Xoten bostan meschitining imami tursun toxtaxun 500 kishilik bayraq chiqirish yighinida tutqun qilin'ghan

Muxbirimiz shöhret hoshur
2019-10-31
Élxet
Pikir
Share
Print
Téz sürette köpiyiwatqan "Yépiq terbiyelesh lagéri" yeni xitayning jaza lagéridin birining körünüshi. 2018-Yili 3-dékabir, atush.
Téz sürette köpiyiwatqan "Yépiq terbiyelesh lagéri" yeni xitayning jaza lagéridin birining körünüshi. 2018-Yili 3-dékabir, atush.
AP

Muxbirimizning xoten'ge qarita élip barghan téléfon ziyaretliri dawamida xoten bostan meschitining imami tursun toxtaxunning aldinqi yili sultanem mehelliside ötküzülgen bir bayraq chiqirish yighinida 10 nechche sepdishi bilen birlikte jama'etning köz aldida tutup kétilgenliki ashkarilandi. Déyilishiche, shu küni xadimlar 500 kishilik jama'etning aldida tursun toxtaxun qatarliq 10 nechche kishining ismini chaqirip, ularni saqchi mashinisigha bésip élip mangghan. Emma ularning néme üchün tutulghanliqi heqqide shu künimu we uningdin kéyinmu héchkimge melumat bermigen.

Uyghur rayonida 3 yildin buyan dawam qiliwatqan yighiwélish lagérlirigha adem toplashta saqchilar köpinche hallarda öz ishxanilirida olturup ahalilerni chaqirtip ekélish yolini tallighan bolsa, bezide yérim kéchide öyige bésip kirip ahalilerning béshigha qara xalta kiydürüp élip méngish yolini tallighan. Emma yene bezi chaghlarda bolsa köpchilikning aldida otturigha tartip achiqish we köpchilikning aldida qoligha koyza sélip élip méngish yolini tutqan. Saqchilarning bundaq perqliq yol tutushta tutqunlarning atalmish "Jinayiti" ning xaraktérini asas qiliwatqanliqi yaki öz meyli we keypi boyiche ish tutuwatqanliqi melum emes.

Téléfonimizni qobul qilghan xotendiki bir kent sékrétari xoten chong bazardiki bostan meschitning imami tursun toxtaxunning ahaliler kométida ötküzülgen bir bayraq chiqirish yighinida 500 kishilik bir jama'etning köz aldida tutulup kétilgenlikini ashkarilidi. Uning déyishiche, 30 nechche yashlardiki imam tursun toxtaxun shu küni 10 nechche kishi bilen birlikte ismi oqulup, otturigha élip chiqilghan we saqchi mashinisigha bésip élip kétilgen.

Ötken yili xitay da'iriliri "Shinjang géziti" ning bash muherrir ilham weli qatarliq 4 kishini yighin zalida köpchilikning aldida tutqun qilghan we qollirigha koyza sélip élip mangghan idi. Yene yéqinqi éniqlashlirimizda korla ma'arip idarisining sabiq mu'awin bashliqi sherep héytning bir yighin zalida qoligha koyza sélinip élip méngilghanliqi melum bolghan idi. Melum bolushiche, bular yighin zalida atalmish "Bölgünchilik" we "Ikki yüzlimichilik" bilen eyiblinip, yighin ehli bulardin ibret élish heqqide agahlandurulghandin kéyin élip méngilghan. Emma bostan meschitning imami sepdashliri bilen birlikte köpchilikning aldida ismi oqulghanda ularning néme üchün tutuluwatqanliqi we nege ekitiliwatqanliqi heqqide köpchilikke héchqandaq melumat bérilmigen.

Ilgiri xotende bir yil qamaqxana hayatini bashtin kechürgen sabiq mehbus memettursun osman ötken aylarda ziyaritimizni qobul qilghan mezgilde xitay terepning gumandarlarni tutush, bashqurush we soraq qilish jeryanida jem'iyette wehime peyda qilishni asasi meqset qilidighanliqini ilgiri sürgen we saqchilarning jem'iyettiki étibarliq kishilerni köpchilikning közi aldida tutqun qilghandin bashqa, yene bezide qamaqxanidiki az-tola emili bar tutqunlarni kocha aylandurup sazayi qilghanliqini ashkarilighan we pakit süpitide kamirdishi, sabiq saqchixana bashliqi tursuntoxti mettoxtining sazayi qilin'ghanliqini tilgha alghan idi.

Melum bolushiche, xitay da'iriliri bostan meschitning imami tursun toxtaxunning nediliki we aqiwiti heqqide a'ile-tawabi'atlirighimu, yurt-jama'etkimu ta hazirghiche uchur bermigen.

Toluq bet