IPAC Ezaliri xitaygha qarita téximu qattiq tedbir qollinishni telep qildi

Muxbirimiz nur'iman
2021-11-01
Share
IPAC Ezaliri xitaygha qarita téximu qattiq tedbir qollinishni telep qildi IPAC Yeni “Xitaygha qarshi parlaméntlar komitéti” ni qurghan toqquz döletning 18 dangliq parlamént ezasi.
Social Media

29-Öktebir küni dunya rehberliri 30-31-öktebir ötküzülidighan “20 Dölet guruhi” ( G-20) yighini üchün italiyening paytexti rimgha yighilishti. Ularning muhim nuqtisi korona wabasi we kilimat özgirishi bolidighanliqi bildürüldi. Oxshash bir waqitta “Xitaygha qarshi parlaméntlar komitéti” yeni IPAC ning ezalirimu rimgha toplan'ghan. Ular dunya rehberlirini kilimat özgirishi mesilisige xitayning kishilik hoquq depsendichilik mesilisini tégishiwetmeslikke chaqiriq qilghan.

“Xitaygha qarshi parlaméntlar komitéti”, yeni qisqiche “Aypek” (IPAC) dep atalghan bu komitét ötken yili 4-iyun küni qurulghanliqini élan qilghanidi. Mezkur komitét amérika kéngesh palata ezasi marko rubiyo we robért ménéndéz, yawropa parlaméntining ezasi réynxard butikofér we parlamént ezasi, en'gliye konsérwatiplar partiyesining sabiq rehbiri i'in dankan simisni öz ichige alghan toqquz döletning parlamént ezaliridin teshkil tapqan 18 dangliq parlamént ezasidin terkib tapqan.

I'in dankan simis ependi “Aypek” ning yighinining échilishida söz qilip “Aypek” ning bu yighinini “Ezeldin körülüp baqmighan” dep teswirligen, u yene mundaq dégen: “Bizning meqsitimiz ‛20 dölet guruhi‚ gha eza döletlerdin ularning xitay hakimiyiti dunyagha élip kéliwatqan ghayet zor tehditini ashkara étirap qilishini telep qilish. Meyli pul-mu'amile sistémisigha buzghunchiliq qilish, yershari soda qa'idisige pisent qilmasliq, Uyghurlargha irqiy qirghinchiliq yürgüzüsh, xongkong toghrisidiki xelq'ara shertnamini buzush mesililiride weyaki teywen'ge tajawuz qilish tehditi heqqide bolsun, xitaygha söz qilishning waqti keldi. Démokratik döletler bundaq xelq'araliq yighinda xitaygha xalighinini qilidighan pursetni bermesliki kérek”.

Mezkur yighin'gha qatnashqan ezalar “Aypek”, yeni “Xitaygha qarshi parlaméntlar komitéti”, qurulghandin buyan tunji qétim yüz körüshken bolup, yighin'gha kélelmigen ezalar sin körünüshi arqiliq özlirining uchurini yollashqan.

Mezkur yighin'gha dunya Uyghur qurultiyi london ishxanisining mudiri rehime mehmut xanimmu qatnashqan bolup, u yighinda söz qilip mundaq dégen: “Dunya méning xelqim duch kéliwatqanlarni körmeske salghinida özümni shundaq charisiz hés qilimen. Her qétim dunya rehberlirining shi jinping bilen qol éliship körüshkinini körginimde, méning xelqimning mewjutluqi ular üchün muhim emes iken, dep oylap qalimen”.

“Aypek” ning ezalirining köpinchisi xitay hakimiyitining Uyghurlarni basturushigha qarshi pa'aliyet élip barghanliqi üchün xitay teripidin jaza tedbiri yürgüzülgen.

Xitay teripidin jaza tedbiri yürgüzülgen litwa parlaméntining ezasi dowiliy sakaliny xanimmu bu yighin'gha qatnashqan bolup, u mundaq dégen: “Men litwa parlaméntida Uyghur qirghinchiliqini tonush heqqide qanun layihesi otturigha qoyghanliqim üchün xitay manga jaza tedbiri élan qildi. Men otturigha qoyghan qanun layihesining parlaménttin ötkenlikidin tolimu xushalmen. Tarix rasttinla qayta tekrarliniwatidu. Biz rasttinla xitayning kilimat özgirishi heqqide bergen wediliride turidighanliqigha ishinemduq? biz mushundaq shara'itta rasttinla xitay bilen hemkarlishamduq? men bundaq bolmasliqini ümid qilimen”.

Mezkur yighin'gha yene kishilik hoquq pa'aliyetchisi, xongkongning sabiq qanun belgiligüchiliridin neysin low biwasite neq meydandin, teywen tashqi ishlar ministiri josif wu tor arqiliq qatniship erkin dunyani démokratiyeni qoghdashqa chaqiriq qilghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet