Gollandiyediki “Yipek yoli réstorani” Uyghur medeniyitining dangqini chiqarmaqta

“Yipek yoli réstorani” da gheyretjan rozi méhmanlargha mulazimet qilmaqta. 2015-Yili féwral, gollandiye.

“Yipek yoli réstorani” nami bilen xéridarlirigha bir yildin biri Uyghur medeniyiti we sen'itini namayan qilishqa tirishiwatqan hardirweyk shehiridiki bu Uyghur réstorani gollandiyede yashawatqan türkologlar, sherqshunaslar we heweskar sayahetchilerni jelp qilip kelmekte.

8-Féwral yekshenbe küni bir top gollandiyelikler kawap, polu qatarliq tamaqlar bilen ghizalinipla qalmay, tembür bilen orunlan'ghan Uyghur muzikisini anglidi we Uyghur usulidin hayajanlandi.

Özining tughulghan künini xatirilesh üchün dostliri bilen bu réstoran'gha kelgen réni morman ependi özining Uyghur diyarigha ikki qétim barghanliqi we dostlirigha Uyghur medeniyitini tonutush arqiliq özgiche bir tuyghu béghishlimaqchi bolghanliqini, bu yerde Uyghur ta'amliri we muzika-sen'etlirini tamasha qilip xursen bolghanliqini bildürdi.

Xéridarlardin yene bir ependi bügünki bu olturushtin yéngi bir medeniyet we kültürning séymasini körgendek boluwatqanliqini bildürdi.

Bu réstoranda Uyghur usulining güzellikini namayan qilghan Uyghur qizi perizat xanim özining xironingin shehiridiki bir usul mektipide oquwatqanliqini, 5 yildin biri türlük pa'aliyetler we sorunlargha teklip bilen qatniship, Uyghur usulini oynash bilen alqishlinip kéliwatqanliqini éytti.

Réstoran xojayinliridin gheyretjan rozi ependi bu bir yilliq musapisini qisqiche tonushturup ötkendin kéyin, muhajirettiki wetendashlirini shexsiy igilik tikleshke ilhamlandurdi we kelgüsidiki pilanini ortaqlashti.