Голландийәдики “йипәк йоли ресторани” уйғур мәдәнийитиниң даңқини чиқармақта

Ихтиярий мухбиримиз пидаий
2015.02.11
Yipek-yoli-restoran-sirti.JPG “йипәк йоли ресторани” ниң сиртқи көрүнүши. 2015-Йили феврал, голландийә.
RFA/Pidaiy

“йипәк йоли ресторани” нами билән херидарлириға бир йилдин бири уйғур мәдәнийити вә сәнитини намаян қилишқа тиришиватқан һардирвәйк шәһиридики бу уйғур ресторани голландийәдә яшаватқан түркологлар, шәрқшунаслар вә һәвәскар саяһәтчиләрни җәлп қилип кәлмәктә.

8-Феврал йәкшәнбә күни бир топ голландийәликләр кавап, полу қатарлиқ тамақлар билән ғизалинипла қалмай, тәмбүр билән орунланған уйғур музикисини аңлиди вә уйғур усулидин һаяҗанланди.

Өзиниң туғулған күнини хатириләш үчүн достлири билән бу ресторанға кәлгән рени морман әпәнди өзиниң уйғур дияриға икки қетим барғанлиқи вә достлириға уйғур мәдәнийитини тонутуш арқилиқ өзгичә бир туйғу беғишлимақчи болғанлиқини, бу йәрдә уйғур таамлири вә музика-сәнәтлирини тамаша қилип хурсән болғанлиқини билдүрди.

Херидарлардин йәнә бир әпәнди бүгүнки бу олтуруштин йеңи бир мәдәнийәт вә күлтүрниң сеймасини көргәндәк болуватқанлиқини билдүрди.

Бу ресторанда уйғур усулиниң гүзәлликини намаян қилған уйғур қизи пәризат ханим өзиниң хирониңин шәһиридики бир усул мәктипидә оқуватқанлиқини, 5 йилдин бири түрлүк паалийәтләр вә сорунларға тәклип билән қатнишип, уйғур усулини ойнаш билән алқишлинип келиватқанлиқини ейтти.

Ресторан хоҗайинлиридин ғәйрәтҗан рози әпәнди бу бир йиллиқ мусаписини қисқичә тонуштуруп өткәндин кейин, муһаҗирәттики вәтәндашлирини шәхсий игилик тикләшкә илһамландурди вә кәлгүсидики пиланини ортақлашти.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.