Уйғур қизи интизар австралийә парламент сайлими риқабитигә тәйяр болди

Мухбиримиз гүлчеһрә
2022.03.30
Share on WhatsApp
Share on WhatsApp
Уйғур қизи интизар австралийә парламент сайлими риқабитигә тәйяр болди Уйғур қизи интизар австралийә парламент сайлими риқабитигә тәйяр болди. 2022-Йил март.
democraticalliance.com.au

Хитайниң австралийәгә сиңип киришиниң чоңқурлаватқанлиқи вә һәр саһәдә һәтта сиясәткиму тәсир көрситиватқанлиқи бир әмәлийәт. Бултур мартта уйғурлар бир қәдәр топлишип паалийәт қилидиған аделайдтики уйғур ана тили мәктипигә йеқин җайда хитайниң йеңидин консулхана ечиши болса, уруқ-туғқанлири лагерларға қамалған, вәтинигә қайталмайватқан, вәтинидә хитай тәрипидин елип бериливатқан ирқий қирғинчилиққа қарши австралийәдә адаләт тәләп қилип келиватқан уйғур җамаитиниң қаттиқ наразилиқини қозғиғаниди.

20-Март күни, җәнубий австралийәдики аделайд шәһиридики уйғурларниң бу шәһәргә бултур бир хитай консулханисиниң ечилғанлиқиға қарши елип барған намайиш паалийитидә, 28 яшлиқ яш уйғур паалийәтчи интизар илһам өзиниң австралийә парламент сайлимиға қатнишидиғанлиқини, хитайниң австралийәгә, уйғурларға, җүмлидин дуняға елип келиватқан тәһдитлиригә қарши риқабәткә тәйяр болғанлиқини җакарлиған.

Шу күни бу хәвәр, австралийә а б с хәвәрлири 7 қанилидиму хәвәр қилинған. Намайиштин кейин уйғур җамаити интизар илһамниң, әркин демократийә партийәсигә вакалитән либерал һөкүмәтниң парламент әзалиқиға өзини намзат көрсәткәнликини қоллаш йүзисидин мәхсус паалийәт өткүзгән.

Җәнубий австралийәдики өзини қоллаш үчүн йиғилған уйғур җамаитигә интизар илһам өзиниң тәшәккүрини билдүрүш билән тәң “бәзилириңиз билгәндәк, мән изчил нахша ейтишқа қизиқимән. Бундин кейинму һәм бу қизиқишимни давамлаштуримән. Өзүмниң амрақ кәспимниму давамлаштуримән” дегән сәмимий сөзләрдин кейин, мубада сайламда ғәлибә қилалиса австралийә парламентидики хитайниң пулиға сетилидиған чирикликкә хатимә беридиғанлиқидәк яш сиясийонларға хас ирадисини билдүргән вә парламент намзатлиқи үчүн тәйярлиған баянатини көпчиликкә сунған.

У тәмкинлик билән сөзини мундақ башлиған: “австралийәликләр уйғурларниң нәччә он йилдин буян ейтқанлиридин әмди ойғиниватиду. Хитай компартийәси шәрқий түркистандики уйғурларғила әмәс, пүткүл дуняға тәһдит. Биз буни уларниң бозәк қилишлиридин, австралийә демократийәси вә җәмийитигә болған тәһдитлиридин көрүвалалаймиз. Хитай һөкүмити сиясийонлиримизни сетивелип, карханилиримиз вә университетлиримизға сиңип кирип австралийә сияситимизни булғап, бузуп кәлди вә бу қилмишлирини давамлаштуруватиду. Шуниси ениқки, парламентимизда бу һәқтә чиқирилған қарарлар һәр биримизниң һаятимизға тәсир көрситиду.

Бизниң уйғур җамаитимиздә һәр биримиз йиллардин бери әркинлик вә адаләт үчүн күрәш қилип кәлдуқ. Биз хитайниң мустәбит һакимийитиниң қанчилик рәһимсизлики вә немигә қадир икәнликини һәммә адәмдин яхши билимиз. Худаға шүкри, хитайниң қилмишлириға қарши җим олтурмайдиған, уйғур үчүн җапалиқ ишләйдиғанлар бар. Авазимизни техиму юқири аңлитиш үчүн, биз өзимизниң сиясәтчилиригә моһтаҗ”.

У өзиниң австралийә парламенти сайлимидәк бу бүйүк бир сиясий риқабәткә қанишиш ирадисини вә йәтмәкчи болған нишанини муну сөзләр билән баян қилған:

“либераллар партийәси гәрчә хитайға нисбәтән қаттиқ болсиму, әмма хитай һөкүмитигә қарши интайин аста һәрикәт қиливатиду. Сәмимий авазға кишиләрниң қанчилик интизарлиқини билимән. Парламентта бизгә охшаш кишиләр болғандила, андин һәммә адәмгә нәп йәткүзидиған һәқиқий өзгириш болиду. Биз шуниңға лайиқ. Вақти кәлди. Һәр бир австралийәлик, хитай билән болған алақидә вә чирикликни түгитиштә һөкүмәтни җавабкарлиққа тарталайдиған рәһбәргә лайиқ. Хитай һөкүмитидин өзини яки австралийә қиммәт қаришимизни қисқа муддәтлик пулға сатмайдиған рәһбәргә лайиқ. Әгәр мән сайлансам, буларниң һәммиси үчүн, һәммимиз үчүн күрәш қилимән. Мән турмуш сүпитини өстүрүп, өзимиз вә балилиримиз үчүн техиму яхши австралийә қуруш үчүн күрәш қилимән. Мән җәмийитимизгә көңүл бөлимән, көйүнимән. Бозәк қилишқа қарши турушни бурчум дәп билимән вә бир иш қилишимиз керәкликини һес қилимән. Әмди һәрикәткә өтмисәк кечикимиз”.

Интизар илһамниң сайламдики тәшвиқат ишлириға йеқиндин мәслиһәт берип униңға ярдәмлишиватқан уйғур зиялийлардин аделайдтики дилзат әпәнди, интизардәк өзи австралийәдә туғулуп өскән болсиму, өзиниң ғайисини уйғурларниң мәнпәәти вә сиясий истиқбалиға бағлиялиған, уйғурлуқини унтимиған ғайилик вә ихтисаслиқларниң йетилишиниң пүтүн уйғурлар үчүн бир хушаллинарлиқ иш икәнликини билдүрди.

Дилзат әпәнди йәнә интизарниң парламент әзаси намзати болуш сүпити билән кәскин сайлам җәрянида бесип өтүшкә тегишлик қәдәм басқучлирини қисқичә чүшәндүрүп өтти.

Австралийәдики уйғурлар ичидин чиққан тунҗи парламент намзати интизар илһам өзиниң намзатлиқ сайлими үчүн тарқатқан тәшвиқат материяллириға ениқ қилип: “мән барлиқ кишиләргә һөрмәт билән муамилә қилишқа капаләтлик қилидиған сиясәтләр үчүн күрәш қилимән. Мән өзүмни бу дөләт вә дуняни техиму яхши маканға айландурушқа беғишлаймән. Мән парламентта сизниң авазиңиз болимән”, дәп язған. Австралийә парламенти 151 парламент әзасидин тәшкил тапидиған болуп бу йил майда өткүзүлидиған федератсийә парламент сайлимида интизарни өз ичигә алған парламент намзатлириға беләт ташлинидикән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт