"Ürümchi sübhi öy mülük shirkiti" ning xojayini ilyas memetning tutqunda ikenliki ashkarilandi

Muxbirimiz shöhret hoshur
2019-04-05
Élxet
Pikir
Share
Print
Ghulijidiki sunhi soda sariyi.
Ghulijidiki sunhi soda sariyi.
Social Media

2001‏-Yili ürümchide qurulghan, kéyinche ghulja, korla we yekenlerde tarmaq shirkitini échip öy-mülük sodisida qed kötürgen "Ürümchi sübhi öy-mülük shirkiti" ning xojayini ilyas memet 2017‏-yilining béshidila tutqun qilin'ghan. Bu heqte bir yilning aldida radiyomizgha kelgen uchurda uning ghuljida tutup turuluwatqanliqi melum qilin'ghan idi. Muxbirimizning yéqinqi éniqlashliri dawamida ghuljidiki alaqidar saqchi xadimliri ilyas memetning tutulghanliq xewirini inkar qilmidi.

Hörmetlik radi'o anglighuchilar, ghulja weziyitidin xewerdar kishilerdin biri ötken yili radiyomizgha uchur yollap, "Ürümchi sübhi öy-mülük shirkiti" ning diréktori ilyas memetning tutqunda ikenlikini melum qilghan idi. Ghuljidiki alaqidar saqchi xadimliri ilyas memetning nöwettiki nöwettiki ehwali heqqide melumat bérelmidi. Ghulja weziyitidin xewerdar kishi ilyas memetning 2017‏-yili bir qétim tutup qoyup bérilgenliki, 2018‏-yili qaytidin tutulghanliqini melum qilghan idi. Ilyas memet we uning a'ile ehwalidin xewerdar kishilerdin biri bügün radiyomizgha uchur yollap, ilyasning tunji qétim 2017‏-yili 5‏-ayda tutulghanliqi we guchung qamaqxanisida 100 kün yatqanliqi, uningdin kéyin 2018‏-yili 3‏-ayda ghuljidiki xizmet binasidin qayta tutup kétilgenlikini ashkarilidi.

Melum bolushiche, ilyas memet Uyghur rayonida öy-mülük tijaritide közge körün'gen aldinqi qatardiki sodigerlerdin biri bolup, u ürümchide "Wisal méhmanxanisi", "Sübhi soda sariyi" qatarliq binalarni salghandin kéyin korla we ghuljidimu öz shirkiti namida soda saray we ahaliler binalirini saldurghan iken. Xitayche tor arxipliridiki xewerlerde qeyt qilinishiche, "Ürümchi sübhi öy-mülük shirkiti" 2001 ‏-yili qurulghan. Kéyinche bu shirketning korla, yeken we ghulja tarmaqlirimu qurulghan. Téléfonimizni qobul qilghan yene bir saqchi xadimi "Sübhi soda sariyi" ning sahibi ilyas memetning tutqunda ikenlikini ret qilmidi. U bu türdiki uchurlarning mexpiy tutulidighanliqini tekitlidi. 

Melum bolushiche, bu yil 48 yashqa kirgen ilyas memet eslide ghulja nahiyisining xudiyaryüzi yéza geme kentidin bolup, u deslepte tijaret hayatini dadisi niyaz memet bilen birlikte qaq sodisidin bashlighan. Kéyin iniliri ghiyas niyaz we waqqas niyazlar bilen birlikte öy-mülük sodisigha kéngeytken. Besh perzentning dadisi bolghan ilyas memet birqanche yilning aldida türkiye we amérika qatarliq döletlerni ziyaret qilghan. Uning tutqun qilinishida uning chet'el sayahitidin yaki xeyr-saxawet ishliridin chataq tépilghanliqi melum emes.

Toluq bet