Бишкәктики гүллиниватқан “мәдинә” базири

Бишкәктики “мәдинә” базири

Қирғизистанниң бишкәк шәһиридики уйғур илидин кәлгән тиҗарәтчиләрни асас қилған “мәдинә” базири қирғизистандики әң чоң универсал базарларниң бири шундақла ялғуз оттура асиядила әмәс, бәлки чәтәлләрдә мәхсус уйғурлар үчүн қурулған бирдин - бир базар болуп һесаблиниду.

“мәдинә” базири 2002 - йили қирғизистандики милләтпәрвәр карханичи турсунтай сәлимуфниң тәшәббуси вә мәбләғ селиши билән қурулған болуп, базар қурулған 14 йил давамида кичикликтин зорийип, сода - сетиқ, тавар йөткәш, тиккүчилик, йемәк - ичмәк мулазимити, банка мулазимити қатарлиқлар бир гәвдиләшкән сода мәркизигә айланди.

Йеқинда радиомиз зияритини қобул қилған “мәдинә” базириниң қурғучиси турсунтай сәлимуф әпәнди базарниң қирғизистанниң иқтисади тәрәққияти җәрянида ойниған роли, уйғур илидин кәлгән тиҗарәтчиләргә көрүлгән ғәмхорлуқлар вә уйғур миллитиниң қирғизистандики иҗтимаий орни қатарлиқлар һәққидә өз қарашлирини оттуриға қойди.

Турсунтай әпәнди алди билән “мәдинә” базириниң қирғизистанниң иқтисади тәрәққиятиға қошқан төһпилири һәққидә мунуларни билдүрди:“базар қурулған 2002 - йилдин буян қирғизистанниң тиккүчилик саһәсидә зор җанлинишниң барлиққа келишигә түрткә болуп, бүгүнки күндә 200 миңдин артуқ адәмниң ишқа орунлишишиға өз һәссисини қошуп келиватиду.”

У йәнә уйғур илидин кәлгән тиҗарәтчиләргә асанлиқ яритип бериш, йолуққан мәсилиләрни һәл қилиш қатарлиқ җәһәтләрдә ишләнгән хизмәтләр һәққидә тохталди. У мундақ деди: “вәтәндин кәлгән тиҗарәтчиләрниң сода шараитини яхшилап бериш мәқситидә барлиқ дуканларға иссиқлиқ бериш әслиһәлирини орнитип бериш ишлирини қиливатимиз.”

Қирғизистандики уйғур зиялийлиридин назим қәмбири әпәнди “мәдинә” базири қурулғандин буян барлиққа кәлгән өзгиришләргә иҗабий баһа берип мундақ деди: “оттура асиядики уйғурлар топлишип олтурақлашқан қирғизистанда ‛мәдинә‚ базириниң болғанлиқи қериндаш милләтләр арисидики өз - ара чүшинишни илгири сүриду дәп қараймән.”

Турсунтай сәлимуф әпәнди қирғизистанда милләтләр иттипақлиқи, уйғурларниң җәмийәттики иҗтимаий орни шундақла уйғур йемәк - ичмәк мәдәнийитиниң тәсири қатарлиқлар һәққидиму өз қарашлирини оттуриға қойди.

У: “қирғизистан көп милләтлик мәмликәт. Биз уйғурлар тарихимизниң узунлуқи, өрп - адәтлиримизниң мукәммәллики, тамақлиримизниң сәрхиллиқи билән башқа милләтләрниң һөрмитигә наил болуп келиватимиз” деди.