Uyghur jem'iyiti gollandiye baj qanuni heqqide léksiye orunlashturdi

Ixtiyariy muxbirimiz pida'iy
2015-03-03
Share
Yusup-Beyaztasli-aqtash-ependi.JPG Iqtisadiy heq-telep mutexessisi yüsüp aqtash ependi gollandiyediki Uyghurlargha baj ishlirigha alaqidar chüshenche berdi. 2015-Yili 1-mart, gollandiye.
RFA/Pidaiy

2015‏-Yili 3‏-ayning 1‏-küni “Yawropa sherqiy türkistan ma'arip jem'iyiti” de jem bolghan gollandiyediki Uyghurlar yemendiki siyasiy özgirishlerning tarixi bilen qisqiche tonushup chiqti we gollandiyediki baj ishlirigha alaqidar iqtisadiy qanunlar heqqidiki chüshenchilirini yéngilidi.

Aldi bilen mezkur jem'iyetning mes'uli eysa qarajimning teyyarlishida yemenning tarixi bilen tonushup chiqqan pa'aliyet ehli, yemendiki inqilabchi guruppilar tereqqiyatining ichki-tashqi amillirini, ana wetinining azadliqi bilen birleshtürüp muzakire qildi we pikir almashturdi.

Namazdin kiyin ghizalinip bolghan jama'et, mezkur jem'iyet teripidin alahide teklip qilin'ghan iqtisadiy heq-telep mutexessisi yüsüp aqtash ependining teqdim qilishida, gollandiyediki baj ishlirigha alaqidar chüshenchisini yéngilidi. Yüsüp aqtash ependi 2 yil ilgiri bu jem'iyetke bir qétim kélip, bu heqte sawat anglatqan idi.

Yüsüp aqtash ependi pa'aliyet ehlige yene, sherqiy türkistan xelqining istiqbali üchün Uyghur qérindashliri bilen bir septe turidighanliqini, ghelibining ittipaqliq we toghriliqqa baghliq ikenlikini tekitlidi we barliq qérindashlirini iman-islamning shertlirige uyghun yashashqa chaqirip, atilarche nesihet qildi.

Pa'aliyet axirida ishtirakchilar yüsüp aqtash ependidin özliri duch kelgen mesililer heqqide so'allar sorap, qana'etlinerlik jawabini aldi. Pa'aliyet shu yer waqti chüshtin kéyin 13 te bashlinip, kech sa'et 19 gha qeder dawam qildi.

Ziyaritimizni qilghanlar özlirining yürek sözlirini éytti. Yüsüp aqtash ependimu bügünki bu pa'aliyette Uyghur qérindashliri bilen derqemte bolushtin alghan dil huzurini radi'o anglighuchilirimiz bilen ortaqlashti.

Her ayning béshi yaki axiridiki yekshenbe künliri bir qétimdin dawam qilip kéliwatqan “Ayliq söhbet pa'aliyiti” yawropa sherqiy türkistan ma'arip jem'iyitining yillardin béri izchil dawam qilip kéliwatqan xizmetliridin biri bolup, uningda milliy we diniy kimlikini jari qildurushqa paydiliq tewsiyiler tarixqa a'it qimmetlik yadnamiler we bügünki hayatqa alaqidar ré'al mesililerni muzakire qilish we öginish, wetendashlar ara erkin söhbet bilen qérindashliq munasiwetlirini kücheytishtek, ehmiyetlik programmilar asas qilinip kelmekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet