Gollandiyediki Uyghurlar yer sétiwalmaqchi

Gollandiyediki Uyghurlar yer sétiwélish ishlirining muweppeqiyiti üchün du'a qilmaqta. 2013-Yili 3-noyabir.

Uyghurlar ilgiri kéyin bolup, amérika, awstraliye, gérmaniye, türkiye we se'udi erebistan qatarliq döletlerde yer sétiwélip, muhajirettiki milliy we diniy kimlikini jari qilduridighan merkezlerge aylandurghan idi. Mana emdi gollandiyedimu Uyghurlar yer sétiwélish aldida turmaqta.

3‏-Noyabir gollandiyediki Uyghurlar yawropa sherqiy türkistan ma'arip jem'iyitining seperwer qilishi bilen yéghin zalida jem bolup, bu yilning béshidin bashlap ijare tölep ishlitiwatqan mezkur orunni sétiwélish qararigha kélishti. Jem'iyet mes'uli obulqasim ependining bildürüshiche, gollandiyede turushluq Uyghurlardin köpinchisige téléfon we bashqa wasitiler bilen alahide chaqiriq qilin'ghan bolup, bu chaqiriqqa awaz qoshqan Uyghurlar shu küni ütrixt ölkisining zesyt shehirige jaylashqan mezkur orunni sétiwélish meslihet kéngishige qatnashqan.

Shu yer waqti péshin namizidin kéyin qur'an kerim qira'iti bilen bashlan'ghan mezkur pa'aliyette aldi bilen, allah rizaliqini közlep omumning menpe'eti üchün zörür bolghan bir qurulushqa hesse qoshushning islamdiki hökümi we musulmanliqtiki peziletliri bayan qilindi. Andin pidakarliqning, tarix we bügün bir milletning istiqbali üchün kem bolsa bolmaydighan bir amil ikenliki yorutuldi. Axirida mezkur jem'iyetning omumi ishlar mes'uli obulqasim ependi mezkur yerni sétiwélishtiki amillarni tepsiliy bayan qilip ötti. Obulqasim ependining bildürüshiche, mezkur yerni sétiwélishta Uyghurlarning gollandiyede özliri üchün xas bolghan muqim bir yerge éhtiyajliq bolghanliqi, hazir iqtisadiy krizis seweblik, yer ,mülk bahasining xélila töwen bolushi, qatarliq amillar seweb we purset bolmaqta iken.

Bu yer 5 yilliq toxtam bilen ijare élin'ghan bolup, bu 5 yil ichide 75 ming yawrogha yéqin kira tölinidiken. Hazirqi yerning bahasi texminen 250 ming yawro etrapida bolup, bu 15 yilliq ijare heqqige toghra kélidiken. Démek Uyghurlar 3 qararliq ijare pulini töliyelise, bu yer ularning mülki bolup qalidiken.

Mezkur tepsilatlarni anglighan pa'aliyet ehli bes- munazire, muzakire we kéngeshtin kéyin, axirqi qararni köpchilikning awazigha qoydi. Netijide mezkur kéngeshke ishtirak qilghuchilar hemmeylenning birdek qoshulushi bilen bu yerni élish qarari jezmleshti.

Hemmige ayan bolghinidek؛ gollandiyediki Uyghurlarning mutleq köp sandikiliri ishsiz bolup, hökümetning töwen turmushluq yardimi bilen yashimaqta idi. Undaqta 250 ming yawroni qandaq hel qilghili bolar? bu mesile gollandiyediki Uyghurlarning hemmisige ghem bolghan bolsimu, bu sahede izden'gen Uyghurlar bu dölettiki qa'ide, nizamlargha asasen muddetke bölüp sétiwélish charisini oylap tapqan. Shuning bilen mezkur yerni sétiwélish charisi heqqide köpchilik birlikke kélip, her adem 1000 yawrodin bérish seperwerliki qozghaldi. Netijide neq meydandila 39 ming yawrogha höjjet yézildi.

Pa'aliyet dawamida namelum bir xanimning bu xeyrlik ish üchün özining altun bileyzükini teqdim qilishi köpchilikni hayajanlandurdi.

Pa'aliyetke qatnashqan pidakar Uyghurlar özliri imzalap bergendin sirt, bashqa dost -yarenlirige séghinip bir nechche nusxidin höjjet éliwaldi. Mezkur saxawetlik qedemliridin ikki dunyaliq beriketler tilep, yaxshiliq üstide qol tutushup ittipaqlishalighanliqidin söyün'gen pa'aliyet ehli pa'aliyitini du'a bilen axirlashturup, sham namizini oqup qaytishti.

Pa'aliyet axirlashqanda, ziyaritimizni qobul qilghan ishtirakchilardin beziliri öz pikir-qarashlirini, hés-tuyghulirini anglatti. Yawropa sherqiy türkistan ma'arip jem'iyitining omumi ishlar mes'uli obulqasim ependi barliq wetendashlarni bu xeyrlik ish üchün hesse qoshushqa chaqirdi.