Gollandiyediki Uyghurlarning öz aldigha igilik tiklesh rohi ösmekte

Gollandiye shimaliy yawropagha jaylashqan kichik bir dölet bolsimu, iltijachi Uyghurlargha panahliq bérip kelmekte. Uyghurlarmu gollandiyediki on nechche yilliq muhajirliq musapiside öz küchige tayinip halal yashash üchün tirishmaqta.

Oqush, chüshinish, maslishish we halal terige tayinip öz xasliqi bilen yashash basquchlirini tamamlighan Uyghurlar mana emdilikte, musteqil igilik tikleshning yollirigha qedem basmaqta. Jümlidin gollandiyining hardirweyk shehiridiki sayahet merkizige jaylashqan “Yipek yoli réstorani” ene shundaq bir Uyghurning tewekkülchilik rohini izhar qilmaqta. Bu yilning béshidin bashlap mulazimet bashlighan mezkur réstoran yawropaliq xéridarlirigha Uyghur ta'amlirini özgiche bir uslubta sunmaqta.

Ziyaritimiz dawamida teshebbuskarliq bilen inkas qayturghan gollandiyilik bir xanim özining bu réstoran'gha échilghandin béri dawamliq dégüdek kélip turuwatqanliqini, Uyghur ta'amlirining mezzilik temige, Uyghur muzikilirining nepis we molliqigha, Uyghur medeniyitining, örp - adetlirining alahidiliklirige meptun bolup qalghanliqini zoq - shoq bilen sözlep berdi.

Mezkur réstoranni mangduruwatqan gheyretjan rozi ependi gollandiyediki tarixi birqeder uzun, siyasiy we ijtima'iy sahelerdiki aktipchanliqi alahide, ana wetinidin tartip igilik tiklesh yolida tejribe igiligen, gollandiyige kelgendin buyan özige qattiq telep qoyup kéliwatqan yashlarning biri. U ziyaritimizni qobul qilip, özining mezkur réstoranni achqandin kéyinki tesiratlirini bayan qildi.

U sözide, yillardin béri musteqil igilik tiklesh yolida chekken riyazetliri؛ siyasiy we medeniyet pa'aliyetlirini teshkillep belgilik munasiwet shekillendürgenliki؛ teqdirning orunlashturushi bilen bu réstoranni musteqil achqanliqi؛ shundin buyan bir yilgha yéqin musapisidin xulasige kélip, kespiy jehettiki ortaqliqi bolghan wetendashliri bilen özgiche bir uslubta bazar échishqa bel baghlighanliqi qatarliqlarni bildürdi.

16 Yildin béri gollandiyide yashawatqan alimjan ependi a'ile ezaliri bilen mexsus tort yasash sétish kespini tereqqiy qildurghan bolup, “Yipek yoli réstorani” ning etigenlik nashtiliq sodisini mangdurushqa kélishken. U ana tilini söyidighanliqini؛ ana tilida söhbetlishiwalsa xushal bolidighanliqini, a'ile ezaliri arisida rusche sözliship yillardin béri ana tilidin uzaqliship qalghanliqini, bu réstoranda Uyghur qérindashliri bilen birge xizmet qilidighanliqidin xursen boluwatqanliqini bildürdi.

Gollandiyelik karolin xanim Uyghur ta'amlirining gollandiye we yawropa bazarliridiki tereqqiyati heqqidiki köz qarashlirini ipadilep: Uyghur ta'amliri nahayiti yéyishlikken. Tamaqtiki mayning miqdarigha diqqet qilsila, bu yerde bazar tépishida gep yoq. Emma, kishilerning köpi téxi Uyghur ta'amliri bilen tonushmidi, buning üchün köp sebre qilishqa toghra kélidu. Lékin men, Uyghur ta'amliri, medeniyiti, kiyim - kéchek, muzika chalghuliri we ularning méhmandostluqigha rastinila qayil boldum, dédi.