yéqinqi 3 yildin buyan ilgiri hökümet xizmitini ret qilghan we yaki xizmettin istépa bergenlermu "Diniy esebiylik" bilen yuqumlinish gumani bilen tekshürülgen we soraqqa tartilghan. Yekenlik muhajirmu ablimit ömerning salametliki seweblik xizmettin istépa bérishini da'irilerning uni eyni chaghdiki tutqun heriketliride wezipidin qéchish dep qaralghanliqi we buni "Diniy esebiylikning tesiri" dep békitkenlikini melum qildi. Mezkur saqchi xadimi ablimit ömerning puti sun'ghanliqi üchün salametliki nacharlashqanliqi we xizmettin istépa bergenlikini delillidi. Emma u sékrétar ablimit ömerning "Élishqu weqesi" de xitay eskerlirining oqidin qéchish jeryanida puti sun'ghanliqidin xewersizlikini éytti.

Biz mezkur weqe yüz bergen yili weqede ölgen atalmish "Inqilabiy qurban" yéza bashliqi ghulam toxtining ayalini ziyaret qilghan iduq. Bu ayal yoldishining xitay terep dégendek atalmish "Térrorchilar" teripidin emes, belki xitay eskerliri teripidin étip tashlan'ghanliqini delilligen idi. Weqede ölgen yene bir atalmish "Inqilabiy qurban" yéziliq intizam tekshürüsh komitétining sékrétari abdughéni turdining ayalimu yoldishining pichaqta emes, belki oqta ölgenlikini tilgha élip, xitay eskerlirining qara-qoyuq oqqa tutqanliqi üstidin shikayet qilghan idi.

Toluq bet