Istanbulning sefaköy rayonidiki Uyghurlar soda-yermenke pa'aliyiti uyushturdi

Sefaköy rayonida échilghan soda-yermenkidin körünüsh. 2013-Yili may, istanbul.

Istanbulda pa'aliyet qiliwatqan sherqiy türkistan ma'arip we hemkarliq jem'iyiti sefaköy shöbisining uyushturushi bilen istanbulning sefaköy rayonida sherqiy türkistan soda-tijaret yermenkisi échildi.

Sherqiy türkistan ma'arip we hemkarliq jem'iyiti teripidin her yili bir qétim istanbulda sherqiy türkistan soda-tijaret ijtima'iy pa'aliyiti ötküzülüp kéliwatqan bolup, bu yil 4-qétimliq soda yermenkisi sefaköy shöbisining uyushturushi bilen 2013-yili 5-ayning 17-küni sefaköy rayonidiki atatürk baghchisida resmiy échildi.

Bu yermenkide istanbuldiki bir qisim tijaretchiler dukanlirida satidighan mallardin i'ane qildi. Uyghur ayallar hemkarliship öz ixtiyarliqi bilen öyliride Uyghurche ta'amlarni pishurup ekélip teqdim qildi.

Bu pa'aliyette bir tereptin Uyghurlarning örp-adet, medeniyetlirini tonushturush pa'aliyiti élip bérish bilen birge, iqtisadiy kirim qilish meqsitide her xil er-ayalche kiyim-kéchekler, oyunchuqlar we Uyghur ta'amliridin lengmen, polu, manta, samsa, sériq ash, lengpung we péchine qatarliq tamaqlar we shuninggha oxshash her xil eshyalar sétildi.

Bu pa'aliyette Uyghurlarning milliy medeniyitini tonushturush bilen birge her xil kiyim-kéchek we turmushta qollinidighan éhtiyajliq eshyalar we Uyghurche yémek-ichmek, kiyim-kéchek we her xil nerse-kérekler sétildi. Yermenkini köp sanda kishiler qiziqip ziyaret qilmaqta we nerse kérek sétiwalmaqta.

Bu yermenkini ziyaret qiliwatqanlarning sani köp bolup, chong hejimdiki chédirning ichige üch qatar qilip her xil turmush buyumliri tizilghan, chédirning etrapigha “Sherqiy türkistan yermenkisige xush keldingiz” dégen chong xetler yézilghan we chédirning üstige sherqiy türkistan bayriqi bilen türkiye bayriqi ésilghan.

Igilinishiche bu yermenkini échish üchün istanbul ammiwi teshkilatlarni bashqurush idarisi we köchükchekmeje sheherlik hökümettin resmiy ruxset élin'ghan bolup, yermenke 5-ayning 17-künidin 23 ‏-künigiche bir hepte dawam qilidiken.

Biz bu pa'aliyet heqqide téximu köp melumatqa érishish üchün sherqiy türkistan ma'arip we hemkarliq jem'iyitining sefaköy shöbe bashliqi enwer qari we ayallar bölümi mes'uli munewwer özUyghur bilen söhbet élip barduq.

Enwer qari, bu pa'aliyetni uyushturushtiki meqsitini ipadilep, bir tereptin türk xelqige Uyghurlarning milliy örüp-adet, kiyim-kéchek we yémek-ichmeklirini tonushturush bilen birge iqtisadi kirim qilip, istanbulning üch ornida échilghan Uyghur ana til yesli mekteplerning iqtisadi chiqimlirini hel qilish we jem'iyetning pa'aliyetlirini tereqqiy qildurush üchün bu pa'aliyetni uyushturghanliqini ipadilidi.