Истанбулда “ихлас уйғур” намида ресторан ечилди

Ихтиярий мухбиримиз арслан
2013.10.17
Share on WhatsApp
Share on WhatsApp
ihlas-uyghur-restoran-1.jpg Ихлас рестораниниң сиртқи көрүнүши. 2013-Йили өктәбир, истанбул.
RFA/Arslan

Уйғурлар дуняниң қәйиригә барсун өзиниң миллий таамлирини йейишни яхши көриду, уйғурларниң тамақ мәдәнийити узун тарихқа игә болуп, уйғур тамақлири мәззилик вә иштиһалиқ болғанлиқи үчүн бир қетим йәп көргән башқа милләтләрму асанла яқтуруп қалиду.

Истанбулда арқа-арқидин уйғур ресторанлар ечилишқа башлиди. Йеқинда истанбулниң уйғурлар әң көп олтурақлашқан зәйтинбурну районида “ихлас уйғур” ресторан ечилди.

2013-Йили 10-айниң 17-күни истанбулниң зәйтинбурну районидики нурипаша мәһәллисиниң әйса йүсүп алиптекин кочида “ихлас уйғур ресторани” ниң рәсмий ечилғанлиқи елан қилинди вә бу мунасивәт билән ресторанға зиярәткә кәлгән кишиләргә пүтүн бир күн кәчкичә һәқсиз тамақ берилди.

Игилинишичә бу ресторанни истанбулниң ақсарай районидики “түркистан уйғур ресторани” ниң хоҗайини әбәйдулла әпәнди ачқан болуп, бу ресторанда уйғурларниң, ләңмән, сомән, манта, полу, кавап, чөчүрә вә суюқаш қатарлиқ тамақлири тепилидикән.

Бу һәқтә зияритимизни қобул қилған әбәйдулла әпәнди “ихлас” уйғур ресторанни ечиштики мәқсити тоғрисида тохтилип, ихлас уйғур ресторани меһманларға әла мулазимәт қилидиғанлиқини, ихлас билән тамақ тәйярлайдиғанлиқини, шуниң үчүн ресторанға “ихлас уйғур” дәп нам бәргәнликини, херидарларни мәмнун қилишни биринчи орунда қойидиғанлиқини, түрк яки башқа милләтләргә бир тәрәптин уйғур таам мәдәнийәтлирини тонуштуруш, йәнә бир тәрәптин иқтисади кирим қилип игилик тикләш икәнликини, шуниң үчүн һазир истанбулниң ақсарай вә зәйтинбурну қатарлиқ икки орунда уйғур ресторан ачқанлиқини, истанбулниң лаләли районида йәнә “ихлас уйғур” намида 3-ресторан ечишни мәқсәт қилип орун тутқанлиқини йеқинда у йәрдиму ишқа киришидиғанлиқини билдүрди.

Йеқиндин буян истанбулға көпләп уйғурларниң келип олтурақлишиши билән уйғур дукан вә ширкәтләрму арқа-арқидин ечилишқа башлиди.

Истанбулниң бир қанчә орунда уйғурчә ресторанлар бар болуп, топкапи түрк дуняси мәдәнийәт бағчисида зиннәт ресторани, финдикзадидә йүксәл ресторани, ақсарайда, һаят ресторани, атуш уйғур ресторани, түркистан уйғур ресторани, ақйол ресторани, қумкапида, меһман оттура асия дастихини, дегәнгә охшаш ресторанлар бар. Зәйтинбурнуда болса, түркистан ресторани, зәмзәм ресторани, уйғур ихлас ресторани дегәнгә охшаш ресторанлар бар.
Зәйтинбурнуда йәнә түркистан уйғур навайханиси, тәклимакан уйғур қассаплиқи дегәнгә охшаш дуканлар ечилған болуп, уйғурлар худди уйғур дияридикигә охшаш навайханидин уйғурчә нан сетивалиду, уйғур қассаптин гөш сетивалиду, халиса уйғур ресторанға кирип уйғурчә тамақ йәйду. Зәйтинбурнуда йәнә уйғурлар әң яқтуруп истемал қилидиған йесивиләк, кәрәпшә вә көкмаш қатарлиқ көктатларму дуканларда тепилиду.
Уйғур ресторанларниң көпләп ечилишиниң еһтияҗи вә әһмийити тоғрисида зәйтинбурнуда яшаватқан уйғур зиялийси муминҗанниң пикир-қарашлирини алдуқ. Муминҗан уйғур ресторанларниң көпләп ечилиши, түркләргә уйғурларни вә уйғур тамақ мәдәнийитини тонуштурушта муһим әһмийәткә игә икәнликини, бу арқилиқ түркләрниң уйғурларни яхши билишигә түрткә болидиғанлиқини билдүрди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.