Голландийәдики уйғур яшлар интернет сода тиҗарити һәққидә йиғин тәшкиллиди

Ихтиярий мухбиримиз пидаий
2015.03.09
Share on WhatsApp
Share on WhatsApp
internet-tor-sodisi-gollandiye.jpg Явропа шәрқий түркистан маарип җәмийитидә, интернет сода тиҗарити һәққидә сават бериш паалийитидин көрүнүш. 2015-Йили 8-март, голландийә.
RFA/Pida’iy

8‏-Март йәкшәнбә күни явропа шәрқий түркистан маарип җәмийитидә тәрбийилиниватқан яш-өсмүрләрниң уюштуруши билән голландийәдә интернет сода тиҗарити һәққидә сават аңлитилди. Шу йәр вақти чүштин 5 тин, 7 гә қәдәр давам қилған мәзкур паалийәт уларниң вәтәндашлириға сунған тунҗи мевиси болуп, паалийәткә 20 йилдин бери голландийәдә тор тиҗарити билән шуғуллиниватқан ACN ширкитиниң тәҗрибилик хадимлиридин Dajo әпәнди билән Walid Ibraim әпәндиләр тәклип қилинған. Dajo Әпәнди мәзкур ширкәтниң голландийәдики баш сетиш нуқтисида муавин директор, Walid Ibraim әпәнди болса, мәзкур ширкәтниң актип хизмәтчиси икән.

Алди билән Walid Ibraim әпәнди, мәзкур ачн ширкитиниң тиҗарәт услубидин чүшәнчә бәрди вә өзиниң мәзкур ширкәттики хизмитини қачан, қандақ, қәйәрдин башлап бүгүнгә улишалиғанлиқини паалийәт иштиракчилириға аңлатти.

Андин Dajo әпәнди күнсери тәрәққий қиливатқан тор содисиниң истиқбали һәққидә җанлиқ мисаллар берип, һәрқандақ инсанниң тили, дәсмайиси, йеши, җинси вә ирқий қатарлиқ җәһәттә чәклимигә учримайдиғанлиқини; юқиридикиләрниң төвәндикиләргә ярдәм бериши нәтиҗисидә йүксилиштәк пирамида шәкиллик системиси билән алға илгириләватқан мәзкур ширкәтниң 20 дин артуқ дөләттә вакаләтчи нуқтилирини тәшкил қилип, тиришқанлики кишиниң әҗригә лайиқ мәнпәәткә еришәләйдиғанлиқини билдүрүп сөз қилди.

Кейин көпчилик өз ара соал-җаваблиқ музакирә қилип, тор содиси һәққидики чүшәнчилирини чоңқурлаштурди. Паалийәт иштиракчилиридин һүсәйин тәҗәллий әпәнди, һәр бир мусулманниң тиришчанлиқи униң мели вә җени билән болидиғанлиқини тәкитләп, голландийәдики вәтәндашлириниң иқтисадий җәһәттә йүксилиш роһиға мәдәт бәрди.

Мәзкур паалийәткә қатнашқан уйғурларму бу лексийәдин алған тәсиратлирини сөзләп бәрди. Dajo Вә Walid Ibraim әпәндиләрму зияритимизни қобул қилип, тор содиси билән шуғуллинишниң нөвәттики имканлирини тәвсийә қилди.

Ахирида мәзкур паалийәтниң мәйданға келишидә муһим рол ойниған яш йигитләрму өзлириниң йүрәк сөзлирини аңлатти. Уларниң дейишичә, улар барлиқ арзу-арманлириниң иқтисад билән бағлинишлиқ мунасивитини чүшәнгәндин кийин, издиниш нәтиҗисидә мәзкур тор содиси ширкитиниң пайда тепиш принсиплириға қизиқип қалған вә өзи яхши көргәнни башқиларға қисиниш һессияти билән бу паалийәтни тәшкилләп, вәтәндашлириниңму бирликтә илгирилишини мәқсәт қилған.

Бу, явропа шәрқий түркистан маарип җәмийитидики оқуғучиларниң тунҗи мевиси болуп, чоңлар уларниң бу тиришчанлиқини, вәтән-хәлқигә нәп берәләйдиған бир нәсил болуп йетишип чиқалайдиғанлиқиниң бир аламити дәп тәриплиди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.